Aisaya 5 - Uwumbɔr aagbaŋ

Kisaak aalahn

¹ Le pel man nlahn mu m ban m gaa na. Mu ye njɔ ubaa ni waasaak aalahn la. Udichadaan ubaa le nan bi le ki naan kisaak lijool li aatiŋ ŋan na pu.

² U nan kuun ŋitakpal le ki kon ki ŋum isui i lu ŋisubil ŋi ŋan na ki ponn ni, le ki maa libimbifɔfɔŋ ke bi li ka li paab ki kiir kisaak na, le ki gbii libuul litakpasakpeln ni, li bi ga di ŋisubil ŋa li ponn ni na aan ki ŋmaa ŋaanyun nyan na; le ki kii buyoonn ŋisubil ga puir na; le ŋisubil na mɔmɔk nan mɔɔn la.

³ Kina pu le njɔ bui ke, “Nimi bimɔk bi Jerusalem ni Juda na, lik man maasaak ngbaan aabɔr aan ki len ibamɔn.

⁴ Ni ye ba le maa ŋa ki? Kina kan, ba ŋa ki lun ŋisubil ŋi mɔɔn na ŋmeen, kaa ye ŋi ŋan na?

⁵ “Maah ga ŋa maasaak ngbaan pu na sɔ: M ga chuu ŋɔi idɔ i m nan di gob ki aan i kii ki na, le ipeel i bir na nan ŋmɔ ki, ki taa taa bii ki.

⁶ Maan ki kuur ki ponn ni aan timoor muun ki ponn ni. Maan ki per isui ngbaan aan i ki kpenn, kaan ki toor i taab; m ga cha ukokongɔkr ni ikokon gaa ki ni. M ga jenn utaal u taa ki nu ki ponn ni.”

⁷ Israel ni Juda aanib le ye Uwumbɔr Mpɔɔnsakpiindaan aasaak, bima le ye ŋisubil aasui i u ŋum na. U nan dak ke bi ba ŋa ni ŋan na, le bi yii ki ku binib. U nan dak ke bi ba li ŋani ni tok na, le bi nan ŋani binib mbiin, le bi wii baabamɔn pu.

Titunwanbir ti binib tun na

⁸ Nimi aamɔfal doo a. Ni moo daa ŋidichal ni ikpaakon ki kpei naah puen kpa i na pu. Naan yunn le unii aan ki kan mpaan ki koo nima chee, le nimi baanja le ga gur kitiŋ ngbaan pu.

⁹ M ŋun Uwumbɔr Mpɔɔnsakpiindaan len ke, “Ŋidichanyaan sakpiin ŋimina mɔmɔk ga kpaln ŋidichakuun ki lir.”

¹⁰ Ŋisubil aasui i ni ŋum ŋibal kipiik aakpaab ni na aasubil aanyun ga gbiin kpalba biniin baanja la. Bɔtɔ mam nkub aajikaabim mu ni di bun na ga nan nyan bɔtɔ mam kipiik baanja la.

¹¹ Nimi aadoon le na. Ni fii mala kichakpinaanyeek ni ki piin ndaan aanyum, ki nyu ki ti saa kijook ki nyu ki gbii.

¹² Nimi aajim ponn ni, ni gbaa tibar ni ichayakrtuun ki pee ŋiwul ki nyu ndaan, le kaa nyi Uwumbɔr aah ŋani pu na.

¹³ Kina pu na, bi ga yoor nimi di buen tinaagbiir ni. Nkon ga ku nimi aayidam, le nnyunyuu ku bigiim na mu.

¹⁴ Kitekpiitiŋ ka waa bumɔb kii bi la, ki ga nab Jerusalem aaninyuum na, ni baanib, ni binib bi nyu ndaan ki kpa kifuuk na mɔmɔk.

¹⁵ Inimɔɔn ga chuu unibɔn mɔk, le bigaadam na ga sunn bibaa taab.

¹⁶ Uwumbɔr Mpɔɔnsakpiindaan ŋani ni ŋan na la, le waapɔɔn nyan mpaan pu. Le waah ga ji waanib tibɔr pu na le ga mɔk waah bi chain pu na.

¹⁷ Ntim mu kpaln tilangbenn na ni, le ipiih ga ŋmɔ timoor aan iŋoob mu kan yaamoŋmɔpaan.

¹⁸ Nimi aadoon le na. Naan ŋmaa gaa nibaa nimi aatunwanbir na chee.

¹⁹ Le ni len ke, “Cha Israel yaab Aawumbɔr u bi chain na ŋa mala ki ŋa waah bui ke u ban pu na, aan ti kan ni, aan ki bee waalandak.”

²⁰ Nimi aadoon le na. Tiwan ni kaa ŋan na le ni yin ke ni ŋan, le ki yin ni ŋan na ke naa ŋan. Ni chee ye mbɔmbɔɔn na le ni yin nwiihn; le ni chee wiin na, ni yin mbɔmbɔɔn. Nimi le yin tiwan ni mɔɔn na tiwan ni mɔ na, le ki yin ni mɔ na tiwan ni mɔɔn na.

²¹ Nimi aadoon le na. Ni dak ke ni chi la, ke ni chi sakpen la.

²² Nimi aadoon le na, nimi bi ye ndaan aakpalba aajakaandam na. Ni chee ti ye ke bi di ndaan chee tɔb ponn ni na, nima chee le ni kaar.

²³ Le buyoonn ni yaa kan igaŋgaŋlik na, ni di binib bi aabɔr aa ŋan na di lii, le kaa tii binib bi aabɔr ŋan na baabamɔn.

²⁴ Kina pu na, timokuun ni ikpakpaabi aah wu mmii ni pu na, kina le nimi aanyaan ga bur, le nimi aafar mu kuur aan libuln daa ti buen, ba pu? nimi Israel yaab, ni yii Nimi Aawumbɔr Mpɔɔnsakpiindaan u bi chain na aah mɔk timi pu na.

²⁵ Nima pu na, Uwumbɔr gee liŋuul nimi waanib pu, ki fii sil ke u daa nitafal. Ŋijoo mɔmɔk ga deŋ, le ŋinikpol aakpab ga gbiin ntim ni ke ŋitapun pu aamoor na. Hali nimina aapuwɔb, Uwumbɔr aaŋuul aan sɔŋ. U ga sil nya sil ke u daa nitafal.

²⁶ Uma Uwumbɔr yin dandar aatimbol. U foo ifoo ki yin bi ke bi nyan ni dulnyaa aanaan mɔmɔk ni ke bi dan. Le bi san ni mala ke libuln na ki choo.

²⁷ Naa ŋuni bi ponn ni ubaa; le bi ponn ni ubaa aa gbeer nibaa. Baa geeni ki yenni kaa geeni kpala. Bi ponn ni ubaa aagbapapaln aa sɔkr; ubaa mu aanaatakl aa kii.

²⁸ Baapiin ka, le bi gor baatɔi ke bi too. Baataan aataabuseen pɔɔ ke lichachatakpal na, le baataan aatɔroku tiib aataa manni mala mala ke kinaakpaajabuŋ na.

²⁹ Baatɔb aajab ŋuuni ke uchinn u chuu upeel ki joo san cha nin chee ubaa aan ki ŋmaa gaa upeel ngbaan u chee na aah ŋuuni pu na la.

³⁰ Nwiin ngbaan daal yaa nan fuu ni kan, bi ga nan ŋuun labr Israel aatiŋ pu ke nnyusakpem aah fu pu na. Lik man litimbol limina. Ni ye mbɔmbɔɔn ni nsuubiin ŋmeen la. Mbɔmbɔɔn di nwiihn mɔmɔk mu nan bi nima na di nab a.