Aisaya 48 - Uwumbɔr aagbaŋ

Uwumbɔr le ye n‑yoonn mu choo na Aadindaan

¹ Nimi Israel aanib bi ye Juda aayaabitiib na, li pel man tibɔr tee: Ni puu tipuur Uwumbɔr aayimbil pu, ki bui ke ni dooni nimi Israel yaab Aawumbɔr la, le naa bi nisui ni kpala.

² Le ni tee mak ke ni ye Uwumbɔr aatisakpeŋ aanib la, le ki tii Israel yaab Aawumbɔr naadii; waayimbil le ye Uwumbɔr Mpɔɔnsakpiindaan.

³ Uwumbɔr bui Israel yaab ke, “N‑yoonn mu jer na le m nan len tiwan ni ga ŋa na; le m kpaan cha ni ŋa.

⁴ M nan nyi ke nitafal ga li pɔɔ ke kikurk na, kaan li kool ke tikumann aakur na.

⁵ Le m nan puun len nimi aabimbin aah bi pu na n‑yoonn mu jer na, ki mooni tibɔr aan ti nin ŋa, ke m kiir nimi aan ni taa bui ke nimi aawaa le ŋa ti.

⁶ Tibɔr timɔk m nan puun len ke ti ga ŋa na mɔmɔk ŋa kina; kina pu na, ni ga kii ke maah nan len pu na ye ibamɔn. Dandana ma, m ga bui nimi tiwachann ni ga dan na la, tiwan ni maa nan kpiir mɔk nimi na.

⁷ Dandana baanja le m bi cha ni ŋani; kina aawan aa kee ŋa. Ni yaa ba ŋa kan, ni ba ga bui ke ni puun nyi ni pu a.

⁸ M nan nyi ke naa ye binib bi unii ga gaa nimi ki kii na, ke unii mɔk nyi ni pu, ke ni ye binib bi kaa kii tii biken na la. Kina pu le naa ŋun kina aabɔr, nima le cha nitafal aa cheen kina aabɔr daalbaadaal.

⁹ Maah ban ke binib nyuŋ maayimbil na, nima le m chur maaŋuul; m kiir li ke m taa kuln nimi la.

¹⁰ M tɔŋ nimi falaa aamii ni, ke baah pu tikunabr mmii ni pu na, le ki kan ke naa kpa tinyoor tibaa.

¹¹ Maah ŋani tiwan nimɔk na, m ŋani mbaa pu la. Maa ban ke m bii maayimbil, kaa ban ke ubaa yakr m chee kipak; ki ga li ye min baanja aapak la.”

Sairus, unii u Uwumbɔr lee ke u li ye usaloln na

¹² Uwumbɔr bui ke, “Israel aanib, binib bi m yin bi na, li pel m chee, Min le ye Uwumbɔr u ye mpiin ngbaan, ni ndoon ngbaan na, Uwumbɔr baan ngbaan.

¹³ Maaŋaal le nan naan taab aatinyikl, ki daa taln kitaapaak. M yaa yin kitiŋ ni kitaapaak kan, ni choo mala le ki nan sil nnimbiin ni.

¹⁴ Ni mɔmɔk kuun ni man ki nan pel. Ŋiwaa ngbaan ponn ni libaa aa nan ŋmaa len ke uja u m lee u na ga nan tak Babiloŋ aatiŋ; u ga ŋa maah tuk u ke u ŋa pu na.

¹⁵ Min le nan len ki yin u; m loln u pu nsan ki cha u kan maah ban pu na.

¹⁶ Dandana, foor mar ni m chee man ki nan pel maah ga len pu na. Ki nyan mpiin ngbaan m len maabɔr chain la, le n‑yoonn mɔmɔk m cha maah len pu na gbiini.” Tɔ, Ndindaan Uwumbɔr tii mi Waafuur Nyaan le ki tun mi.

Uwumbɔr aah ga ter waanib pu na

¹⁷ Nimi Israel yaab Aawumbɔr u bi chain na, Uwumbɔr u gaal nimi lir na bui ke; “Min le ye Nidindaan Uwumbɔr u ban ke u mɔk nimi mbimbinyaan, ki mɔk nimi nsan mu pu ni ga dii na.

¹⁸ Ni yaa nan ba pel maah tuk nimi pu na kan, le tinyoor ba ga li puu choo ni chee, ke nkpen mu aanyun aa foor na. Linyaŋ ba ga dan ni chee, ke nnyusakpem aanyunkpenn na la.

¹⁹ Niyaabitiib ba ga li wiir ke limɔɔtambol na la, le m ba ga li kii bi, ubaa taa bii bi.”

²⁰ Nya Babiloŋ ni man, li cha man, ni fuur a. Li kpa mpopiin man ki moon tibɔpɔnn ngbaan, cha bi ŋun ni kookoo man ke, “Uwumbɔr gaa waatutunn Israel aanibol lii a.”

²¹ Uwumbɔr aah nan di waanib dii nteersakpiin mu ton ki kuun na ni na, baa nan kan nnyunyuu aafalaa. U nan cha nnyun nyan ni litakpal ni ki tii bi; u nan gaa lar litakpal ngbaan le nnyun puu nyan ni.

²² Uwumbɔr bui ke, “Titunwanbirdam aa kpa nsuudoon.”