Aisaya 47 - Uwumbɔr aagbaŋ

Babiloŋ aabɔjil

¹ Uwumbɔr bui ke, “Babiloŋ aatiŋ, sunn ni saabɔrjal pu, ki nan kal kitiŋ, titan ni. N‑yoonn mubaa aa nan naahn upii u kaa nyi uja na la, kitiŋ ki ubaa aa kee nyaŋ ki na, le dandana ma, saa ki pɔɔn, kaa ki ŋan mu. Aa gur ye unaagbiipii la.

² Chuu labr kinaak ngbaan. Nan n‑yon. Chuu nyan saah di likekeln li bii aanimbil wɔb na. Chuu gbabr saakekenyaan ngbaan. Chuu kuun saawando mam ki puur ikpen.

³ Binib ga kan saah chuun aaŋmeen pu na; bi ga kan ke bi jinn si inimɔɔn ki sunn si taab. M mu ga giin si mbiin mu aa ŋa mi na, le ubaa aan ŋmaa bui mi ke m di cha si.”

⁴ Israel yaab Aawumbɔr u bi chain na le gaal timi lir. Waayimbil le ye ke Uwumbɔr Mpɔɔnsakpiindaan.

⁵ Uwumbɔr bui Babiloŋ aatiŋ ke, “Kal suuna mbɔmbɔɔn ni, ubaa aan ki yin si ke ŋitimbol mɔmɔk aapiibɔr.

⁶ M nan gee liŋuul maanib pu; ki ŋa bi ke baa kaa ye maanib le na: M nan di bi ŋa saapɔɔn ni, le saa san bi kinimbaak; hali aa nan muk binib bi por na.

⁷ Aa nan dak ke aa ga li ye upiibɔr le n‑yoonn mɔmɔk, kaa di tibaa ŋa aasui ni, kaa dakl lik naah ga nan doo pu na.

⁸ Li pel nimina, sin u gee mmɔɔn sakpen na, sin u dak ke aa pɔɔ ki ŋmar na. Aa bui ke aa kpa mpɔɔn ke Uwumbɔr na, ke ubaa aa ki bi ke sin na. Aa nan dak ke saan ŋa ukpopii daalbaadaal, kaan lann mbim.

⁹ Naan yunn, liwinbaal le aa ga lann tiwan nilee ngbaan mɔmɔk. Hali saah kpa inyɔk i na aan ter si, le aa ga lann chal ni mbim mɔmɔk.

¹⁰ Aa nan dak ke aa ŋmar saatunwanbir ni a; aa nan nyi ke ubaa aan kan si. Saalan ni saachiin le ŋmann si koon timoor ni, le aa bui aabaa ke, ‘M ye Uwumbɔr la, ubaa aa ki bi ke min na.’

¹¹ Tibɔbir ga dan aa pu, le saanyɔk ngbaan mubaa aan ŋmaa kiir ti. Nfum mubaa le tibɔbir ga lir ni aa pu, tibɔbir ti saa kee dakl ti pu daalbaadaal na le ga lir aa pu.

¹² Li joo saanyɔk mɔmɔk, ki chaa bibɔɔb chee; saah fii ubo pu na le aa nan ŋani kina. Nibaakan, ni ga ŋmaa ter si siib; nibaakan, aa ga ŋmaa faan saadim.

¹³ Hali saah kani nsurm mumɔk na, saa kpa mpɔɔn mubaa. Cha saanib bi lik iŋmabi ki buu tibɔɔr na dan ki nan gaa si lii, bima le bui ke bi ye binib bi bae iŋmabi, ki nyi kitaapaak aapepel mɔmɔk, ki tuk si uŋmal ki ti saa uŋmal tiwan ni ga ŋa si na.

¹⁴ Bi ga li bi ke tigbengbir na la, le mmii ga wu ti. Baan ŋmaa gaa bibaa lii, imiigaal ngbaan ga li ton bi chee sakpen, naan li ye mmii mu ton pulpul aan bi wor mu na.

¹⁵ Binib bi lik iŋmabi ki buu tibɔɔr aan aa di aabaa tii bi saamɔfal mɔmɔk ni na aan ŋmaa ter si. Bi ga san ki buen baah nyi nin chee na ki cha si, hali bi ponn ni ubaa aan gur ke u gaa si lii.”