Aisaya 45 - Uwumbɔr aagbaŋ

Uwumbɔr lee ubɔrkpaan Sairus

¹ Uwumbɔr lee Sairus ke u ŋa u ubɔrkpaan. U lee u ke u to butɔb ki nyaŋ ŋitimbol; u tun u ke u ti nyan bibɔrb baanaan ni; Uwumbɔr le ga piir ntisakpem aabisamɔi tii u. Uma Uwumbɔr bui Sairus ke,

² “Min mbaa le ga toor saasan tii si, m ga ber ŋijoo ni ŋigongon ŋi ŋa taar. M ga kool baah di tikur ŋa ibisamɔi i na mɔmɔk.

³ M ga nyan ni liwangol mbɔmbɔɔn ni ki nan tii si, le aa bee ke min le sil ye Uwumbɔr, ki bee ke Israel yaab Aawumbɔr ngbaan le yin si ke Sairus.

⁴ M lee si ke aa ter maatutunn Israel aanibol, binib bi m lee bi na. Saa nyi mi, le m lee si ki cha aa kan kipak ni nnyuŋ.

⁵ Min le ye Uwumbɔr, uken aa ki bi. Saa nyi mi; m mu tee ga tii si mpɔɔn mu aa ban na.

⁶ M ga ŋa kina ki cha dulnyaa mɔmɔk aanib bee ke min le ye Uwumbɔr, ke uken aa ki bi.

⁷ Min le naan nwiihn ni mbɔmbɔɔn mu; min le joo ni tinyoor ni tibɔbir mu. Min Uwumbɔr le ŋani nimina mɔmɔk.

⁸ M ga cha linyaŋ nyan ni kitaapaak ke ntaanyun na; le kitiŋ ga waar kimɔb ki gaa, le ki kpaln lifuur ni ibamɔn ŋmeen. Min Uwumbɔr ga cha nimina ŋa.”

Uwumbɔr le ye u naani tiwan mɔmɔk na

⁹ Tiyakr aabuul li bi ke ŋibuu ŋiken na ga ŋmaa kpak uyakmaal kinikpakpak aa? Tiyakr aan ŋmaa baa uyakmaal ke u bi ŋani ba? Libuul aan ŋmaa bui unii u maa li na ke waa nyi nibaa.

¹⁰ Ŋma ga ŋmaa baa ute ni una ke, “Ba ŋa ni ŋa mi kina?”

¹¹ Uwumbɔr u ye Israel yaab Aadindaan u bi chain ki ŋani n‑yoonn mu laa choo na waah gee pu na bui ke: “Naa kpa nsan ke ni baa mi maabim aabɔr, bee ni tuk mi maah ga ŋa pu na.

¹² Min le naan kitiŋ kee, le ki naan unibɔn ke u li bi ki pu. Mbaa aapɔɔn pu le m di daa taln kitaapaak; min le mɔk nwiin, ni uŋmal, ni iŋmabi naah ga ŋa pu na.

¹³ Min mbaa le pɔɔk ubɔrkpaan Sairus aataakpab ke u tun maatuln ki cha tiwan mɔmɔk sil chob. M ga naar isan imɔk u chuun i pu aan i gɔr na. U ga gir maa maatiŋ Jerusalem, ki gaa maanib lii. Ubaa aa tii u ipiin ke u di tun lituln limina.” Uwumbɔr Mpɔɔnsakpiindaan le len kina.

¹⁴ Uwumbɔr bui Israel yaab ke, “Ijipt ni Kus aatim aawangol ga kpaln nimi yaan la, le Seba aatiŋ aajab bi fɔk sakpen na ga ŋa nimi aanaagbiib; ni ga di tikululn le di dar bi buen. Bi ga gbaan ninimbiin ni le ki gaŋ nimi ki bui ke, ‘Uwumbɔr bi ni chee, uma baanja le ye Uwumbɔr.

¹⁵ Israel yaab Aawumbɔr u gaal waanib lir na, u ye Uwumbɔr u bɔrni ubaa pu na la.

¹⁶ Binib bi naani ŋiwaa na ga ji inimɔɔn; bi mɔmɔk ga ji inimɔɔn.

¹⁷ Le Uwumbɔr gaa Israel yaab ma lii, le Israel yaab aanyaŋ aan li kpa ndoon; Israel aanib aan ji inimɔɔn daalbaadaal.’”

¹⁸ Uwumbɔr le naan kitaapaak, uma baanja le ye Uwumbɔr. Uma le ŋaŋ ki naan kitiŋ kee, u ŋa ki ki pɔɔ ki ga yunn pam. Waa nan ŋa ki kitiŋ ki bi yɔli kaa kpa nibaa na. U nan ŋa ki ke nin chee binib ga li koo na la. Uma le len ke, “Min le ye Uwumbɔr, uken aa ki bi ki kpee m pu.

¹⁹ Maa bɔrni ki len maabɔr, kaa joo maah ban m ŋa pu na mu bɔrni. Maa nan ban ke Israel yaab lik ban mi, kitiŋ ki kaa kpa nibaa na ni. Min le ye Uwumbɔr, le ki len ibamɔn; m cha ibamɔn nya mpaan pu.”

Dulnyaa Aawumbɔr ni Babiloŋ aawaa

²⁰ Uwumbɔr bui ke, “Kuun ni man tɔb chee, nimi ŋitimbol mɔk aanib; nimi bi ga ŋmar litimbiil ngbaan aalirm ni na; li joo ni man nibaa aan bi nan ji nimi tibɔr. Binib bi kuun ŋiwaa ŋi bi di isui kpii ŋi na, ki dooni ŋiwaa ŋi kaan ŋmaa gaa bi lii na, binib ngbaan aa nyi nibaa kpala.

²¹ Dan man ki nan di nimi aabɔr bil bibɔjirb chee; ki cha binib bi si nipuwɔb na kpokl tɔb. Ŋma nan len n‑yaayoonn na tiwan ni ga ŋa na? Naa nan ye min Uwumbɔr aa? Min le ye Uwumbɔr u ŋan ki gaal waanib lir na. Uken aa ki bi.

²² Nimi binib bi mɔmɔk bi dulnyaa wee ni na, fenn gir ni m chee dandana aan ki ŋmar man. Min baanja le ye Uwumbɔr u bi na.

²³ Maah puu tipuur ti na gbii, kaan kpeln daalbaadaal. M sil puu mbaa pu ke: Unibɔn mɔmɔk ga dan nan gbaan nnimbiin ni, ki puu ke waan nyan mpuwɔb daalbaadaal.

²⁴ Bi ga len ke min baanja pu le unii ga ŋmaa kan linyaŋ ni mpɔɔn; le bimɔk gee m pu liŋuul na ga ji inimɔɔn.

²⁵ Min Uwumbɔr ga gaa Israel aayaabitiib mɔmɔk lii, le bi ga tii mi kipak.