Aisaya 44 - Uwumbɔr aagbaŋ

Uwumbɔr baanja le bi

¹ Uwumbɔr bui ke, “Maatutunn Israel aanibol, Jakob aayaabitiib bi m lee bi na, li pel dandana man.

² Min le ye Uwumbɔr u naan nimi na; ki nyan bundaal bi ma nimi na, le m nan piin ki ter nimi. Taa san ijawaan man, nimi le ye maatutum, maanib bi m lee bi ki gee bi na.

³ M ga tii kitiŋ ki kuun na nnyun, ki cha ibun puu kitiŋ ki kuur na pu. M ga di Maafuur Nyaan gbiin nimi aabim, ki ŋa mmɔɔnyunsɔm ŋa niyaabitiib pu.

⁴ Bi ga pɔr ke timoor ti kani nnyun mbamɔm na, ki naahn ibun i puu na aakpeeyook aasub la.

⁵ Binib ga dan ubaabaa ki nan bui ke, ‘M ye Uwumbɔr yoo la.’ Bi ga dan nan kpaan Israel yaab chee. Bi mɔmɔk ga ŋmee Uwumbɔr aayimbil paan biŋaal pu, ki li yin bibaa ke bi ye Uwumbɔr aanib la.”

⁶ Uwumbɔr u joo ki kii Israel yaab na, Uwumbɔr Mpɔɔnsakpiindaan kpa tibɔr tee u len ke: “Min le ye mpiin ngbaan ni ndoon ngbaan, min baanja le ye Uwumbɔr; Uwumbɔr uken aa ki bi ki kpee m pu.

⁷ Ŋma mu ki ga ŋmaa ŋa maah ŋa pu na? Ŋma ga ŋmaa bui binib tiwan ni ga ŋa na ki nyan mpiin ki ti saa ndoon aayoonn?

⁸ Maanib, taa san ijawaan man; ki nyan n‑yaajayoonn ki nan saa dandana wee na, m nan puun len tiwan ni ga ŋa na, le nimi le ye maaseeraadam. Uwumbɔr uken ki bi ii? Uwumbɔr uken ki bi ki pɔɔ sakpen aan maa kee ŋun u pu uu?”

Ŋiwaa kpa tilaar

⁹ Binib bimɔk naani ŋiwaa na aa kpa tinyoor tibaa, le ŋiwaa ŋi mu bi naan ŋi na ye fam. Binib bi dooni ŋiwaa ngbaan na ye bijoom le kaa nyi nibaa, le ki ga nan ji inimɔɔn.

¹⁰ Naa ŋan ke aa di tikur naan tiwan ki ki dooni ni ke ni ye Uwumbɔr la.

¹¹ Unii umɔk dooni li na ga nan ji inimɔɔn la. Binib bi naani ŋiwaa na po ye binibɔm la, kaa jer unibɔn. Cha bi dan man libɔjil ni, nima chee bi ga nan ji inimɔɔn, le ijawaan chuu bi.

¹² Uchaa ga yoor tikur le ki di pu mmii ni, le ki di uŋaal mu pɔɔ na yoor lichaaŋmiln ki di gbaa ti ŋa waah ban tiwan ni na. Buyoonn u bi tun kina na, nkon ni nnyunyuu chur u, le u ti bak.

¹³ Ukpikpiir ga ŋaŋ waadɔgeln, le ki di linaakumbɔln naan tiwan ni u ban na, ki di waachɔk kpii ni, ki kpii ni ke unibɔn nyaan na, ke u di siin udo.

¹⁴ Nibaakan u ga gaa santina, bee likpaln, bee lisalaasiil aasub kichook ni. Nibaakan u ga ŋum busub bu bi yin bu ke ukpasanja na le ki kiir buyoonn utaal ga nu aan bu muun na.

¹⁵ Unii ga di busub aageln libaa tuur mmii, ki di ligeln liken naan liwaal. U ga di ligeln libaa tuur mmii ke u wor ki ga ŋmaa di ŋa tijikaar, le ki di ligeln liken ŋa liwaal ki dooni li.

¹⁶ U ga di ndɔ aageln di tuur mmii; u ga pu tinann mmii ngbaan pu, ki ŋmɔ ti, le ni mɔ u. U wor mmii ngbaan ki ga bui ke, “Mmii aah ton purr pu na, mmii aah mɔ pu na.”

¹⁷ Le ndɔ ngbaan aageln li gur na u di naan liwaal, le ki gbaan ki doon li. U ga mee li ki bui ke, “Sin le ye maawumbɔr, gaa mi lii.”

¹⁸ Kina aanib jɔr sakpen kaa ŋmaa beer baah bi ŋani tiwan ni na. Bi ŋumni binimbil, kaa ban ke baalandak ŋun mbamɔn.

¹⁹ Unii u naani ŋiwaa na aa kpa nlan, kaan ŋmaa len ke, “M di ndɔ ngbaan aageln ŋa mmii ni, ke m di mu aamii ŋa tijikaar ki pun tinann mu pu ki ŋman, le ki di ligeln li gur na ŋa liwaal lee, le ki gbaan lidɔgeln aanimbiin ni.”

²⁰ Nimina ni unii aah ga moo nfatan pu na ye tiwan nibaa la. Waajɔrk aalandak ngbaan ŋmann u sakpen le ubaa aan ki ŋmaa sur u. Waan kii ke liwaal li u joo uŋaal ponn ni na aa ye Uwumbɔr kpala.

Uwumbɔr u naan tiwan mɔmɔk na le gaal binib lir

²¹ Uwumbɔr bui ke, “Israel aanibol, teer nimina: teer ke aa ye maatutunn la. Min le naan si ke aa li ye maatutunn, le maan suln saabɔr daalbaadaal.

²² Israel yaab, m ŋar nimi aatunwanbir ŋŋaan ke ntaalangbam aah san jer pu na. Gir ni m chee man; min le ye u gaal nimi lir na.”

²³ Nimi kitaapaak yaab, li tar ni mpopiin pu man. Nimi kitiŋ yaab, teen mpɔɔn pu man. Ŋijoo ni isui imɔk bi kichook ni na, di mpopiin teen mpɔɔn pu man. Uwumbɔr mɔk waapɔɔn ki gaa waanib Israel yaab lii.

²⁴ “Min le ye Uwumbɔr u gaal nimi lir na. Min le naan nimi. Min le ye Uwumbɔr u naan tiwan mɔmɔk na. Min baanja le daa taln kitaapaak; maah nan naan kitiŋ kee na, ubaa aa nan ter mi.

²⁵ M ŋani bibɔɔb bijɔrb, ki cha baabɔr ti bi len ke ti ga ŋa na beer fam. M yii binimbiwolm aalan, ki mɔk ke baalan ye kijɔrk la.

²⁶ Le maatutunn ma yaa len ke tiwan ni ga ŋa na kan, bee m yaa ti ki tun ni maatuun ke u nan kpiir maalandak tuk binib kan, m cha ilandak ngbaan ni tibɔr ngbaan gbiini la. M tuk Jerusalem ke binib ga ki gir koo ni ki ponn ni, ki ga gir maa Juda aatisakpem na mɔmɔk. Ntisakpem ngbaan ga fii nyan ni mu aah nan ber pu na ni.

²⁷ Maamɔb aamɔboln le m ga di foor nnyusakpem.

²⁸ Le m ga bui ubɔrkpaan Sairus ke, ‘Sin le ga joo maanib; aa ga ŋa maah ban ke aa ŋa pu na: aa ga cha bi ki gir maa Jerusalem, ni Maadichal aadinyikl mu.’”