Aisaya 43 - Uwumbɔr aagbaŋ

Uwumbɔr puu ke u ga gaa waanib lii

¹ Israel yaab, Uwumbɔr u naan nimi na bui ke, “Taa san ijawaan man, m ga gaa nimi lii. Min le yin nimi, nimi aayimbil, ni ye maanib la.

² Ni yaa chuun nnyun mu nyoo na ni kan, m ga li bi ni chee; nimi aafalaa aan nyaŋ nimi. Ni yaa koo mmii ni kan, mu aan see nimi; ntɔŋ mumɔk choo ni chee ki pɔɔ na aan nyaŋ nimi,

³ ba pu? min le ye nimi Israel yaab Aadindaan Uwumbɔr u bi chain, ki gaal nimi lir na. M ga di Ijipt yaab pa ki gaa nimi lii. M ga di Kus ni Seba yaab pa ki gaa nimi lii.

⁴ M ga di ŋitimbol mɔmɔk pa ki gaa nimi lii, ba pu? ni ye liwangol le m chee, le m gee nimi, ki nyuŋ nimi.

⁵ Taa san ijawaan man, m bi ni chee. Ki nya liwipuul ki ti saa liwilir li bi dandar na, m ga giin nimi aanib kun ni linampal.

⁶ M ga bui ŋŋangan wɔb yaab ke bi cha bi li cha, ki bui ŋŋangii wɔb yaab ke bi taa leŋ bi nsan. Cha maanib nya dandar aatim ni ki gir ni, bi nya ni dulnyaa wee aapepel mɔmɔk ni.

⁷ Bi ye maanib la, le m naan bi ke bi tii mi kipak.”

Israel yaab le ye Uwumbɔr aaseeraadam

⁸ Uwumbɔr bui ke, “Kuun ni maanib libɔjil ni man. Bi kpa ŋinimbil, le ki mu tee jɔb; bi kpa ŋitafal, le ki mu tee kpaa.

⁹ Kuun ŋitimbol mɔmɔk dan libɔjil ngbaan ni. Baawaal lilaliba ga ŋmaa mɔk tiwan ni ga ŋa n‑yoonn mu choo na? Lilawaal nan len tiwan ni bi ŋani na aabɔr? Cha ŋiwaa ngbaan li joo ni ŋaaseeraadam bi nan mɔk ke bi kpa mbamɔn, bi nan sil ke ŋaabɔr sil ye ibamɔn.

¹⁰ Israel aanib, nimi le ye maaseeraadam; m nan lee nimi ke ni li ye maatutum, aan ni li nyi mi ki gaa mi ki kii, ki bee ke min baanja le ye Uwumbɔr. Uwumbɔr ubaa aa ki bi ki kpee m pu, ubaa aa nan bi, ki mu aan ki li bi.

¹¹ Min baanja le ye Uwumbɔr. Min baanja le ga ŋmaa gaa nimi lii.

¹² M nan len tiwan ni ga ŋa na, le ki dan nan ter nimi. Liwaal libaa aa kee ŋa kina; nimi le ye maaseeraadam.

¹³ M ye Uwumbɔr la, ki ga li ye kina n‑yoonn mɔmɔk. Ubaa aan ŋmar maapɔɔn chee; ubaa aan ŋmaa kpeln maah ban m ŋa pu na.”

Israel yaab ŋmar Babiloŋ yaab chee

¹⁴ Israel yaab Aadindaan Uwumbɔr u bi chain ki gaal nimi lir na bui ke, “Waahr aan m gaa nimi lii na, m ga tun bijab bi ti tak Babiloŋ aatiŋ; m ga gbaa wii kitiŋ ngbaan aabisamɔi aajaaleŋ tiib, le kaanib aafuuk ga kpaln iwiil.

¹⁵ Min le ye Nidindaan Uwumbɔr u bi chain na. Min le naan nimi Israel yaab, ki ye nimi aabɔrkpaan.”

¹⁶ N‑yoonn mu jer ki yunn na, Uwumbɔr nan naan nsan nnyusakpem ponn ni, u nan naan kisanbik nnyun mu puu mala mala na ni.

¹⁷ U nan cha bijab bi to butɔb na bee nkun ni, bijab bi nan kpa itaan ni itaan aatɔroku tiib na. Bi nan lir kitiŋ kaan ki fii kpala, bimɔfal nan junn kolb ke ulangbinja aamii na.

¹⁸ Le Uwumbɔr bui ke, “Taa ka joo man n‑yoonn mu jer na aabɔr bee ni li ka taa baa n‑yaayoonn na aawan ni nan ŋa na pu.

¹⁹ Li lik ban man tiwapɔnn ni m laa ban m ŋa na. Ni piin ki bi ŋani, ni ga ŋmaa kan ni dandana. M ga naan nsan nteersakpiin ni, ki tii nimi ibun i kpa nnyun na nima.

²⁰ Hali tipeewanbir ga nyuŋ mi buyoonn m cha ŋimɔɔ puu nteer pu ke maanib bi m lee bi na kan nnyun ki nyu na, ikakal ni taataa tiib ga pak mi.

²¹ Bima le ye binib bi m naan ki di tii mbaa na, le bi ga gaa ilahn ki pak mi.”

Israel yaab aatunwanbir

²² Uwumbɔr bui ke, “Israel yaab, ni nan nuur mi, naa nan dooni mi.

²³ Naa nan kɔr ipiih ki di see mmii ni tii mi; naa nan joo nimi aatork nyuŋni mi. Maa nan muk nimi ke ni tii mi ipiin aatork kibaa, kaa cha nilaasaab ti nyan nibaa ni tulalee aayon pu.

²⁴ Naa nan daa tulalee aayon tii mi, kaa nan di nimi aawakor aakpan tii mi. Naah nan tee tii mi tiwan ni na le ye nimi aatunwanbir; ni nan cha nlaasaab ti nyan mbaa ni nimi aatunwanbir ti ni tun na pu.

²⁵ Nee aapuwɔb na, min le ye Uwumbɔr u joo cha pinni nimi, nimi aatunwanbir na; le m ŋani nimina maabimbinyaan pu. Maa daa nitafal nimi aatunwanbir pu.

²⁶ Cha ti buen libɔjil man; li joo ni nimi aabɔr man. Li joo ni nimi aabɔr ti ga mɔk ke ni kpa mbamɔn na man.

²⁷ Niyaaja Adam nan tun titunwanbir; le nimi aaninkpiib tun mi titunwanbir,

²⁸ le binib bi joo nimi aatim na bii Maadichal. Kina pu le m bii nimi Israel yaab; ki cha bi seei nimi maanib ngbaan.”