Aisaya 42 - Uwumbɔr aagbaŋ

Uwumbɔr aatutunn

¹ Uwumbɔr bui ke, “Maatutunn u m pɔɔk utaakpab na sɔ: Uma le m lee u, le u gbiin nnimbil. M di Maafuur Nyaan gbiin u, le u ga joo ni ibamɔn nan tii ŋinibol mɔmɔk.

² Waan li tar, kaan li kaani, kaan li kpa kifuuk ntim ni.

³ Waan koo lidabil li boo na, kaan junn karyaa u kaa wiin mbamɔm na mu. U ga joo ni ibamɔn i kaan doo na.

⁴ Utaakpab aan yɔl le u ga li kpa limakl; uma le ga siin ibamɔn kitiŋ kee pu. Ŋitimbol ŋi bi dandar na ka ki kii waamɔkm.”

⁵ Uwumbɔr le nan naan kitaapaak ki daa taln ki; u nan naan kitiŋ ni nimɔk bi ki ponn ni na; Uma ubaa le tii binib mɔmɔk limɔfal, ni libuln li ti fuur na. Le dandana wee Tidindaan Uwumbɔr bui waatutunn ke,

⁶ “Min Uwumbɔr le yin si ki tii si mpɔɔn ke aa cha ibamɔn dan dulnyaa wee ni. Sin pu le m ga puu tipuur tii binib mɔmɔk; sin pu le nwiihn ga dan ŋinibol mɔmɔk pu.

⁷ Aa ga likr bijoom aanimbil, ki nyan binib bi bi mbɔmbɔɔn ni, tiyondir ni na lii ni nwiihn ni.

⁸ Min baanja le ye Nidindaan Uwumbɔr. M ni liwaal libaa aan ŋmaa kpaan maapak; Maan yakr maah kpa kipak ki na tii liwaal libaa.

⁹ Maah nan bui ke tiwan nimɔk ga ŋa na gbiin kina. Dandana m ga bui si tiwapɔnn ni ga ŋa na waahr aan ni nin piin ki bi ŋani.”

Kipak aalahn

¹⁰ Gaa nlahnpɔɔn ki tii Uwumbɔr man; dulnyaa aanib mɔmɔk, gaa ki pak u man. Nimi bi bi iŋɔsakpiin ponn ni, nnyusakpem pu na, pak u man; nimi tiwanfuurkaan ni mɔmɔk bi nnyusakpem ni na, pak u man. Nimi bi mɔmɔk bi ntim mu bi dandar na, gaa ilahn ki pak u man.

¹¹ Cha nteersakpiin pu, ni ntim mu bi nima na aanib pak Uwumbɔr; cha Kedar aanib pak u. Cha binib bi koo Sela aatisakpeŋ ni na li tar ŋijoo paab ni mpopiin.

¹² Cha binib bi koo ntim mu bi dandar na tii Uwumbɔr kipak ni kinyuŋ.

¹³ Uwumbɔr ga jan ke upobidaan na; u gor ki jek ban butɔb la. U faa nkuun, nkuun mu ye butɔb aakuun na, u mɔk waadim waapɔɔn.

Uwumbɔr puu ke u ga ter waanib

¹⁴ Uwumbɔr bui ke, “Ni yunn pam maa gar tibɔr; maa nan gar maanib, le dandana, n‑yoonn fuu ni ke m fii sil; m wii ke imalween aah joo upii kan, u wii pu na.

¹⁵ M ga ber ŋigongon ni ŋijoo mɔmɔk ki cha timoor ni isui mu kuur. M ga di nnyun aafatann kpaln nteer ki cha tibɔr mu aanyun foor.

¹⁶ M ga loln maanib bi jɔb na pu isan i ni baa kee dii i na. M ga cha baabɔmbɔɔn kpaln nwiihn ki cha ŋitingbaln ŋi kaa joon na jɔŋ aan bi dii jer. Maah puu tipuur ti na le bi na, le m ga li joo ti, kaan bii ti.

¹⁷ Binib bimɔk tii ŋiwaa naadii na, binib bi yin tiwan ni bi di biŋaal naan na baawaa na, ga ji inimɔɔn sakpen.”

Israel yaab yii, kaa bae mbaem

¹⁸ Uwumbɔr bui ke, “Li pel man, nimi binib bi aatafal kpaa na. Nimi binib bi jɔb na, moo lik mbamɔm man.

¹⁹ Ubaa ki bi ki jɔb jer maatutunn aa? Ubaa kpaa jer maatuun mu m tun na aa?

²⁰ Israel yaab, ni kan tiwan pam, le ni mu aa kpa ni chee tataa. Ni kpa ŋitafal ni li joo ŋun, tɔ, ni sil di ŋitafal ngbaan ŋun ba?”

²¹ Uwumbɔr gee ke u gaal binib lir la, kina pu le u cha waakaal ni waamɔkm kpa kipak, ki nan ban ke waanib nyuŋ i.

²² Le dandana bi sun waanib aawan mpɔɔn; bi laŋ bi ibuu ni, ki di bi bɔr tiyondir ni. Bi sun bi nnaayupɔɔn, le ubaa aa bi u gaa bi lii.

²³ Ni ponn ni, ŋma ga pel tibɔr tee? Ki nyan din ki joo cha, ni ga li gur pel mbamɔm aa?

²⁴ Ŋma nan di Israel aanib tii binib bi gaa baawan mpɔɔn na? Uwumbɔr ubaa, u ti tun u titunwanbir na, le nan ŋa kina. Taa bi ke waah nan ban ke ti li bi pu na, kaa dii ikaal i u tii timi na.

²⁵ Kina pu le u cha ti kan waaŋuul aah pɔɔ pu na, ki cha ti jin butɔb aafalaa. Waaŋuul wu ke mmii na le Israel aatim ni, le taa nan bee tiwan ni bi ŋani na; taa nan bae nibaa ni ponn ni.