Aisaya 41 - Uwumbɔr aagbaŋ

Uwumbɔr bui Israel yaab ke bi taa san ijawaan

¹ Uwumbɔr bui ke, “Nimi ntim mu bi dandar na aanib, ŋmin man aan ki li pelni m chee. Gor man nibaa ki di nimi aabɔr buen libɔjil ni; ni ga kan nsan ki len nimi aabamɔn. Cha ti kal ki kpokl ki lik man u kpa mbamɔn na.

² Ŋma nan joo ni ubɔrkpaan u nyan ni liwipuul wɔb ki cha u nyaŋ binib bimɔk u ni bi jan na? Ŋma cha u nyaŋni bibɔrb ni ŋitimbol? Waajaak aajuk nan bii binib ke naah ye kitangbaak le u per lir na. Waapiin nan cha bi san yaa tɔb chee ke libuln aah daar timoor yaani tɔb chee pu na.

³ U san dii bi, kaa kani tibɔbir tibaa; u nan san mala sakpen, le ni naahn ke waah fiir paacham le na.

⁴ Ŋma nan cha nimina ŋa? Ŋma mɔk tibɔkpokr ti nan ŋa na taah ga ŋa pu na? Min Uwumbɔr le nan ŋa kina. Min Uwumbɔr le nan bi mpiin ngbaan, ki ga nan ki li bi ndoon mu.

⁵ Binib bi bi ntim mu bi dandar ni na kan maah ŋa pu na, le ijawaan chuu bi, le biwon gbaa. Le bi mɔmɔk kuun tɔb chee.

⁶ Biwanŋam ter tɔb ki pɔɔk tɔb aataakpab.

⁷ Biwankpiib pak bichaab ke, ‘Ni pɔɔn nibaa.’ Uja u naan liwaal na pɔɔni unii u ga buu li na aataakpab la. Bi ga len ke, ‘Saah buu pu na ŋan,’ le bi di litaln poo li pu mbamɔm.

⁸ Le nimi maatutum Israel yaab, ni ye binib bi m lee bi na la, njɔ Abraham aayaabitiib.

⁹ M nyan ni nimi kitiŋ aanaanmɔk; M yin nimi ki nyan ni kitiŋ aalɔlɔnn mɔmɔk ti bi ni daa na ki bui nimi ke, ‘Ni ye maatutum la.’ Maa yii nimi, le ki lee nimi.

¹⁰ Taa san ijawaan man. M bi ni chee. Min le ye nimi Aawumbɔr, taa cha nibaa faan nimi man. M ga tii nimi mpɔɔn ki ter nimi; m ga li kii nimi ki nyan nimi tibɔr ni.

¹¹ Binib bi gee ni pu liŋuul na ga ji inimɔɔn, baah ga lir pu na. Binib bi jaa nimi kijaak na ga kpo,

¹² ki kuln kitiŋ kee pu kookoo.

¹³ Min le ye Nidindaan Uwumbɔr; M pɔɔk nitaakpab ki bui ke, ‘Taa san ijawaan man; m ga ter nimi.’”

¹⁴ Uwumbɔr bui ke, “Israel yaab, naah par kaa ki kpa mpɔɔn mu pu na, taa san man ijawaan, m ga ter nimi. Min, u ye nimi Israel yaab Aawumbɔr u bi chain na, min le ye u gaal nimi lir na.

¹⁵ M ga ŋa nimi ke lidipoidabil li laa soon ki nyuun na la. Ni ga poi ŋijoo ki doo ŋi; ŋigongon ga wii ki kpaln kitangbaak.

¹⁶ Ni ga di ki mee yaa paacham; le libuln ga daa ki buen, le kitaabuŋ daa ki yaa. Le ni ga mɔɔr nimi ke min le ye nimi Aawumbɔr; ni ga pak mi, nimi Israel yaab Aawumbɔr u bi chain na.

¹⁷ Buyoonn bigiim bi kaa kpa nibaa na ban nnyun kaa kan na, aan nnyunyuu joo bi na, le bineen kuur, n‑yoonn ngbaan le min Uwumbɔr ga kii baameel; min, Israel yaab Aawumbɔr, aan san cha bi.

¹⁸ M ga cha ŋimɔɔ puu ŋigongon ŋi pu aa nan kpa nibaa na, aan inyunbun mu puu ŋifatan ni. M ga cha nteersakpiin pu kpaln tibɔr ŋmeen, aan kitiŋ nin chee aa nan kpa nnyun na kpaln inyunbun i puu na.

¹⁹ M ga cha santina aasui punn nteersakpiin pu, ki cha isui i ŋan na, ni olif aakpan aasui muun nima. Kitiŋ kee pu nin chee aa nan kpa nibaa na ga kpaln kichook ki kpa isui sakpiin i ŋan ki pɔɔ na.

²⁰ Binib ga kan nimina le ki bee ke min Uwumbɔr le ŋa kina. Nima chee le bi ga bee ke Israel yaab Aawumbɔr u bi chain na le cha ni ŋa.”

Uwumbɔr aah kpak ŋiwaa kinikpakpak pu na

²¹ Uwumbɔr u ye Israel yaab aabɔrkpaan na kpa tibɔr timina u len: “Nimi ŋitimbol ngbaan aawaa, li joo ni man nimi aabɔr. Li joo ni man nimi aanikpakpak ki ni dak ke ki ŋan na.

²² Dan do ki nan buu tibɔɔr ki len budabu ga ŋa na, aan ni yaa nan ŋa kan, ti li nyi. Bui bibɔjirb tiwan ni nan ŋa n‑yoonn mu jer na man, ki tuk timi naatataa.

²³ Bui timi n‑yoonn mu choo na aah ga joo ni pu na, aan ti li nyi ki bee ke ni sil ye ŋiwaa. Ŋa nibaa ni li ŋan, bee tiwan ni ga joo ni tibɔbir na; mɔk timi ijawaan ni lijinjiir aawan nibaa.

²⁴ Nimi, ni naah ŋani nimɔk na ye fam la; binib bi dooni nimi na ye tijɔŋ ŋmeen la.

²⁵ M lee uja u bi liwipuul wɔb na; m ga cha u nyan ni paacham wɔb ki nan tak nimi. U taar bitinjoob ŋmalni titan ni ke baah ye tikpakpar le na, ke uyakmaal aah nyani tiyakr pu na.

²⁶ Ni ponn ni ŋma nan buu tibɔɔr ki len ke nimina ga ŋa, aan ti bui ke ni kpa mbamɔn? Ni ponn ni ubaa aa nan waar umɔb ki len libɔbil libaa; ubaa aa ŋun ni len tibaa.

²⁷ Min Uwumbɔr le nan puen tuk Sionn yaab tibɔpɔnn ngbaan; M nan tun ntuun Jerusalem aatiŋ ni ke u ti len ke, ‘Saanib choo. Bi choo kun ni la.’

²⁸ Maah nan lik ŋiwaa ngbaan ponn ni na, libaa aa nan kpa tibaa li len; ŋi ponn ni libaa aa nan ŋman ki giin gar mbaan mu m nan baa na.

²⁹ Ŋiwaa ŋimina mɔmɔk ye yɔli la; ŋaan ŋmaa ŋa nibaa kpala. Ŋiwaa ŋimina ye fam la, kaa kpa mpɔɔn mubaa.”