Aisaya 40 - Uwumbɔr aagbaŋ

Ntaakpab pɔɔn aabɔr

¹ Uwumbɔr bui ke, “Sɔŋ maanib aasui, sɔŋ bisui man.

² Pɔɔk Jerusalem aanib aataakpab. Tuk bi ke bi jin falaa ni yunn sakpen a, le dandana m di baatunwanbir cha pinn bi, m daa bitafal ki ŋaŋ baatunwanbir.”

³ Unii ubaa bi ki tar ke, “Toor Uwumbɔr aasan nteersakpiin ni man, ki ŋa waasan mu li tok ki tii u.

⁴ Bi ga di titan gbiin tifatann mɔmɔk, ki ber ŋijoo ni ŋigongon mɔmɔk lii taab, ki ŋa isan imɔk kaa joon na, i li joon tii u.

⁵ Uwumbɔr aah kpa kipak sakpen pu na ga nya mpaan pu aan unibɔn mɔmɔk kan waapak ngbaan. Uwumbɔr ubaa le puu kina.”

⁶ Nneel mubaa tar ke, “Moon ti.” Le m baa ke, “M moon ba aabɔr?” Le mu gar ke, “Moon ke unibɔn mɔmɔk naahn mmopuun la; baa yunni ki jer mmopuun mu bi timoor ni na.

⁷ Buyoonn Uwumbɔr cha libuln daa timoor pu na, timoor ga yɔl, le mmopuun mu gbaar. Binib aa yunni ki jer timoor.

⁸ Mbamɔn, timoor yɔl, le mmopuun gbaar, Uwumbɔr aamɔbon ma aan jer kpala.”

⁹ Jerusalem yaab, buen lijool li fɔk na paab man ki ti moon tibɔnyaan ngbaan. Teen mpɔɔn pu ki len ke, Sionn aanib, moon tibɔnyaan ngbaan man. Len mpɔɔn pu ki taa san ijawaan man. Tuk Juda aatim aanib ke Uwumbɔr choo.

¹⁰ Tidindaan Uwumbɔr choo ke u nan di mpɔɔn joo waanib, ki joo ni binib bi u gaa bi lii na.

¹¹ U ga li joo waanib ke upihdaan aah joo waapiih pu na la; u ga kuun ipihbi nan kpaan tɔb chee, ki yoor i uŋaal ni, ki ga loln inatiib pu nsan suuna.

Israel yaab Aawumbɔr u kaa kpa ŋeen aatɔ na

¹² Ŋma ga ŋmaa di uŋaapɔtan ŋaŋ nnyusakpem aanyun ki ti bee mu aaŋaŋ, bee u di uŋaal ŋaŋ kitaapaak? Ubaa ga ŋmaa di kitiŋ kee aatan mɔmɔk ŋa kiyinyook kibaa ni ii? Ubaa mu ga ŋmaa di tiwan ni bi joo ŋaŋni tiwan aah nyuun pu na ki di ŋaŋ ŋijoo ni ŋigongon aanyunyuun aa?

¹³ Ŋma ga ŋmaa tuk Uwumbɔr waah ga ŋa pu na? Ŋma ga ŋmaa mɔk u, bee u sur u?

¹⁴ Ŋma chee aan Uwumbɔr ga buen ti baa ke u bee tiwan aatataa, bee ki ti bae waah ga ŋa pu na?

¹⁵ Uwumbɔr ma chee kan, ŋitimbol aa ye nibaa, ŋaa fuu linyunbol libaa; ŋidik ŋi bi dandar na naahn kitangbaak la.

¹⁶ Lebanonn aachook ni aapeel mɔmɔk aan ŋeer bi di toor kitork tii timi Aawumbɔr, le kichook ngbaan aasui mu par i tuur kitork aamii.

¹⁷ Ŋitimbol ngbaan aa ye nibaa u chee.

¹⁸ Ti ga di Uwumbɔr ŋaŋ ŋma? Aa ga ŋa kinye ki mɔk waah bi pu na?

¹⁹ Waa bi ke liwaal li biwaadam naan na, bee bichaab aah di salmaa boon li aan ki di tikunabr ŋa litaa na.

²⁰ Uja u kaa kpa salmaa bee tikunabr na ga di busub bu kaan dur na naan li, le ki ban ukpikpiir u nyi sakpen na, le u kpii u liwaal li ga ŋmaa sil, kaan lir na.

²¹ Saa nyi ii? Baa nan tuk si n‑yoonn mu jer na aa? Saa kee ŋun dulnyaa wee aah nan piin pu na aa?

²² Uwumbɔr u ka waabɔrjal li bi paacham kitaapaak ni na le nan naan dulnyaa wee; binib bi bi taab na naahn inyann le u chee. U taln kitaapaak ke likekeln na la, ke baah ga ŋa likekeln aabool ki li koo li ponn ni pu na.

²³ U sunni bitinjoob bi pɔɔ sakpen na taab, le baa ki bi tibaa ni.

²⁴ Bi naahn tiwan ni laa punn, kaa kee kpa inyaan na la. Uwumbɔr yaa tun ni libuln kan, bi kuur la, le libuln daa bi buen ke likakl na.

²⁵ Ti ga di Uwumbɔr u bi chain na ŋaŋ ŋma? Ubaa ki bi ke uma na aa?

²⁶ Waan lik kitaapaak man. Ŋma naan iŋmabi i ni waa i na? U lolni i pu nsan ke bijab bi cha butɔb na la, ki nyi yaa wiir pu na, ki yin i mɔmɔk ni yaayimbil la. Waapɔɔn aah nyaŋ sakpen pu na, i ponn ni ubaa aa wɔŋni.

²⁷ Kina pu na, Israel yaab, ba ŋa ni dak ke Uwumbɔr aa nyi nimi aamuk bɔr? Ni dak ke ni yaa kaa kan nimi aabamɔn kan, utafal aa bi ni ni ii?

²⁸ Naa nyi ii? Naa kee ŋun aa? Uwumbɔr le ye Tidindaan u ga li bi n‑yoonn mu kaa kpa ndoon na; uma le naan dulnyaa mɔmɔk. Waa bakr kpala. Ubaa aa nyi waalandak.

²⁹ U pɔɔk binib bi bak aan biwon yɔl na aataakpab.

³⁰ Hali binib bi laa diin na aataakpab yɔl la, binachipɔm aawon ga yɔl;

³¹ le binib bima kpa limakl ke Uwumbɔr ga ter bi na ga kan ke bitaakpab moo pɔɔk la. Bi ga fii ke ŋikaagii na; bi ga san, kaan bak; bi ga chuun, le bitaakpab aan yɔl.