Aisaya 4 - Uwumbɔr aagbaŋ

¹ N‑yoonn ngbaan yaa nan fuu ni kan, bipiib bilole ga buen ti bub chuu ujabaan ki bui u ke, “Ti ga ŋmaa kpiin tibaa ki mu gbab tibaa, aa mu tee cha ti li yin si ke tichal, aan ki nya maakpayal aanimɔɔn ni.”

Jerusalem aah ga gir sil pu na

² N‑yoonn choo, le Uwumbɔr ga cha timoor ni isui imɔk bi kitiŋ ngbaan pu na muun ki li ŋan. Tijikaar ti ga ŋa kitiŋ ngbaan pu na ga tii Israel yaab bimɔk ŋmar na mpopiin ni limakl.

³ Binib bi Uwumbɔr lee bi, bi ŋmar ki bi Jerusalem na, bi ga li gur yin bi ke binib bi ye Uwumbɔr aanib na la.

⁴ Uwumbɔr aapɔɔn pu u ga ji linibol ngbaan tibɔr ki toor bi, ki finn nyan tibɔbir ni nsin mu nan kpir Jerusalem ponn ni na.

⁵ N‑yoonn ngbaan le Uwumbɔr ga tun ni ntaalangbam mu nan biin Sionn Aajool ni binib bimɔk kuun nima chee na nwiin pu, ki di iŋmanyuu ni mmiigaal mu wiin chain na biin bi pu kinyeek. Uwumbɔr aapak ki ye nwiihn na le ga biin ki kii kitiŋ ngbaan mɔmɔk.

⁶ Waapɔɔn ga tii kitiŋ ngbaan mboon, nwiin taa see ki, ki ŋa ki nin chee lifuur bi na, ni nin chee utaal ni kitaabuŋ aan ŋmaa koo na.