Aisaya 39 - Uwumbɔr aagbaŋ

Ituun i nan nyan ni Babiloŋ aatiŋ ni na aabɔr

¹ N‑yoonn mumina, le Babiloŋ aabɔrkpaan, Baladann aajapɔɔn u bi yin u ke Merodak Baladann na, ŋun ke ubɔrkpaan Hesekia dɔ bun, le u ban ipiin ki ŋmee kigbaŋ ki di tun u chee.

² Hesekia nan gaa bi, ki chann bi tichann, le ki mɔk bi waawangol: u nan mɔk bi waakunabr, ni waasalmaa, ni tikpin aawan, ni nkpan mu nun mɔ na, ni waajar aajawan mɔmɔk. Tiwan nibaa aa nan gur waadir ni, bee nibaa chee waanaan ni, aan waa mɔk bi.

³ Nee aapuwɔb le Uwumbɔr aabɔnabr Aisaya buen ubɔrkpaan Hesekia chee ki ti baa u ke, “Bijab ngbaan nyan ni la chee, bi len ke ba aa chee?” Hesekia nan giin kii u ke, “Bi nyan ni dandar la, bi nyan ni Babiloŋ aatiŋ ni la.”

⁴ “Bi kan ba libɔrdichal ni?” Hesekia bui ke, “Bi kan tiwan mɔmɔk. Tiwan nibaa aa gur tidir ni aan maa mɔk bi.”

⁵ Le Aisaya bui u ke, “Uwumbɔr Mpɔɔnsakpiindaan bui ke,

⁶ ‘N‑yoonn choo le tiwan nimɔk bi saabɔrchiln ni na, ni tiwan nimɔk aayaajatiib nan di bil ki nan saa din na mɔmɔk ga buen Babiloŋ aatiŋ ni. Nibaa aan gur.

⁷ Bi ga nan yoor sin aabaa aayaabitiib bibaa di buen Babiloŋ aatiŋ ni, aan ki ti lee bi, aan bi li tun lituln ubɔrkpaan ngbaan aadichal ni.’”

⁸ Ubɔrkpaan Hesekia nan dak ke tibɔr ngbaan aatataa le ye ke nsuudoon ga li bi waamɔfal aayoonn, le ki giin kii ke, “Uwumbɔr aah di tibɔr ti tii ni si na ŋan.”