Aisaya 38 - Uwumbɔr aagbaŋ

Ubɔrkpaan Hesekia aah nan buŋ ki ki pɔɔk pu na

¹ N‑yoonn mumina le ubɔrkpaan Hesekia nan buŋ ki ti gur siib u kpo. Uwumbɔr aabɔnabr Aisaya, u aate nan ye Amos na nan buen u ti mann u, le ki ti bui u ke, “Uwumbɔr bui ke, ‘Gor tiwan mɔmɔk, ba pu? saan ŋmar. Gor ki li kii nkun.’”

² Le Hesekia fenn unimbil toŋ lidigbimal ki mee Uwumbɔr ke;

³ “Uwumbɔr, teer ke m di gaakii tun saatuln ni kipak ŋmeen la, ki pɔɔni mbaa n‑yoonn mɔmɔk ke m ŋa saah ban ke m ŋa pu na,” le ki wii sakpen.

⁴ Le Uwumbɔr bui Aisaya

⁵ ke u gir buen Hesekia chee ki ti bui u ke, “Min Uwumbɔr, u ye aayaaja David Aawumbɔr na ŋun saameel, ki kan saanyunyunn; m ga di ŋibin kipiik ni ŋiŋmu kpee saamɔfal pu.

⁶ M ga gaa si ni Jerusalem aatiŋ kimina Asiria aabɔrkpaan ngbaan chee lii, ki ga li kii kitiŋ ngbaan n‑yoonn mɔmɔk.”

²¹ Le Aisaya bui ubɔrkpaan ngbaan ke u san likakaln aasubil ki di boon lichakpelar ngbaan aan u pɔɔk.

²² Le ubɔrkpaan Hesekia baa u ke, “Ba ga li ye limɔkl ki mɔk ke m ga pɔɔk ki ŋmaa buen Uwumbɔr Aadichal ni?”

⁷ Le Aisaya giin gar u ke, “Uwumbɔr ga tii si limɔkl li ga mɔk ke u ga ŋa waah puu tipuur ti na.

⁸ Ubɔrkpaan Ahas aah nan maa ŋibimbin ŋi bi taar ki jon na pu, Uwumbɔr ga cha ŋaajunjuŋ ngbaan gir puwɔb ŋibimbin kipiik.” Le kijunjuŋ ngbaan gir puwɔb ŋibimbin kipiik.

⁹ Hesekia aah pɔɔk na, le u ŋmee kipak aalahn mumina:

¹⁰ M nan dak ke n‑yoonn mu maapɔɔn moo fii na le m nan chaa kun kitekpiitiŋ ni, kaan fuu maamɔfal aadoon.

¹¹ M nan dak ke bimɔfadam aadulnyaa wee ni maan ki kan Uwumbɔr kpala, bee unii u fu na ubaa.

¹² Maamɔfal nan gii ki kuln, ke baah ber libool pu na, ke ukpaluul aah gii likekeln kikpaluudaak ni pu na. M nan dak ke Uwumbɔr doo maamɔfal la.

¹³ Kinyeek mɔmɔk m wii iween pu la, ki naahn ke uchinn le aah bi kool maakpab na. M nan dak ke Uwumbɔr doo maamɔfal la.

¹⁴ Nneel nan bi siib kina, kaa pɔɔ, le m nan dun ke linanjel aah wii pu na. Maah nan lik paacham pu na nan cha nnimbil wu la. Uwumbɔr, nyan mi tibɔbir timina mɔmɔk ni.

¹⁵ Uwumbɔr le ŋa kina. M ga len kinye? Nsui aa dɔ, le maa ŋma geen.

¹⁶ Uwumbɔr, sin baanja pu le m ga li bi, sin baanja pu; tii mi laafee, ki cha m li bi.

¹⁷ Nsui aah bii pu na ga kpaln nsuudoon la. Aa nyan mi tibɔbir mɔmɔk ni; aa di maatunwanbir cha pinn mi a.

¹⁸ Ubaa aa bi kitekpiitiŋ ni ki ga ŋmaa pak si; bitekpiib aan ŋmaa li kpa limakl saabamɔn pu.

¹⁹ Binib bi fu na baanja le ga ŋmaa pak si, ke maah pak si dandana wee pu pu na. Tetiib tuk baabim ke aa ŋani saah puu pu na.

²⁰ Uwumbɔr, aa cha maaween sɔŋ a. Ti ga gbaa tibar ki gaa ilahn ki pak si. Timi aamɔfal mɔmɔk ni, ti ga gaa ilahn ki pak si Saadichal ni.