Aisaya 35 - Uwumbɔr aagbaŋ

Nsan mu ye chain aasan na

¹ Nteersakpiin pu ga li kpa mmɔɔn, le mmopuun ga ŋeen kipɔɔk ni.

² Nteersakpiin aatiŋ ngbaan ga li kpa mpopiin ki gaa ilahn ki li tar, ki ga li ŋan ke Lebanonn aajoo pu na la. Kitiŋ ngbaan ga li nyuun ke Kamel ni Saronn aakpaakon na. Binib mɔmɔk ga kan Uwumbɔr aah kpa kipak pu na, ki kan waah ye unikpaan ki kpa mpɔɔn pu na.

³ Ter iŋaal i bak na, ki pɔɔk ŋitaaŋaayil ŋi yɔl na.

⁴ Bui umɔk aataakpab yɔl na ke, “Cha aataakpab pɔɔk ki taa san ijawaan. Uwumbɔr choo u nan gaa si lii, u choo u nan daa saadim aatafal.”

⁵ Bijoom ga likr, le bitafakpaab na mu ga ŋun.

⁶ Biwɔb ga yuk ki waa liwaal, le bibirb ga teen mpɔɔn pu ni mpopiin. Ibun ga puu nteer pu nin chee nnyun aa nan bi na;

⁷ litambol li nan ton ki seer binib na ga kpaln kibɔɔk la, le kitiŋ nin chee nan kuun na ga kpaln inyunbun ŋmeen. Nin chee ikakal nan koo na, kipuuk ni aamoor ni tikal le ga gaa nima.

⁸ Nsanja ga naan nima chee, bi ga li yin mu ke, “Uwumbɔr aasan.” Titunwanbirdam aan chuun mu pu daalbaadaal; bijɔrb aan ŋmaa cha binib bi dii mu na yenn.

⁹ Ichinn aan li bi mu pu; tipeewanbir mu kibaa aan jer mu chee. Uwumbɔr aah gaa binib bi lii na le ga dii mu kun.

¹⁰ Bi ga dii mu ti fuu Jerusalem ni mpopiin, ki gaa ilahn ki tar mpɔɔn pu ni mpopiin. Bi ga li kpa mpopiin n‑yoonn mɔmɔk, bi ga nya kinimbaak ni mpombiin ni kookoo.