Aisaya 34 - Uwumbɔr aagbaŋ

Uwumbɔr ga daa waadim aatafal

¹ Ŋitimbol mɔmɔk aanib, dan man. Kuun man tɔb chee ki pel. Cha kitiŋ kee, ni binib bi mɔmɔk bi ki pu na dan aan ki nan pel man.

² Uwumbɔr gee liŋuul ŋitimbol mɔmɔk ni ŋaajab bi jaa kijaak na pu. U ga kuln bi mɔmɔk.

³ Baan sub baanikpol, ŋi ga li dɔ le ki ti bur ki nuŋ; le ŋijoo pu ga li ye nsin ŋmeen.

⁴ Nwiin, ni uŋmal, ni iŋmabi mɔmɔk ga ker lir ni kitiŋ ki kpaln titan. Kitaapaak ga kpab buen ke baah kpab nkan pu na, le iŋmabi ker lir ni ke ŋikakan aafar ti kuur na aah ker lir ni kitiŋ pu na.

⁵ Uwumbɔr toor waajaak aajuk paacham, le dandana ki ga gaa Edom yaab, binib bi u bui ke bi ga doo na.

⁶ Waajaak aajuk po ga li ye nsin ni nkpan ŋmeen la, ki ga li naahn ipiih ni iŋoob i bi di toor kitork na aasin ni nkpan la. Uwumbɔr ga toor kitork kimina Bosra aatisakpeŋ ni la; u ga ŋa linikul sakpeln limina Edom aatiŋ ni la.

⁷ Binib ngbaan ga lir ke ipɔɔnaa na, ni inaajabi na la, le kitiŋ po ga li ye nsin ni nkpan ŋmeen.

⁸ N‑yoonn mue le ye n‑yoonn mu Uwumbɔr ga gaa Sionn aatiŋ lii ki daa baadim aatafal na.

⁹ Edom aamɔɔ mɔmɔk ga kpaln kootaal la, le kitiŋ labr ŋa chirbil.

¹⁰ Ki ga li gaal mmii nwiin pu ni kinyeek mɔk, le laaŋmanyuu ga fii n‑yoonn mu kaa kpa ndoon na. Kitiŋ ngbaan mɔmɔk pu aan ki li kpa nibaa ki joo cha n‑yoonn mɔmɔk, le unii ubaa aan ki jer nima chee.

¹¹ Ki ga kpaln ifiin ni ikaabɔn aatiŋ la. Uwumbɔr ga ŋa ki tilangbenn ŋmeen, kitiŋ ki kaa kpa tinyoor tibaa na la.

¹² Ubɔrkpaan aan li bi ki joo litingbaln ngbaan, le kaaninkpiib mɔmɔk ga doo.

¹³ Ikokon ni ŋinaabukar ŋmeen le ga punn ŋibɔrdichal, ni ntim mu bi maa ŋigon kiir mu na mɔmɔk ponn ni, le ikakal ni ifiin ga li koo nima.

¹⁴ Tipeewanbir ga li gur chuun kpak nima chee la, le tiyayaar ga li bi nima ki yin tɔb. Kelngbaa ga dan nima nan ban nkookoo yaan.

¹⁵ Nima chee le ifiin ga ŋa yaadil, ki too ŋijen, ki kaal yaabim ki kpiin mu nima. Nima chee le nangba man ga kuun dan tɔb chee.

¹⁶ Ban kan Uwumbɔr Aagbaŋ ni, tiwanfuurkaan aabɔr na, ki karn naah ŋmee pu na man. Tiwanfuurkaan nimina ponn ni nibaa aan wɔŋ, le ni mɔmɔk mu ga li kpa niŋeen aatɔ. Uwumbɔr le len ke ni li bi kina; uma ubaa le ga kuun ni mɔmɔk nan kpaan tɔb chee.

¹⁷ Uwumbɔr le ga yakr kitiŋ ngbaan tii tiwan ngbaan, ki tii ni mɔmɔk naatim. Ni ga li koo kitiŋ ngbaan pu n‑yoonn mɔmɔk, aan ki li ye naatiŋ n‑yoonn mu kaa kpa ndoon na.