Aisaya 33 - Uwumbɔr aagbaŋ

Nterm aameel

¹ Timi aadim aamɔfal junn a. Bi sun kinaayuk, ki bii binib, le ubaa ma aa sun bi kinaayuk kaa bii bi mu. Tɔ, baayoonn mu bi joo su ki bii binib na ga doo, le binib mu ga su bi kinaayuk ki bii bi mbamɔm.

² Uwumbɔr, san timi kinimbaak. Ti di timi aamakl di ŋa aa ni. Li kii timi iwiin mɔmɔk ki gaa timi lii buyoonn ti bi limukl ni na.

³ Buyoonn aa bi to timi aatɔb tii timi na, ŋitimbol mɔmɔk san kifuuk ki nyan ni butɔb ngbaan ponn ni na pu la.

⁴ Le ti san ti gaa baawangol.

⁵ Uwumbɔr aapɔɔn nyaŋ a. Uma le joo tiwan mɔmɔk. U ga cha binib li kpa mbimbinyaan ki tii tɔb baabamɔn, Jerusalem aatiŋ ni,

⁶ le nibaa aan ki ŋmaa dam litimbol ngbaan. U kii waanib n‑yoonn mɔmɔk le ki tii bi nlan ni mbaem. Baawangol li bi gee sakpen na le ye ke bi li pak Uwumbɔr.

⁷ Bipobidam wii ki ban nterm la. Bitutum bi pɔɔk bibaa bi joo ni nsuudoon na wii iwiil la.

⁸ Isanja ni gbii tibɔbir sakpen le binib aa ki ŋmaa dii i. Mmɔkpaan na mɔmɔk bii le kimɔbaan mu aa ki bi. Unii ubaa aa ki kan kipak.

⁹ Ubaa aa ki ko kitiŋ ngbaan, le ki gur dɔ fam. Lebanonn aachoor na aasui yɔl, le Saronn aafataŋ ki aatiŋ ŋan na gur naahn nteer la, le Basann aatiŋ ni, ni Kamel Aajool pu aasui aafar gbar lir kitiŋ.

Uwumbɔr sur waadim

¹⁰ Uwumbɔr bui ŋitimbol ngbaan ke, “Dandana, m ga fii sil. M ga mɔk maah pɔɔ sakpen pu na.

¹¹ Ni kpokl nkpokl mu kaa kpa tinyoor na, le naah ŋani tiwan nimɔk na aa kpa tinyoor. Maawiin naahn mmii mu ga bii nimi doo na la.

¹² Ni bur ke ikukuun i bi see i mmii ni ke bi di ŋa nkukuyaan na la, ki naahn ikokon i bi see i aan i kpaln nfatan na.

¹³ Cha bimɔk bi kɔnkɔni do na, ni bimɔk bi dandar na mu ŋun maah tun pu na, aan ki bee maapɔɔn aah bi pu na.”

¹⁴ Sionn aatunwanbirdam na aapobil yuk, le biwon gbaa. Le bi len ke, “Uwumbɔr aabɔjil naahn mmii mu wu kaan junn na la. Ti ponn ni, ŋma ga ŋmar mmii mumina aaboln ni?”

¹⁵ Ni yaa len ki ŋani ni ŋan na kan, ni ga ŋmar. Taa di man nimi aapɔɔn di ji bigiim, ki taa gaa igaŋgaŋlik. Ni taa kpaani binib bi kpokl ke bi ku unii, bee binib bi tun titunwanbir na chee.

¹⁶ Nima kan ni ga ŋmar; ni ga fuur ke naah bi lijool li pɔɔ ki fɔk na paab le na. Ni ga li kpa tijikaar ni ji, ki kpa nnyun mu ni nyu.

Lifuur aayoonn mu choo na

¹⁷ Ni ga ki kan ubɔrkpaan u joo waanib kinyaan na joo kitiŋ ki wiir ŋipepel mɔmɔk na.

¹⁸ Naah nan san biwɔwɔm aalampoogaab ni bipepekb bi ijawaan na, ga kpaln tiwan ni ni ga li teer na la.

¹⁹ Naan ki kan biwɔwɔm bi kpa kigaak ki len iliin i naa ŋun i na daalbaadaal.

²⁰ Lik man Sionn, kitiŋ ki ponn ni ti ji Uwumbɔr aajim na. Lik Jerusalem man, kitiŋ ngbaan ga li ye nin chee ni ga li koo le tibaa aan ŋa na. Ki ga li bi ke libool li aadɔ aan ŋɔb daalbaadaal, aan laaŋmin mu aan kii na la.

²¹ Uwumbɔr ga mɔk timi waah kpa kipak sakpen pu na. Ti ga li bi ŋimɔɔ ni ikpen i waa na chee la, le iŋɔi i ye bidim aaŋɔi na aan koo ni nima chee.

^22-23 Tiwan nimɔk bi iŋɔi ngbaan pu na ye fam la; yaakeken ŋi cha i chuun na aan ŋmaa kpar. Ti ga di mpɔɔn gaa timi aadim aawangol mɔmɔk, le taah ga gaa liwangol li na ga li wiir sakpen; le biwɔb mu ga kan bi yaan. Uwumbɔr ubaa le ga li ye timi aabɔrkpaan; u ga li joo timi le ki kii timi.

²⁴ Timi aatiŋ ni aanii ubaa aan ki bui ke u bun, le Uwumbɔr ga di timi aatunwanbir mɔmɔk cha pinn timi.