Aisaya 32 - Uwumbɔr aagbaŋ

Ubɔrkpaan u dii ibamɔn na

¹ N‑yoonn mubaa le ubɔr u joo waanib ni ibamɔn na, ni waaninkpiib bi joo ibamɔn tun baatuln na ga fuu ni.

² Bi mɔmɔk ga li bi ke mbɔbɔryaan mu ga ŋmaa kiir unii libuln chee, ni nin chee unii ga bɔr ki ŋmar kitaabuŋ chee na la. Bi ga li naahn ibun i puu nteersakpiin pu nin chee nnyun aa bi na, ki ki naahn litakpasakpeln li tii mboon nin chee isui aa bi na.

³ Binimbil ni bitafal ga li bi binib bi kaa kpa na ni.

⁴ Bi ga li bi suuna, ki ga li tun ŋitun ŋi kpa ŋitataa na, ki ga ŋa baah len pu na.

⁵ Ubaa aan bui ke ujɔr le kpa kipak, bee ubiindaan le kpa mbamɔn.

⁶ Ujɔr le ye unii u len kijɔrk aaliin, ki dakl ilandak i kaa ŋan na. Waah ŋani pu na, ni waah len pu na mɔmɔk ye lisiibil le ki tii Uwumbɔr; waa kpiini nkon aah joo binib bi na, kaa tii binib bi nnyunyuu joo bi na mu nnyun.

⁷ Ulatiir ye unii u bir na, le ki tun titunwanbir; u dakl ke u di inyamɔn di bii bigiim bi taa kan baabamɔn.

⁸ Le unii u kpa kipak na tun lituln li ga joo ni u kipak na, ki si chob buyoonn u kan mbamɔn dɔ na.

Ntafadaan ni chapinn aabɔr

⁹ Nimi bipiib bi bi nibaa pu, kaa dak tiwan nibaa pu na, li pel man maah bi len pu na.

¹⁰ Mbamɔn, ni ji bab dandana wee, tɔ, libiln libaa yaa jer kan, naan li nyi naah bi nin chee na; ba pu? ŋisubil aan ki li bi aan ni chaa ti peei.

¹¹ Ni po bi nibaa pu la, kaa kpa ilandak ibaa; dandana ma kan, cha niwon li gbaa ijawaan pu. Gbabr nimi aakeken mee man, ki ban tiwankpir di gbin nichaŋ ni.

¹² Li gbaa nibiŋ ki wii iwiil man; ba pu? ikpaakon nyaan, ni ŋisubil aasui aasar mɔmɔk bii doo a,

¹³ le ikokon ŋmeen le gur si maanib aakpaakon ni. Li wii man ŋidichal ŋimɔk ponn ni binib nan bi ni mɔ bi na pu, ni kitisakpeŋ ki nan gbii binib na pu.

¹⁴ Hali libɔrchiln na mu ga kpaln nkuun, le litiyil na mu ga kpaln nkuun, ubaa aan ki li bi li ni. Ŋidichal ni ŋigon ŋi kiir ŋi na mɔmɔk ga kuln, kaan ki fii daalbaadaal. Ibon i bi timoor ni na le ga li gur chuun nima, le ipiih mu kan nin chee i ga li ŋmɔ timoor na.

¹⁵ Tɔ, Uwumbɔr ga ki gir tii ni timi Waafuur Nyaan. Ikpaakon i nan bii na ga ki gir ŋa ikpaakon i ŋan na, ki ga ŋa tijikaar sakpen.

¹⁶ Le ibamɔn ni mbimbinyaan ga gbiin kitiŋ ngbaan ni;

¹⁷ ba pu? unii mɔk ga tun ni ŋan na, nsuudoon ni lifuur ga li bi n‑yoonn mu kaa kpa ndoon na.

¹⁸ Uwumbɔr aanib ga nya ilandak mɔmɔk ni, le baadichal ni ga li kpa nsuudoon ni lifuur.

¹⁹ Le ŋitaatakpal yaa po lir ni kichook ni kan, kitisakpeŋ mu yaa wii ki lir kan,

²⁰ nimi tee ga li kpa mpopiin, nimi aajikaar ga kan nnyun, le timoor mu ga li bi ni kookoo nimi aawakor ŋmɔ.