Aisaya 31 - Uwumbɔr aagbaŋ

Uwumbɔr ga kiir Jerusalem aanib

¹ Binib bi chaa Ijipt ti ban nterm na aamɔfal junn a. Bi lik Ijipt aajab bi chaa butɔb na, ni baataan ni baataan aatɔroku tiib aawiwiir la. Baa tee fenn lik Uwumbɔr, u ye bima Israel yaab Aadindaan ki bi chain na, ke u ter bi.

² U nyi waah ŋani pu na. Uma le cha tibɔbir choo. U yaa puu ke u daa titunwanbirdam ni binib bi ter bi na aatafal kan, waan di cha.

³ Ijipt aanib mu po ye binibɔm la, baa ye Uwumbɔr. Baataan mu aa ye lijinjiir aawan nibaa. Uwumbɔr yaa ban u tun waah ban pu na kan, litimbol li kpa mpɔɔn na ga bur, le litimbol li kaa pɔɔ aan li ter li na ga lir. Ŋimɔk ga kuln la.

⁴ Uwumbɔr bui mi ke, “Uchinn yaa chuu kiwakork, aan bipihkpaab po gee bi li tar mpɔɔn pu sakpen pu na, waan san cha ki; ni mu ga li bi kina le Uwumbɔr Mpɔɔnsakpiindaan chee, nibaa aan ŋmaa kiir u, aan u taa li kii Sionn aajool.

⁵ Unyoon aah wuŋni waadil pu ki kii waabim pu na, kina le min Uwumbɔr Mpɔɔnsakpiindaan ga kiir Jerusalem aatiŋ ki biin ki pu.”

⁶ Uwumbɔr ki bui ke, “Israel aanib, ni tun mi taani kaa si mpuwɔb; gir ni m chee man.

⁷ Naah nan tun mi taani ki di tikunabr ni salmaa di naan ŋiwaa ŋi na, n‑yoonn mubaa choo le ni mɔmɔk ga di ŋi lii.

⁸ Butɔb ga bii Asiria aatiŋ, ni mu aan li ye binibɔm aapɔɔn pu. Asiria yaab ngbaan ga san butɔb ngbaan ni, le binachipɔm ga kpaln binaagbiib;

⁹ ijawaan pu, le baabɔrkpaan ga san, baaninkpiib aawon ga li gbaa sakpen aan bi di baatuutaa mam di mee.” Uwumbɔr u bi dooni u Jerusalem aatiŋ ni, nin chee waatork aamii gaal na, le len kina.