Aisaya 3 - Uwumbɔr aagbaŋ

Jerusalem ponn ni aafuuk

¹ Dandana wee, Tidindaan Uwumbɔr u ye Mpɔɔnsakpiindaan na ban u chuu nyan Jerusalem ni Juda ponn ni tiwan, ni binib bimɔk nan joo ntim ngbaan aanib na. U ban u chuu yoor baajikaar, ni baanyun,

² ni bipobidam ni baatɔb aajab, ni baabɔjirb, ni bibɔnabr ni baabɔɔb, ni baaninyuum,

³ ni baatɔb aajab aaninkpiib, ni baanib aaninkpiib, ni baayidam, ni binib bimɔk joo inyɔk tun lituln na.

⁴ Uwumbɔr ga cha mbijabim waatiib le li joo ntim ngbaan,

⁵ le unii mɔmɔk ŋa uŋeen aatɔ waageehn. Binachipɔm ni bisapɔm aan li pak bininkpiib, le binib bi kaa bi tibaa ni na aan ki li pak binib bi jer bi na.

⁶ N‑yoonn mubaa choo, le lidichal libaa ni aanib ga nyan bi ponn ni ubaa ki bui u ke, “Aa ma kpa tiwan ki ga peen, kina pu na, li ye timi aaninkpel limukl aayoonn mue ni.”

⁷ Le u ga bui ke, “Naa ye min. Maan ŋmaa ter nimi. Maa kpa tijikaar, bee tiwanpeenkaan. Taa di mi ŋa nimi aaninkpel man.”

⁸ Mbamɔn, Jerusalem sil kuln a. Juda mu bi lir la. Baah ŋani tiwan nimɔk ki len pu na mɔmɔk seei Uwumbɔr binib aanimbil ni la; le bi fii sil uma Uwumbɔr u kpa mpɔɔn mɔmɔk na pu.

⁹ Baa kaa gbaa ibamɔn pu na ga ki gir koon bima le tibɔr ni. Bi tun titunwanbir kaa joo bɔrni ke Sodom aanib aah nan tun pu na la. Bima le joo ni bibaa aadoon, bi kuln a.

¹⁰ Binib bi aabimbin bi chain na ga li kpa mpopiin, le baawan mɔmɔk ga li dii nsan. Baah tun ki kan pu na, bi ga ji ni ni mpopiin.

¹¹ Le titunwanbirdam ga kuln; le baah ŋa biken pu na, Uwumbɔr ga di giin ŋa bi.

¹² Mbim le joo maanib ki muk bi, baayidam ye bipiib la. Maanib, nimi aasalolm na joo nimi kooni timoor ni la, ki cha ni yenni.

Uwumbɔr aah ji waanib tibɔr pu na

¹³ Uwumbɔr gor ke u piin waabɔr, u gor ke u ji waanib tibɔr.

¹⁴ Uwumbɔr kuun bininkpiib, ni binib bi ye bisalolm na ke u ji bi tibɔr. Waah di ngalm mu di bil bi na sɔ: “Ni sun biken aasar mpɔɔn pu, le nimi aadichal ni gbii tiwan ni ni gaa bigiim chee na.

¹⁵ Naa ŋan ke ni muen maanib ki ji bigiim ke baah ye bigiim na. Min, Nidindaan Uwumbɔr Mpɔɔnsakpiindaan le len kina.”

Jerusalem aapiib aasurm

¹⁶ Le Uwumbɔr bui ke, “Lik Jerusalem aapiib aah kpa kigaak pu na. Bi chuun le bimɔfal ŋui paacham ke ibɔ na. N‑yoonn mɔmɔk bi chuun gɔr kidagook la. Bi tai dim dim, le ŋibɔlun ŋi gbin bitaagbin na weeni kiliŋ kiliŋ.

¹⁷ Le m ga daa bitafal; m ga kuu baayikpir ki cha ŋiyikun.”

¹⁸ Nwiin mubaa choo, le Uwumbɔr ga gaa tiwan nimɔk Jerusalem aapiib kpa ki kpa kigaak ni pu na: nleenyaan mu bi joo gbei bitaagbin, ni biyil, ni bineen ni,

¹⁹ ni biŋaal pu na mɔmɔk. U ga gaa baayibubur ti bi joo biini binimbil wɔb na,

²⁰ ni baayikpupur; ni baabɔnyɔk i bi di gbin biŋaal, ni bichaŋ ni na,

²¹ ni mbɔmbim mu bi ŋmaa biŋanbim pu na, ni mu tuu bimɔfal pu na,

²² ni baakekenyaan, ni ŋibɔkul, ni ŋimombil aataakɔr mam,

²³ ni baanimbilikr, ni baabɔkol nyaan, ni baayibubur ti fɔk aan bi joo buu biyil pu na mɔmɔk.

²⁴ Baah ba ga li ŋmir tulalee pu na, bi ga li nu la; baan ki buu ŋigbapapan, bi ga li buu tichɔsɔnn aaŋmin la; baan ki li kpa tiyikpir ti ŋan na, bi ga li gur ye ŋiyikun ŋmeen la; baan ki gbab ŋikekenyaan, tikekekpir le bi ga li gbae; le baanyaan ga kpaln inimɔɔn.

²⁵ Bijab bi bi kitiŋ ngbaan ni na, hali, bi kpa mpɔɔn sakpen na mɔmɔk ga bee butɔb ni.

²⁶ Kitiŋ ngbaan aagoln li maln gob ki na aabisamɔb ga li wii ikpowiil, le kitiŋ ngbaan kibaa ga li gur naahn upii u bi chuu gbabr waakeken aan u gur ka kitiŋ uŋmeen na, aah bi pu na la.