Aisaya 27 - Uwumbɔr aagbaŋ

¹ Nwiin ngbaan daal kan, Uwumbɔr ga di waajaak aajuk ki pɔɔ ki ku na, ki di daa kipeewanbiik Lefiatann ki mur guŋ kina ki bi nnyusakpem ni na aatafal, ki ku ki.

² Nwiin ngbaan daal Uwumbɔr ga len waasubil aasaak ki ŋan na aabɔr ke,

³ “M lik ki, ki ŋani ki nnyun n‑yoonn mɔmɔk. M kii ki nwiin pu ni kinyeek ke ubaa taa bii ki.

⁴ Maa ki gee ki pu liŋuul. Ikokon le yaa ba bi ki ponn ni kan, m ba ga see i mmii ki kuln i.

⁵ Maanib aadim ma yaa tee ban ke m li kii bi kan, cha bi sɔŋ nsui. Mbamɔn, cha bi sɔŋ nsui.”

⁶ Iwiin i choo na ni, Jakob aamaal, Israel yaab, ga nyal sil ke busub na, ki ŋeen ki lu. Kitiŋ kee ga gbiin baah tun ki kani pu na.

⁷ Uwumbɔr aa daa Israel yaab aatafal sakpen ke waah daa baadim aatafal pu na, ki mu aanib pam aa kpo ke baadim na.

⁸ Uwumbɔr cha waanib aadim chur bi tinaagbiir ki di bi buen ki ti daa bitafal. U cha libuln li pɔɔ ki bir ki nyan ni liwipuul wɔb na le di bi buen.

⁹ Israel yaab yaa nan baawaatakpal ke nfatan na, ki kuln nnyɔknii aabimbin ni liwaapii Asera aanaŋ kan, Uwumbɔr ga di baatunwanbir cha pinn bi.

¹⁰ Kitisakpeŋ ki bi nan maa ŋigon kiir ki na ber doo a. Ki gur nkuun ke nteersakpiin na la. Ki kpaln inaa aamoŋmɔpaan, nin chee i ga fuur ki ki fii ŋmɔ na la.

¹¹ Isubon na mɔmɔk kuur ki kool lir a, le bipiib ti peei ti tuur mmii, ba pu? binib ngbaan aa bee nibaa, nima pu na, Uwumbɔr u naan bi na aan di cha pinn bi, kaan san bi kinimbaak mu.

¹² Nwiin ngbaan daal, ki nya Yufrates aamɔɔl ki ti saa Ijipt yaab aatiŋ aanaanmɔk, Uwumbɔr ga kuun ni waanib ubaabaa, ke unii aah ganni mmuubim ki cha timuupɔkr pu na.

¹³ Nwiin ngbaan daal yaa nan fuu ni kan, kakaan ga wii ki yin Israel yaab bi bi Asiria ni Ijipt aatim ni tinaagbiir ni na ke bi gir ni. Bi ga dan ki nan doon Uwumbɔr, Jerusalem aatiŋ ponn ni, waajool paab.