Aisaya 26 - Uwumbɔr aagbaŋ

Uwumbɔr ga tii waanib linyaŋ

¹ Nwiin mubaa choo, le binib ga gaa nlahn mumina Juda aatiŋ pu: Timi aatisakpeŋ pɔɔ. Uwumbɔr ubaa le kii kaagon.

² Chuu piir man kaabisamɔi aan litimbol li bi mbamɔm na koo, litimbol li aanib ŋani ni ŋan na.

³ Uwumbɔr, sin le joo nsuudoon mu sil ye nsuudoon na tii binib bi joo baabimbin mbamɔm ki tii si naadii na.

⁴ Tiin man Uwumbɔr naadii n‑yoonn mɔmɔk; u ga li kii timi n‑yoonn mɔmɔk.

⁵ U sunn kigaadam taab, ki kuln baatiŋ ki pɔɔ na, ki gbaa wiil kaagon ŋmal titan ni.

⁶ Baah nan muk bi na le gur chuun ki pu, ki taa ki pu.

⁷ Uwumbɔr, saa cha bininyaam aasan ponn ni kpa tibɔbir; baah chuun isan i pu na aa kpa ŋibugen.

⁸ Ti dii saah ban pu na ki kpa limakl aa pu; si le ye taah ban nimɔk na.

⁹ Maah gee si pu na, m wii kinyeek ki ban si; aa yaa ji kitiŋ kee ni kaanib tibɔr kan, bi ga bae ibamɔn aah ye pu na.

¹⁰ Saah po ŋani bibiindam tiŋann na, baa kee bae ke bi ŋa ni ŋan na. Hali nin chee bininyaam bi na, bi beenin ŋani ni kaa ŋan na; bi yii, kaa bee ke aa kpa mpɔɔn sakpen.

¹¹ Saadim aa nyi ke aa ga daa bitafal. Uwumbɔr, jinn bi inimɔɔn ki cha bi ji falaa; cha bi kan ntafadaan mu aa siin bi na. Mɔk bi saah gee saanib sakpen pu na.

¹² Uwumbɔr, aa ga tii timi nwankam; tiwan nimɔk ti kani na ye saaŋann la.

¹³ Tidindaan Uwumbɔr, dindaayayan le nan joo timi, sin baanja mu le ye Tidindaan.

¹⁴ Dandana wee, bi kpo a, kaan ki gir ni; baawiin aan ki fii; ba pu? aa daa bitafal ki kuln bi a; ubaa aan ki teer bi pu daalbaadaal.

¹⁵ Uwumbɔr, aa cha timi aatimbol moo kpae la, ki kpae ŋipepel mɔmɔk pu, le nimina joo ni si bunyuŋ.

¹⁶ Uwumbɔr, aa daa saanib aatafal, le baanimbaak ni, bi mee si.

¹⁷ Sin Uwumbɔr, aa cha ti wii mpɔɔn pu, ke imalween aah joo upii kan, u wii pu na.

¹⁸ Ti nan bi iween ni kinimbaak ni, le kaa nyan nibaa; taa nyaŋ timi aadim ki gaa timi aatiŋ; taa kan nibaa.

¹⁹ Tɔ, timi aanib bi kpo na ga ki fikr nkun ni. Biwon ga ki fikr ki li kpa limɔfal. Bimɔk dɔ geen baakaakul ponn ni na ga fii ki gaa mpopiin aalahn. Limaln aah sɔŋni kitiŋ pu na, kina le Uwumbɔr ga fikr binib bi kpo ni yunn na.

Ntafadaan ni chapinn

²⁰ Maanib, koo man nimi aadichal ni, aan ki laŋ nibaa pu. Bɔr man nibaa siib aan Uwumbɔr aaŋuul jer.

²¹ Uwumbɔr ga nyan ni waakookoo yaan mu bi paacham na, ki nan daa kitiŋ kee pu aanib aatafal baatunwanbir pu. Binib bi, bi nan ku ki di bɔr kitiŋ kee pu na aabɔr ga nyan mpaan pu, kitiŋ kee aan ki bɔr binib bi bi ku bi na pu.