Aisaya 25 - Uwumbɔr aagbaŋ

Kipak aalahn

¹ Ndindaan Uwumbɔr, m ga nyuŋ si ki pak saayimbil. Aa ŋa lijinjiir aawan; aa ŋman ki joo saah nan siin n‑yaayoonn na ke aa ga ŋa pu na.

² Aa cha ntisakpem kpaln ŋilangben, ki bii ntim ngbaan aah bi nin chee na. Timi aadim aah nan maa ŋibɔrdichal ŋi na kuln, kaa ki si.

³ Ŋitimbol ŋi kpa mpɔɔn sakpen na aanib ga pak si; bi ga san si ijawaan bibiindam aatimbol ni.

⁴ Bigiim, ni binib bi kaa kpa nterm na san dan aa chee; le aa gaa bi lii baamukl aayoonn. Aa gaa bi lii kibuŋ yoonn, ki tii bi mboon buyoonn nwiin ton sakpen na. Bibiindam tak ke kakab yoonn aabuln na;

⁵ ki naahn ntaaweel aah sil kitiŋ ki kuun na pu na. Uwumbɔr, le sin ma cha timi aadim ŋmin chii; ki cha bibiindam aafuuk mu ŋmin chii, ke ntaalangbam aah tii mboon nwiin mu ton na daal pu na.

Uwumbɔr gor njim siin

⁶ Sionn Aajool pu do, le Uwumbɔr Mpɔɔnsakpiindaan ga gor njim siin dulnyaa aatimbol mɔmɔk. Njim mu aajikaar nyuun aan mu aadaan pɔɔ ti nyaŋ na.

⁷ Nima chee le u ga kpaan nyan mpombiin mu bii ŋitimbol ngbaan mɔmɔk pu na.

⁸ Tidindaan Uwumbɔr ga nyaŋ nkun ki kuln mu. U ga per binib mɔmɔk aanimbil tinyunyunn, ki nyan inimɔɔn i waanib jin dulnyaa wee mɔmɔk ni na. Uma Uwumbɔr le len kina.

⁹ Kina yaa ŋa kan, binib mɔmɔk ga bui ke, “Uma le ye Tidindaan. Ti kpa u pu limakl, le u gaa timi lii. Uma le ye Uwumbɔr. Ti kpa u pu limakl, le dandana ti kpa mpopiin ki mɔɔni; ba pu? u gaa timi lii.”

Uwumbɔr ga daa Moab yaab aatafal

¹⁰ Uwumbɔr ga kiir Sionn paab aanib; Moab yaab ma kan, u ga taa diin bi pu, ke inaa aah taa diini likakl tinaanyar ponn ni pu na la.

¹¹ Bi ga taln biŋaal ke baah ban bi wo nnyun le na, le Uwumbɔr ga jinn bi inimɔɔn, le biŋaal ga yɔl lir kitiŋ.

¹² U ga wii Moab yaab aah maa ŋigofɔfɔŋ ŋi kiir baatiŋ na mɔmɔk, ki taa taa ŋi ŋmal titan ni.