Aisaya 23 - Uwumbɔr aagbaŋ

Taya ni Saidonn aatim aabɔr

¹ Taya yaab aabɔr sɔ. Li ker idun mpombiin pu man, nimi bi ŋaal iŋɔi nnyusakpem ponn ni na. Nin chee iŋɔi sii nido Taya aatiŋ ni na bii doo a; nima chee aadichal ni iŋɔi aah doo nin chee na ber doo a. Buyoonn nimi aaŋɔi ga nya Saiprus ki gir ni na, le ni ga ŋun tibɔr ngbaan.

² Li wii man, nimi bi tiir kitiirk Saidonn aatiŋ ni na. Ni tun bijab

³ ke bi puur nnyusakpem ki ti daa ki kooh ŋikalmaan ŋi nyan Ijipt aatiŋ ni na, ki tiir kitiirk ŋitimbol mɔmɔk ni.

⁴ Saidonn aatisakpeŋ, inimɔɔn chuu si a. Nnyusakpem, ni tiwan ni bi mu taab na yii si ki bui ke, “Maa ma mbim kpala. Maa kpiin mbijabim ni mpiibim kpala.”

⁵ Ijipt aanib yaa ŋun ke Taya aatiŋ bii doo kan, ni ga bii bisui aan ki gar bi.

⁶ Li wii man mpombiin pu, nimi Fonisia yaab. Pɔɔn man nibaa ki san buen Speenn aatiŋ ni.

⁷ Mpopiin aatisakpeŋ Taya ki nan bi n‑yoonn mu jer na le na aa? Kitisakpeŋ ki nan tun kaanib ke bi puur nnyusakpem ki ti naan ntipɔm na le bi na aa?

⁸ Ŋma nan kal kpokl ke tibɔbir timina dan Taya aatiŋ pu, mpɔɔn aatiŋ ki aawantiirb naahn biyidam, ki nan ye bininyuum kitiŋ kee pu na?

⁹ Uwumbɔr Mpɔɔnsakpiindaan le kpokl kina. U kpokl kina ke u kuln baagaak, ni baah tun pu na, ki jinn baaninyuum inimɔɔn.

¹⁰ Nimi bi bi ntim mu bi Speenn aatingbaln ni na, buen ti ko kitiŋ ngbaan man. Ubaa aa ki bi ki ga li kii nimi.

¹¹ Uwumbɔr taln uŋaal paan nnyusakpem pu ki nyaŋ bibɔrb aanaan. U cha bi bii Fonisia aanyam.

¹² Saidonn aatisakpeŋ, saamɔɔn doo a, le saanib bi limukl ni. Hali bi yaa san buen Saiprus aatiŋ ni kan, bi ga li beenin bi tibɔr ni.

¹³ Babiloŋ yaab le nan cha tipeewanbir bii Taya aatiŋ, naa nan ye Asiria yaab. Babiloŋ yaab le nan ti gob ki bii Taya aatiŋ aapɔɔn, ki cha tilangbenn ŋmeen.

¹⁴ Li wii mpombiin pu, nimi bi ŋaal iŋɔi nnyusakpem ponn ni na. Kitisakpeŋ ki ni mak ki pu na kuln a.

¹⁵ N‑yoonn choo le bi ga nan suln Taya aatiŋ bɔr ki ti saa ŋibin imonko itaa ni ŋibin kipiik; nimina ye ubɔrkpaan ubaa aamɔfal aayoonn la. Ŋibin ngbaan yaa nan jer kan, Taya ga li naahn upiidagoor u bi gaa nlahn u pu ke;

¹⁶ Yoor saabeek, mann gonn kitiŋ ngbaan, sin udagoorgiin u bi suln u pu na. Li gbaa ki, ki gir gaa saalahn, ki ki gir giin ni bijab aa chee.

¹⁷ Ŋibin imonko itaa ni ŋibin kipiik ngbaan yaa jer kan, Uwumbɔr ga cha Taya yaab gir buen baatuln li bi nan tun na ni, le bi ga di bibaa kooh tii dulnyaa wee aanaan mɔmɔk.

¹⁸ Bi ga di ŋimombil ŋi bi kani kitiirk ni na di tii Uwumbɔr. Baan ki di ŋi bil; le binib bi dooni Uwumbɔr na ga gaa baamombil ngbaan ki di daa tijikaar ni tiwanpeenkaan ni bi ban na.