Aisaya 22 - Uwumbɔr aagbaŋ

Jerusalem yaab aabɔr

¹ Tibɔr timina ye kifataŋ ki ponn ni Uwumbɔr kpiir tiwan mɔk waanib na aabɔr la. Ni ye ba bi ŋani? Ba ŋa binib ngbaan mɔmɔk bi ji njim baadichal aapaacham.

² Kitisakpeŋ ngbaan mɔmɔk ponn ni kpa kifuuk la; ki gbii kifuuk ni mpopiin la. Nimi aajab bi kpoi butɔb bue ni na aa bi jaa le ki kpoi.

³ Nimi aaninkpiib mɔmɔk san, kaa kee too mpiin mubaa, le baadim chur bi.

⁴ Di cha mi man aan m wii maanib bimɔk kpo na pu. Taa sɔŋni nsui man.

⁵ N‑yoonn mumina ye mpobiyuk, ni linyaŋ, ni nlanŋmal le Tibɔkpiirkaan Aafataŋ ngbaan ni. Tidindaan Uwumbɔr Mpɔɔnsakpiindaan le tun ni kina ti chee. Bi gbaa wii timi aatiŋ aagon, le binib aah wii pu ki ban nterm na ti keei ŋigongon paab.

⁶ Elam aatiŋ aatɔb aajab jak itaan ki fuu ni a, ki gor ki joo itɔi ni ipiin. Kir aatiŋ ni butɔb aajab gor baapen ki kii.

⁷ Juda aafataŋ ki nan ŋa tijikaar n‑yoonn na gbii itaan aatɔroku tiib; butɔb aajab bi dek itaan pu na si Jerusalem aatiŋ aabisamɔi.

⁸ Juda aatim aagon mɔmɔk lir a. Kina yaa nan ŋa kan, le ni buen tijawan aadiik ni, ni ti ban tijawan;

^9-10 ni kan nin chee Jerusalem aagon ban ntoorm na; ni lik Jerusalem aadichal mɔmɔk, ki gbaa wii ŋibaa, ki nyan ŋitakpal ke ni di toor ŋigon ngbaan,

¹¹ ni gbii limɔɔl bil kitiŋ ngbaan ponn ni ke ni chuu nnyun mu nyan ni kibukpiik kpok na ni, kaa tee dak Uwumbɔr u kpokl tibɔbir timina mɔmɔk n‑yoonn mu jer na ki cha ti ŋa kina na ma bɔr.

¹² Nidindaan Uwumbɔr Mpɔɔnsakpiindaan, nan bi yin nimi ke ni nan wii, ki wii ikpowiil, ki kuu niyil, ki peen tiwan ni saak kuub na aawanpeenkaan.

¹³ Le ni tee laa ki waa kinaachoŋ; ni kɔr ipiih ni inaa ke ni ŋmɔ, ki nyun ndaan; ni bui ke, “Ni ŋan ke ti ji ki nyu mu; ba pu? ti ga fe kpo fen.”

¹⁴ Nidindaan Uwumbɔr Mpɔɔnsakpiindaan, uma ubaa le len m chee ki bui ke, “Maan di cha tibɔbir timina pinn bi n‑yoonn mumɔk bi bi na. Min, Nidindaan Uwumbɔr Mpɔɔnsakpiindaan, le len kina.”

Uwumbɔr sak Sebna

¹⁵ Tidindaan Uwumbɔr Mpɔɔnsakpiindaan bui mi ke m buen libɔrchiln aaninkpel Sebna chee, ki ti bui u ke,

¹⁶ “Aa yin aabaa ŋma? Aa kpa ba aasan ke aa gbii likaakul ŋitakpal ni, ligongoln ni, tii aabaa?

¹⁷ Nibaakan aa ga li ye uninyuun la, le Uwumbɔr ga yoor si ki di mee.

¹⁸ U ga yoor si ke litakpal na ki di mee lii litingbaln li wiir sakpen na ni. Aa ga kpo nima chee, itaan aatɔroku tiib bi aa kpa kipupuk bi pu na chee. Aa jinni saadichandaan inimɔɔn la.

¹⁹ Uwumbɔr ga nyan si saaninkpir ni, ki sunn si taab.”

²⁰ Uwumbɔr ki bui Sebna ke, “Kina ngbaan yaa nan ŋa kan, m ga tun yin ni maatutunn Eliakim u ye Hilkia aajapɔɔn na.

²¹ M ga nan di saaninkpir aabɔkul ni saagbapapaln tii u, ki di mpɔɔn mu aa nan kpa na tii u. U ga li ye Jerusalem ni Juda yaab aate la.

²² M ga di mpɔɔn mɔmɔk tii u, le u li bi ubɔrkpaan u ye David aayaabil na aataŋaal ni. U ga li joo tininkpir aapiin; waah piir nimɔk na, ubaa aan ki di piin, le waah laŋ nimɔk na, ubaa mu aan ki piir.

²³ M ga baa u kaan libuul libaa ni, le u ga li ye waamaal mɔmɔk aapakm.

²⁴ “Le waamaal ni aanib bimɔk ji u pu na ga li ye lituln le ki tii u. Bi ga li lun u pu ke ituun ni tiyir aah lun nkpaa pu pu na la.

²⁵ Kina yaa nan ŋa kan, nkpaa mu bi nan kpaa mpɔɔn pu na ga ŋɔb ki lir. Le tiwan nimɔk nan lun mu pu na doo le na.” Uwumbɔr le len kina.