Aisaya 21 - Uwumbɔr aagbaŋ

Babiloŋ yaab aalirm aabɔr

¹ Babiloŋ yaab aabɔr sɔ. Kinaakpaajabuŋ aah ŋar nteer pu pu na, kina le tibɔbir ga nyan ni ijawaan aatiŋ kibaa ni ki dan Babiloŋ pu.

² M kan libiil aabɔr tibɔkpiirkaan ni, libiil ni ŋŋmannim aabɔr. Elam aajab, ti tak bi man. Media aajab, buen ti gob man ntim ngbaan. Uwumbɔr ga kuln Babiloŋ yaab aah tii nimi falaa u na.

³ Maah kan ki ŋun tibɔr ti tibɔkpiirkaan ngbaan ponn ni na tii mi ijawaan ni iween, iween i wu ke imalween na.

⁴ N‑yil gaar la, le ijawaan cha nwon gbaa. M nan ka dak ke kijook fuu ni mala, le ni tee joo ni mi ijawaan ŋmeen.

⁵ Tibɔkpiirkaan ngbaan ponn ni, bi gor njim aajikaar a, ki di ikan ter ke bicham nan kal i pu. Bi bi ji ki nyu. Libuul ngbaan ni le bi tii nsan: “Butɔb aajab aaninkpiib, gor man nimi aapen ŋi ni joo jaa kijaak na.”

⁶ Le Uwumbɔr bui mi ke, “Li cha ki ti ban ukikiir siin, ki bui u ke u gir ni ki nan bui si waah kan pu na.

⁷ U yaa kan bijab jak itaan pu ki dii tɔb bilelee kan, ni bijab dek ibon ni laakumii mam pu kan, u lik bi suuna.”

⁸ Tɔ, ukikiir ngbaan teen ki len ke, “Maaninkpel, m si maabuul ni, nwiin pu ni kinyeek.”

⁹ Libuul ngbaan ni, le bi nyan ni. Bijab jak itaan, ki dii tɔb bilelee. Ukikiir ngbaan tuk mi waah kan pu na, “Babiloŋ lir a. Baah nan dooni ŋiwaa ŋimɔk na lir kitiŋ ki wii a.”

¹⁰ Maanib Israel yaab, bi poi nimi ke idi na la, le dandana m ban m moon ki bui nimi tibɔnyaan ti m ŋun Uwumbɔr Mpɔɔnsakpiindaan chee na; uma le ye nimi Israel yaab Aawumbɔr.

Edom yaab aabɔr

¹¹ Edom yaab aabɔr sɔ. Ubaa bi Edom ki baa mi ke, “Ukikiir, bayoonn aan kitaak ga woln? Bui mi naah ga yunn pu aan kinyeek doo na.”

¹² Le m gar u ke, “Kichakpiik ni choo, le kinyeek mu ga ki gir ni. Aa yaa ki ban aa baa kan, aa gir ni ki nan ki baa.”

Arabia yaab aabɔr

¹³ Arabia yaab aabɔr sɔ. Nimi Dedann aanib, nimi bi chuun ki tiir kitiirk ki doo Arabia aatingbaln li kaa kpa nibaa na pu na,

¹⁴ tiin man binib bi nnyunyuu joo bi na nnyun. Nimi Tema aatiŋ aanib, tiin bikusam na tijikaar man.

¹⁵ Bi san ke bi ŋmar kijaak aajum mu ban mu ku bi na chee, ni itɔi i gor ke i too na, ni butɔb aabɔbir chee la.

¹⁶ Le Uwumbɔr bui mi ke, “Libiln libaa mɔk na, Kedar aanibol aapɔɔn mɔmɔk ga doo.

¹⁷ Bijab bi too itɔi na le kaar sakpen Kedar aajab ni, le bi ponn ni siib le ga gur. Min, Israel yaab Aadindaan Uwumbɔr le len kina.”