Aisaya 20 - Uwumbɔr aagbaŋ

Uwumbɔr aabɔnabr u chuun uŋmeen na aamɔkl

¹ Asiria aabɔrkpaan Sargonn nan cha waatɔb aajab aaninkpel ti tak Filistia aatikpaan Asdod.

² Ŋibin ŋitaa waahr aan nimina nin ŋa na, Uwumbɔr nan bui Amos aajapɔɔn Aisaya ke u takr waanaatak ki peer tiwanpeenkaan ni saak kuub na. U nan kii Uwumbɔr aamɔb ki nan gur chuun uŋmeen kaa tak ŋinaatak.

³ Buyoonn bi nan nyaŋ Asdod aatiŋ na, Uwumbɔr nan ki bui ke, “Maatutunn Aisaya nan chuun uŋmeen, kaa tak ŋinaatak mu, ŋibin ŋitaa. Nimina le ye limɔkl ki mɔk tiwan ni ga ŋa Ijipt ni Kus aatim na.

⁴ Asiria aabɔrkpaan ga di biyom bi u chuu ŋitingbaln ŋilee ngbaan ni na di buen biŋmeen, kaa tak ŋinaatak mu. Mbim ni bininkpiib mɔmɔk ga chuun biŋmeen, kaan li tak ŋinaatak mu, le bimunjal dɔ; nimina le ga joo ni inimɔɔn nan tii Ijipt aatiŋ.

⁵ Binib bi di naadii tii Kus aatiŋ ki kpa kipupuk Ijipt aatiŋ pu na ga bee ke bi nan di bibaa mee la.

⁶ N‑yoonn ngbaan yaa nan fuu ni kan, binib bi koo Filistia yaab aatiŋ, nnyusakpem aagbaan chee na, ga bui ke, ‘Lik man tiwan ni ŋa binib bi ti nan di tibaa tii bi ke bi li kii timi Asiria aabɔrkpaan chee na. Ti ga ŋa kinye aan ki tee ŋmar?’”