Aisaya 2 - Uwumbɔr aagbaŋ

Nsuudoon mu kaa kpa ndoon na

¹ Uwumbɔr aah nan di Juda ni Jerusalem aatim aabɔr ti tuk Amos aajapɔɔn Aisaya na sɔ:

² N‑yoonn choo, le lijool li pu Uwumbɔr Aadichal si na ga li ye lijool li paa jer ŋijoo mɔmɔk na, li ga li fɔk chaar jer ŋigongon mɔmɔk, le ŋinibol pam ga dan li chee,

³ le ŋaanib ga bui ke, “Cha ti jon man Uwumbɔr aajool ki buen Israel yaab Aawumbɔr aadichal ni. U ga mɔk timi waah ban ti ŋa pu na; le ti ga chuun waah lee isan i na pu; Uwumbɔr aamɔkm nyan ni Jerusalem ni la; Sionn pu le u len waanib chee tibɔr.”

⁴ U ga len ŋinibokpaan aabɔr, le bi ga di baajaak aajum mɔɔ ŋikuu, ki di baakpaatunn mɔɔ gɔrk tiib. Ŋinibol aan ki to tɔb butɔb, kaan ki gor bibaa kiir butɔb daalbaadaal.

⁵ Nimi Jakob aayaabitiib, cha ti li gur chuun man nwiihn mu Uwumbɔr di tii timi na ni.

Kigaak ga kuln

⁶ Uwumbɔr, aa yii saanib, Jakob aayaabitiib. Ki nya liwipuul wɔb ki ti saa Filistia aatiŋ ni mɔmɔk ye nin chee inyɔk aatuln gbii na la, le Israel aanib mu dii biwɔwɔm ngbaan aakaal.

⁷ Salmaa ni tikunabr le gbii kitiŋ ngbaan ni, le ubaa aa nyi baapɔɔn mɔk. Itaan le gbii baatiŋ ngbaan ni, le ubaa aan ŋmaa kahn baataan aatɔroku tiib.

⁸ Ŋiwaa le gbii baatiŋ ngbaan ni, le bi chuun toor tiwan ni bi di bibaa aaŋaal ŋa na.

⁹ Bi mɔmɔk ga ji inimɔɔn. Uwumbɔr, taa di cha pinn bi.

¹⁰ Bi mɔmɔk ga bɔr titakpalunn ni, ni ŋitakpasakpiin taab, ŋijoo paab, ke bi ŋmar Uwumbɔr aaŋuul, ni waapɔɔn, ni waawiihn sakpiin chee.

¹¹ Nwiin mubaa choo, buyoonn unibɔn aagaak ga doo aan kalmbaani mu kuln na. N‑yoonn ngbaan le Uwumbɔr baanja ga kan bunyuŋ.

¹² Liyaadaal ngbaan Uwumbɔr Mpɔɔnsakpiindaan ga sunn mpɔɔndam, ni kalmbaanidam, ni kigaadam mɔmɔk taab.

¹³ U ga tur Lebanonn ni Basann aasui fɔfɔk na mɔmɔk lii kitiŋ.

¹⁴ U ga ber ŋijoo ni ŋigongon ŋi fɔk na mɔmɔk,

¹⁵ ni tidir ti fɔk na mɔmɔk, ni ŋigon ŋi bi maa gob kitiŋ na mu.

¹⁶ U ga cha iŋɔsakpiin i ŋan na bee nnyun ni.

^17-18 Unibɔn aagaak ga doo, le unibɔn aakalmbaani mu kuln. Ŋiwaa mɔmɔk ga kuln, le Uwumbɔr baanja le ga kan kipak ni nnyuŋ nwiin ngbaan daal.

¹⁹ Buyoonn Uwumbɔr ga dan ki nan deŋ kitiŋ na, binib ga bɔr titakpalunn ni, ni ŋitakpasakpiin taab, ŋijoo paab, ke bi ŋmar waaŋuul, ni waapɔɔn, ni waawiihn sakpiin chee.

²⁰ Nwiin ngbaan yaa fuu ni kan, bi ga di baah di salmaa ni tikunabr maa ŋiwaa ŋi na mee, ki san cha ŋi, ki di ŋi tii ŋinaasɔn ni tinanjenn.

²¹ Uwumbɔr yaa nan dan ke u nan deŋ kitiŋ kan, binib ga bɔr titakpalunn ni, ni ŋitakpasakpiin taab, ŋijoo paab, ke bi ŋmar waaŋuul pu, ki bɔr waapɔɔn ni waawiihn sakpiin chee.

²² Aa yaa di aabaa tii unibɔn u ga kpo na kan, ba aanyoor bi kpa?