Aisaya 19 - Uwumbɔr aagbaŋ

Uwumbɔr ga daa Ijipt yaab aatafal

¹ Ijipt aatiŋ aabɔr sɔ. Uwumbɔr ka ntaalangbam pu ki choo Ijipt aatiŋ ni. Ijipt yaab aawaa aawon gbaa la. Ijipt aanib aataakpab yɔl a.

² Uwumbɔr len ke, “M cha butɔb fii Ijipt aatiŋ ni, ki cha unii ni una aabo fenn lir tɔb pu, ki cha unii ni umaantɔ fenn lir tɔb pu. Ntim mu ye tɔb puchatiib na ga fenn lir tɔb pu, le bibɔrb mu li kpak tɔb ki ban mpɔɔn.

³ M ban m bii Ijipt yaab aah kpokl pu na ki yɔl bitaakpab la. Bi ga buen ti bui baawaa ke ŋi ter bi, ki ga buen bipɔnijoob ni bitekpiib chee ke bi mɔk bi baah ga ŋa pu na.

⁴ M ga di Ijipt yaab tii ubiindaan ubaa, ubɔrkpaan u kpa mbiin sakpen na, le u li joo bi. Min, Uwumbɔr Mpɔɔnsakpiindaan le len kina.”

⁵ Nail aamɔɔl aanyun ga foor, aan limɔɔl ngbaan ga li ŋani kina le ki ti kuur.

⁶ Inyunsan ngbaan ga li foor suusuu suusuu, ki nuŋ, le ki ti kuur. Timɔɔmoor ni tikal ga yɔl,

⁷ le tijikaar ti mɔmɔk bi bun Nail aamɔɔgbaln na ga kuur, le libuln daa ti buen.

⁸ Binib bi ye bijanbam ki chur ijan Nail aamɔɔl ni na ga ker idun ki wii; baapɔr ni ijapiin ga bee fam.

⁹ Binib bi mɔmɔk luu agoo aakeken na aasui ga bii;

¹⁰ bikpaluub ni biwanŋab mɔmɔk aasui ga bii.

¹¹ Soann aatiŋ aaninkpiib ye bijɔrb la. Ijipt aalandam aasurm ye kijɔrk la. Ŋma ŋmann bi ke bi bui ubɔrkpaan ngbaan ke bima le nab n‑yaayoonn na aagbanyib ni bibɔrb na pu?

¹² Ijipt aabɔrkpaan, saalandam bi sur si na bi la? Nibaakan bi ga ŋmaa tuk si Uwumbɔr Mpɔɔnsakpiindaan aah ban u ŋa nimi Ijipt yaab pu na.

¹³ Soann ni Memfis aatim aaninkpiib ye bijɔrb la. Baatuln le nan ye ke bi joo litimbol, le bi tee di bi yenn.

¹⁴ Uwumbɔr le cha bi joo nsurm mu kaa ŋan na sur binib. Kina pu na, Ijipt yaab aah ŋani tiwan ni mɔmɔk na aa ŋan, ki bi ke udagbiir aah ŋar waawuln ponn ni pu na la.

¹⁵ Ubaa aa bi Ijipt ni, biwankpadam ni bigiim, bininyuum ni baah kaa nyi binib bi bɔr na, aan ŋmaa ter bi.

Ijipt yaab ga doon Uwumbɔr

¹⁶ N‑yoonn mubaa choo le Ijipt yaab ga nan li diin ke bipiib na. Uwumbɔr Mpɔɔnsakpiindaan yaa taln uŋaal ke u daa bitafal kan, biwon ga li gbaa ijawaan pu la.

¹⁷ Ijipt yaab ga san Juda yaab ijawaan n‑yoonn mumɔk bi teer bi Uwumbɔr Mpɔɔnsakpiindaan aah gor ntafadaan mu kiir bi na.

¹⁸ N‑yoonn ngbaan yaa nan fuu ni kan, bi ga li len Israel yaab aaliin, Ijipt aatim muŋmu ni la. Nima chee aanib ga li gur puur baapuur Uwumbɔr Mpɔɔnsakpiindaan aayimbil pu la. Ntim ngbaan kibaa aayimbil le ga li ye ke, “Nwiin Aatiŋ.”

¹⁹ N‑yoonn ngbaan yaa nan fuu ni kan, Uwumbɔr Mpɔɔnsakpiindaan aatork aabimbiln ga li bi Ijipt aatiŋ pu, le bi ga maa ligoln waayimbil pu Ijipt aatiŋ aanaanmɔk.

²⁰ Libimbiln ni ligoln ngbaan ga li ye limɔkl ki mɔk ke Uwumbɔr Mpɔɔnsakpiindaan bi Ijipt aatiŋ ponn ni la. Limukl yaa pii nima chee aanib aan bi yin Uwumbɔr aayimbil ki ban nterm kan, u ga tun unii aan u ti gaa bi lii.

²¹ Uwumbɔr ga di ubaa mɔk Ijipt aanib, le bi ga bee u ki doon u, aan ki joo ni kitork ni ipiin nan tii u. Bi ga puu tipuur bamɔnn tii u le ki ŋa baah puu pu na.

²² Uwumbɔr ga daa Ijipt aanib aatafal, le ki mu ga ki sɔŋ bisui. Bi ga fenn dan u chee, le u ga ŋun baameel, le ki nyan bi baafalaa ni.

²³ N‑yoonn ngbaan yaa nan fuu ni kan, nsanja ga li bi ki nya Ijipt aatiŋ ni ki cha Asiria aatiŋ ni. Ŋitingbaln ŋilee ŋimina ga chuun koo tɔb ni, ki kpaan tɔb chee ki doon Uwumbɔr.

²⁴ N‑yoonn ngbaan yaa nan fuu ni kan, Israel, ni Ijipt, ni Asiria aatingbaln ga kpaan tɔb chee, le ŋitingbaln ŋitaa ngbaan ga li ye tinyoor sakpenn ki tii dulnyaa mɔmɔk.

²⁵ Uwumbɔr Mpɔɔnsakpiindaan ga ŋa waanyoor ŋa ŋi pu, ki bui ke, “M ga ŋa tinyoor ŋa nimi Ijipt yaab bi ye maanib na; ni nimi Asiria yaab bi m naan bi na, ni nimi Israel yaab bi ye maanib na pu.”