Aisaya 18 - Uwumbɔr aagbaŋ

Uwumbɔr ga daa Kus aatiŋ yaab aatafal

¹ Kifuuk ki naahn ifeen aafuuk na nyan ni Kus aamɔɔ aapuwɔb kitiŋ kibaa ni.

² Kitiŋ ngbaan ni le bininkpiib bi si baatiŋ aasisiiyaan na nyan ni Nail aamɔɔl ni, ki bi iŋɔi i bi di tikal ŋa i na ni. Ntuun tiib bi ŋmaa chuun mala mala na, gir kun man. Gaa man inaŋ ki di buen nimi aatiŋ ki ŋimɔɔ yakr ki, aan ki ye litimbol li kpa mpɔɔn sakpen, aan kaanib fɔk, aan biwon joon kpal kpal, bi dulnyaa mɔmɔk aanib san bi ijawaan na chee.

³ Unii umɔk bi kitiŋ kee pu na, li pel man. Lik ban limɔkl aatuutaa u ga fii paacham ŋijoo pu na man. Li pel man ukpiin aah wii pu na.

⁴ Uwumbɔr bui mi ke, “M ga li bi kitaapaak ki lik ni suuna ke lijikaacheel yoonn aamaln aah naani kinyeek pu na, ki lik chimm ke nwiin aah wiin nwiin pu pu na.

⁵ Waahr aan bi nin ker ŋisubil na, buyoonn mpuun gbar aan ŋi bi puir na, bidim ga kuln Kus aatiŋ yaab mala ke kijuk aah geei nsubon pu na.

⁶ Baatɔb aajab bi kpo butɔb ni na aanikpol ga li dɔ, le inyoon ni ipeel i bir na ji. Kitotoŋ yoonn le inyoon ga ji ŋinikpol ngbaan, le ipeel mu ŋmɔ ŋi kakab yoonn.”

⁷ N‑yoonn choo le Uwumbɔr Mpɔɔnsakpiindaan ga nan gaa ipiin nyan ni kitiŋ ki ŋimɔɔ yakr ki na chee, litimbol ngbaan le kpa mpɔɔn ki pɔɔ, le ki kpa binib bi fɔk, aan biwon joon kpal kpal, aan dulnyaa wee aanib san bi ijawaan na. Bi ga li joo ni ipiin ngbaan ki dan Sionn aajool pu, nin chee bi dooni Uwumbɔr Mpɔɔnsakpiindaan na.