Aisaya 17 - Uwumbɔr aagbaŋ

Uwumbɔr ga daa Siria ni Israel yaab aatafal

¹ Uwumbɔr len ke, “Damaskus aan ki li ye kitiŋ sakpeŋ; ki ga li gur ye ŋilangbentanjal ŋmeen la.

² Binib ga san cha Siria aatim mɔmɔk. Mu ga li gur ye inaa ni ipiih aah ŋmɔ timoor nin chee, aan ubaa aan san jenn i na la.

³ Israel aatiŋ aan ki li kpa unii u ga li kii ki na, le Damaskus aatiŋ aan ki li bi kibaa pu. Siria yaab bi ŋmar na ga ji inimɔɔn ke Israel yaab aah ji inimɔɔn pu na la. Min, Uwumbɔr Mpɔɔnsakpiindaan le len kina.”

⁴ Uwumbɔr ki len ke, “Nwiin mubaa choo, le Israel aapɔɔn ga doo, le kaawangol ga kpaln igiin.

⁵ Kaatiŋ ga li naahn bukpaab bu bi bar ŋikalmaan ki cha bu na la, ni ga li bi ke baah chee njikaabim ki cha Refaim Aafataŋ ni aakpaakon pu na la.

⁶ Binib siib baanja le ga gur, le Israel aatiŋ ga li gur bi ke baah ker olif aasubil ki cha lisubil libaabaa bu aapaacham pu na, bee siisiib ŋi gur bu aataab aasubon pu pu na la. Min, Israel yaab Aadindaan Uwumbɔr le len kina.”

⁷ Nwiin ngbaan daal yaa fuu ni kan, binib ga fenn ki ban nterm u naan bi na chee; uma le ye Israel yaab Aawumbɔr u bi chain na.

⁸ Baan ki li lik ban baah nan di biŋaal maa ŋiwaabimbin ŋi na, kaan ki tii bibaa aaŋaal aah ŋa liwaapii Asera ni ŋiwaabimbin nin chee bi seer nnyɔknii na naadii.

⁹ Nwiin ngbaan daal yaa fuu ni kan, ntisakpem mu bi kii mu mbamɔm na ga gur nkuun ni ŋilangben ke ntim mu Hif yaab ni Amor yaab nan san cha buyoonn Israel yaab nan choo na la.

¹⁰ Israel yaab, ni suln Uwumbɔr bɔr; uma le nan nyan ni nimi ki kii nimi ke litakpasakpeln na. Naah tee ŋa pu na le ye ke ni ŋum ŋisubil aasui le ki dooni ŋiwaa.

¹¹ Hali isui ngbaan yaa punn ki guu ŋeen liwinbaal kan, naan kan nibaa i pu. Naah ga kan pu na le ye falaa ni iween i kaan sɔŋ na.

Bidim aatimbol lir a

¹² Ŋitimbol ŋi kpa mpɔɔn na aalan ŋmal, le bi kpa kifuuk ki naahn nnyusakpem aanyunkpenn aafuuk, ki yur ke tinyunkpenn ti wiir na.

¹³ Ŋitimbol san ni ke tinyunkpenn na, le Uwumbɔr teen bi pu, le bi gir bipuwɔb mala ke kitangbaak aah san sunni ligongoln taab pu na, ki naahn kimook aah bi kinaakpaajabuŋ ponn ni pu na.

¹⁴ Kijook kan, bi kpa ijawaan, le kichakpiik ni kan, bi buen a. Unii umɔk gaa timi aatiŋ aawan mpɔɔn na aadoon le na.