Aisaya 16 - Uwumbɔr aagbaŋ

Tibɔbir ti ga pii Moab aanib na

¹ Sela aatiŋ ki bi nteersakpiin pu na, le Moab aanib di upihbo tun tichandaan, uja u joo Jerusalem na chee.

² Bi nan si Anonn aamɔɔl aagbaan le ki kii, kaa nyi baah ga ŋa pu na, aan ki di ti nya do, ki nan nya do, ke inyoon i bi jenn nyan i yaanyondil ni na.

³ Le bi bui Juda yaab ke, “Bui timi taah ga ŋa pu na. Gaa timi lii ke mboon aah gaal unii lir nwiin pu pu na, ki cha ti fuur niŋaal ni. Ti ye bikusam la; bɔr timi nin chee ubaa aan ŋmaa kan timi na.

⁴ Cha ti kal nimi aatiŋ pu man. Gaa timi lii binib bi ban bi kuln timi na chee man.” Tɔ, limukl ni mbiin ga doo, le binib bi ban bi kuln kitiŋ ngbaan na mu ga doo.

⁵ Le Ubɔrkpaan David aayaabil ubaa ji nnaan, le ki ga li joo binib ngbaan mbamɔm, ni ngeehm ni. Tiwan ni ye ibamɔn na, u ga ŋa ni mala kaan li taani, ki kan ke ibamɔn le ga li tun lituln.

⁶ Juda aanib ga bui ke, “Ti ŋun Moab aanib aah kpa kigaak pu na. Ti nyi baah kpa inimpoo ki kpa kipupuk ni kigaak pu na, le baapupuk ngbaan ye fam la.”

⁷ Moab aanib ga wii baafalaa u bi jin na pu. Bi mɔmɔk yaa teer baah nan ji tijikaar nyaan ti Kir Heres ni na pu kan, bi ga wii. Biwon ga yɔl.

⁸ Tisar ti bi Hesbonn chee na, ni ŋisubil aasui aasar ti bi Sibma na mɔmɔk bii doo; ŋisubil ngbaan aadaan le ŋitimbol aabɔrb nan nyu ki gbii. N‑yoonn mubaa isui imina aabon taln ti nyan Jaser aatiŋ ni, ki taln buen liwipuul wɔb, nteersakpiin ni, ki taln buen liwilir wɔb ki ti saa nnyusakpem aagbaan.

⁹ Dandana m wii Sibma aatiŋ aasui ngbaan pu ke maah wii Jasar aatiŋ pu pu na. M wii tii Hesbonn ni Eleale aatim; ba pu? nibaa aa bi aan binib ngbaan ga chee aan ni mɔɔr bi.

¹⁰ Ubaa aa ki bi ikpaakon i nan kpa tijikaar na ni ki kpa mpopiin. Ubaa mu aa ki bi ŋisubil aasar ni ki tar ki gaa ilahn. Ubaa aa ki tun ndaan aatuln nima; le mmɔɔn aafuuk na ŋmin.

¹¹ M ker idun ni mpombiin, Moab ni Kir Heres aatim aanib pu.

¹² Moab aanib ŋani bibaa falaa ki chaa baatingban, ni baameen aadir ni ke bi ti mee baawaa, le naan ŋa bi tinyoor tibaa.

¹³ Tibɔr ti Uwumbɔr nan puen di nabr tii ni Moab yaab na le bi na.

¹⁴ Le dandana wee Uwumbɔr bui ke, “Joo cha ni ŋibin ŋitaa na Moab aawangol mɔmɔk ga wɔŋ. Kaanipaak na ponn ni siib le ga ŋmar, le ki mu aan li kpa mpɔɔn kpala.”