Aisaya 15 - Uwumbɔr aagbaŋ

Uwumbɔr ga kuln Moab aatiŋ

¹ Moab yaab aanaŋ sɔ. Kinyeek kibaa le Ar ni Kir aatim ga bii, le ni mɔmɔk ga ŋmin chii.

² Dibonn yaab jon ligongoln paab ki ti wii kiwaachuk ni. Moab yaab wii Nebo ni Medeba aatim aanib pu; bi kuu biyikpir ni bilangban mpombiin pu.

³ Binib bi chuun kitiŋ ponn ni na pee tiwan ni saak kuub na la; kitiŋ ponn ni, ni ŋidichal paab mɔmɔk binib kaani le ki wii ikpowiil.

⁴ Hesbonn ni Eleale aanib wii la, le Jahas aatiŋ aanib ti ŋun baawiil pu. Hali butɔb aajab aawon gbaa la, le bitaakpab yɔl.

⁵ Mpobil wu Moab yaab pu la. Binib ngbaan san buen Soar ni Eglaf Selisiya aatim ni. Bibaa san jon Luhif aasan pu, ki wii le ki cha; bibaa mu san ŋmar buen Horonaim, ki wii mpɔɔn pu.

⁶ Nnyun mu nan bi Nimrim aabun ni na foor a, timoor ti si mbun aagbaan na mɔmɔk yɔl a, le tiwasɔnn nibaa aa gur ki si.

⁷ Binib joo baawangol san puur cha Isui aafataŋ ni, ke bi di san ŋmar.

⁸ Moab aatiŋ aanaanmɔk mɔmɔk chee ye iwiil, le Eglaim ni Beer Elim aatim ni yaab ŋun iwiil ngbaan pu.

⁹ Dibonn aamɔɔl aanyun kpaln nsin la, le Uwumbɔr beenin kpa tibɔbir ti jer kina na ki tii nima aanib. Mbamɔn, ichinn ga ku binib bimɔk gur Moab aatiŋ ni na la.