Aisaya 14 - Uwumbɔr aagbaŋ

Baah nan chuu bi buen tinaagbiir ni na gir ni

¹ Uwumbɔr ga ki gir san waanib Israel yaab kinimbaak ki lee bi ke uyaab. U ga ki cha bi ki koo baatiŋ ponn ni, le biwɔwɔm ga dan nan li bi bi chee.

² Ŋitimbol pam le ga ter Israel yaab aan bi ki gir ni kitiŋ ki pu Uwumbɔr nan di tii bi na, le ŋitimbol pam ga li ye Israel yaab aanaagbiib ki tun lituln tii bi. Israel yaab ga ki nyaŋ binib bimɔk nan nyaŋ bi ki chur bi tinaagbiir na; le Israel yaab ga li gur joo binib bi nan muk bi na.

Babiloŋ aabɔrkpaan koo kitekpiitiŋ ni

³ Uwumbɔr ga nyan Israel yaab baaween, ni baamuk ni, ni ŋitupɔɔl ŋi bi nan muk bi bi tun ŋi na.

⁴ U yaa ŋa nimina kan, u ga cha bi ŋa Babiloŋ aabɔr mbɔnyun ki len ke: “Ubɔrkpaan mbiindaan na lir a. Waan ki muk ubaa.

⁵ Uwumbɔr kuln bitinjoob titunwanbirdam na aapɔɔn.

⁶ Bi nan joo liŋuul muk binib bi bi nan chur bi tinaagbiir na, ki ŋani bi falaa n‑yoonn mɔmɔk.

⁷ Dandana ma kan, dulnyaa mɔmɔk kan mpopiin ni lifuur, le unii mɔmɔk gaa mpopiin aalahn.

⁸ Santina aasui ni isui imɔk ŋan ki bi Lebanonn na kpa mpopiin ubɔrkpaan u lir na pu; ba pu? ubaa aa ki bi ki ga ki gaa i lii, waah kaa ki bi dandana pu pu na.

⁹ “Kitekpiitiŋ gor kibaa, ki kii ki nan doon Babiloŋ aabɔrkpaan ngbaan. Bipɔɔndam bi nan bi kitiŋ kee pu na aawiin bi gor ki kii la. Bibɔrkpaam aawiin bi fiir nya baabɔrjal pu la.

¹⁰ Bi mɔmɔk yin ki bui u ke, ‘Dandana aa diŋ ke timi na la. Aa gur ye ti ponn ni ubaa la.

¹¹ Bi nan joo tibar gaa ilahn ki nyuŋni si, le dandana ma aa gur bi ti chee kitekpiitiŋ ni do la. Aa gur dɔ ŋikpaambil aawandookaan pu la, le ŋi bii aawon mɔmɔk pu.’”

¹² Babiloŋ aabɔrkpaan, aa nan ye ke kichakpiik ni aaŋmabil na, le dandana aa nyan kitaapaak ki ker lir ni kitiŋ. N‑yoonn mu jer na, aa nan chur ŋitimbol tinaagbiir, le dandana ma, bi mee si lii kitiŋ.

¹³ Aa nan pɔɔni aabaa ke aa jon buen kitaapaak ki ti di saabɔrjal tɔŋ iŋmabi i ti bi paacham paacham na pu. Aa nan dak ke aa ga ti kal lijool li bi nwiin aasikakl wɔb, nin chee ŋiwaa kuun ni na, ke ubɔrkpaan na la.

¹⁴ Aa nan bui ke aa jon ti kal ntaalangbam paab ki bi ke Mpɔɔndaan Uwumbɔr na.

¹⁵ Le u tee joo ni si di dan taab taab nin chee nyoo sakpen na, kitekpiitiŋ ni.

¹⁶ Bitekpiib ga li waa bimɔi le ki lik si. Bi ga baa ke, “Naa ye uja wee le nan dam kitiŋ ki cha bibɔrkpaam aawon gbaa na aa?

¹⁷ Uja wee le aa nan bii ntikpaam ki labr dulnyaa di ŋa nteersakpiin nin chee nibaa aan ŋmaa punn na aa? Naa ye uja umina le aa nan kii ke waanaagbiib kun bido na aa?

¹⁸ Bibɔrkpaam mɔmɔk dɔ baakaakunyaan ni,

¹⁹ le aa ma aa kpa likaakul, le bi di si mee ke aa bur. Bi di butɔb aajab bi bi ku bi butɔb ni na aanikpol le di biin aa pu, ki di ni mɔmɔk mee ŋa kitanbuuk ni, ki taa taa ni pu,

²⁰ ba pu? saah kuln saatingbaln ki ku saanib na, nima pu na, baan sub si ke bibɔrkpaam biken na. Saamaal mu ye titunwanbir aamaal na ponn ni ubaa aan ŋmar.

²¹ Cha linikul piin man. Ubɔrkpaan umina aajapɔtiib ga kpo biyaajatiib aatunwanbir pu. Bi ponn ni ubaa aan ki joo kitiŋ kee, ki mu aan maa ntim ki pu.”

Uwumbɔr ga bii Babiloŋ aatiŋ

²² Uwumbɔr Mpɔɔnsakpiindaan len ke, “M ga tak Babiloŋ ki kuln ki, kaan di cha nibaa. Maan di cha mbim, ubaa aan ŋmar kpala. Min Uwumbɔr le len kina.

²³ M ga labr Babiloŋ ŋa kipuuk la, ifiin le ga li bi nima. M ga di ŋŋaan mu ŋar tiwan mɔmɔk na le ŋar Babiloŋ aatiŋ. Min Uwumbɔr Mpɔɔnsakpiindaan le len kina.”

Uwumbɔr ga kuln Asiria yaab

²⁴ Uwumbɔr Mpɔɔnsakpiindaan puu tipuur ke: “Maah ŋa maalandak pu na, kina le ga ŋa. Maah bui ke m ga ŋa pu na, kina le ga ŋa.

²⁵ M ga kuln Asiria yaab bi bi maatiŋ Israel ni na, ki taa taa bi pu maajoo pu, ki nyan maanib falaa u Asiria yaab ŋani bi na ni, ki gaa bi lii.

²⁶ Maah ŋa maalandak mu ki tii dulnyaa na le na, le m fii sil ke m daa ŋitimbol aatafal.”

²⁷ Uwumbɔr Mpɔɔnsakpiindaan puu ke u ga ŋa nimina; u fii sil ke u daa binib aatafal, le ubaa aan ŋmaa kiir u ke u taa ŋa kina.

Uwumbɔr ga kuln Filistia yaab

²⁸ Libiln li ponn ni ubɔrkpaan Ahas kpo na le tibɔr tee nan nyan ni.

²⁹ Filistia yaab, lidabil li bi di gbaa nimi na koo a, ni mu taa tee laa man. Uwaa ubaa yaa kpo kan, u bir jer uma ngbaan na ga dan nan gaa waabuul ni. Uwaa aajeln kaal kiwanbiik la.

³⁰ Uwumbɔr le ga kpaa waanib bi ye bigiim na, ki tii bi ŋŋmarm. U ga cha nkon lir nimi Filistia yaab pu, le mu aan cha ni ponn ni ubaa ŋmar.

³¹ Nimi Filistia aatim mɔmɔk, li wii ki gbei ki ban nterm man. Ni mɔmɔk san ijawaan man. Kitangbaak sakpeŋ kibaa nyan ni ŋŋangan wɔb ki choo, ni ye bijakaab ŋmeen la, bijawaandam aa bi bi ponn ni.

³² Kinye aan ti ga gar ituun i nyan ni Filistia yaab chee na? Ti ga bui bi ke Uwumbɔr maa Sionn siin, le waanib bi nan ji falaa na ga kan lifuur nima chee.