Aisaya 13 - Uwumbɔr aagbaŋ

Uwumbɔr ga daa Babiloŋ yaab aatafal

¹ Amos aajapɔɔn Aisaya aah gaa Uwumbɔr chee Babiloŋ aanaŋ i na sɔ:

² Ligongoln li kaa kpa nibaa na pu le butɔb aatuutaa fii. Teen ki bui butɔb aajab ngbaan, ki yoor aaŋaal paacham ki mɔk bi ke bi ti tak kitisakpeŋ ki kpa kipupuk na aabisamɔi.

³ Uwumbɔr yin waatɔb aajab bi kpa kigaak ki nyi bibaa pu na ke bi nan jan mbamɔn aajaak ki daa waah gee binib bi pu liŋuul na aatafal.

⁴ Li pel kifuuk ŋijoo ngbaan pu man, ni ye kinipaak sakpeŋ aafuuk; kifuuk ngbaan ye ŋitimbol ni nnaan aanib le bi kuuni tɔb chee. Uwumbɔr Mpɔɔnsakpiindaan le bi gor bijab ke bi buen butɔb.

⁵ Bi nyan ni dandar aatimbol ŋi bi kitiŋ kee aadoon chee na la. Uwumbɔr aaŋuul pu le u choo ke u bii kitiŋ mɔmɔk doo.

⁶ Li wii man iween pu. Uwumbɔr aawiin duun ni a, bundaal uma Mpɔɔnsakpiindaan ga joo ni libiil na duun ni a.

⁷ Unibɔn mɔmɔk aawon ga yɔl, le ujakaan mɔmɔk ga san ijawaan.

⁸ Ijawaan ga chuu bi mɔmɔk, le iween nyaŋ bi, ke imalween aah nyaŋni upudaan pu na. Bi ga li lik tɔb ki san ijawaan la, le inimɔɔn ga ku bi.

⁹ Uwumbɔr aawiin choo, nwiin mu ga joo ni libiil, ni liŋuusakpeln, ni libiil li wu ke mmii na choo. Kitiŋ kee ga kpaln kitiŋ ki kaa kpa nibaa ki pu na la, le titunwanbirdam mɔmɔk ga doo.

¹⁰ Iŋmabi mɔmɔk aan ki li wiin, le nwiin ga bɔln kaan ki li wiin, le uŋmal mu aan ki li wiin.

¹¹ Uwumbɔr len ke, “M ga joo ni falaa kitiŋ kee pu aan ki daa titunwanbirdam mɔmɔk aatafal baatunwanbir pu. Umɔk kpa kigaak ni mbiin na, m ga daa utafal ki sunn bigaadam mɔmɔk taab.

¹² Binib bi ga ŋmar na aan li ban kani ke salmaa aah kaa ban kani pu na la.

¹³ Nwiin mundaal aan min Uwumbɔr Mpɔɔnsakpiindaan ga mɔk maaŋuul na, m ga cha kitaapaak deŋ, le kitiŋ mu ga dam ki nya kaah si nin chee na.”

¹⁴ “Biwɔwɔm bi bi Babiloŋ ni na ga san gir baatim ni, ki yaa ke upeeman aah san ŋmar ukpan chee pu na, ki mu ga li bi ke ipiih i kaa kpa upihkpaal na aah bi pu na.

¹⁵ Bi ga di kijuk saa ku unii umɔk bi ga chuu u na.

¹⁶ Bi ga li si lik kaa ŋmaa ŋa nibaa le bi chur baabim ti gbaa ku bi, le ki koo yoor baawan baadichal ponn ni, aan ki chur bipuutiib ki doon bi chee mpɔɔn.”

¹⁷ Uwumbɔr ki len ke, “M bi saar Media yaab ke bi ti tak Babiloŋ yaab la. Bitafal aan li bi tikunabr ni, le salmaa mu aan li mɔ bi.

¹⁸ Bi ga di itɔi ni ipiin le ki di ku binachipɔm. Baan san mbipɔm ni mbim kinimbaak.

¹⁹ Babiloŋ aanaan le ŋan jer nnaan mɔmɔk; le mu aanib kpa kipupuk mu pu. Le min Uwumbɔr ga kuln Babiloŋ ke maah nan ŋa Sodom ni Gomora aatim pu na.

²⁰ Ubaa aan ki li bi ki ponn ni. Arab yaab bi chuu kpak na ubaa aan ki ŋa waanambuŋ nima, le upihkpaal ubaa mu aan ki di waapiih buen nima i ti ŋmɔ timoor.

²¹ Ki ga kpaln nin chee timoor ni aapeel, ni ifiin ga li koo na la. Taataa mam ni ipeel ga li san nima la.

²² Takɔ tiib ni ikakal yaa wii nima kan, ni ga li keei tidir fɔfɔk na, ni ŋibɔrdichal na ni la. Babiloŋ aayoonn fuu ni a. Kaawiin doo a.”