Aisaya 11 - Uwumbɔr aagbaŋ

Nsuudoon aatimbol

¹ Baah gaa busub lii aan ibonpɔɔn ki kpenn pu na, kina le ubɔrkpaan David aamaal ponn ni bi. Ubɔrkpaan pɔɔn ga ki nyan ni David aayaabitiib ni.

² Uwumbɔr Aafuur nyaan ga tii u nlan, ni ichiin, ni nnyim mu u ga di joo waanib na. U ga li nyi Uwumbɔr aageehn ki ga nyuŋ u,

³ le ki ga kii waamɔb ni mpopiin. U ga li joo waanib ibamɔn ni,

⁴ u ga di bigiim ni binib bi kaa kpa biteterb na aabamɔn tii bi. Waamɔliin le ga daa binib aatafal, le titunwanbirdam ga kpo.

⁵ U ga joo waanib mbamɔm ni kinyaan.

⁶ Ŋisapol ni ipiih ga kpaan koo tɔb chee ni nsuudoon, le inaamuun ni iŋobi ga kpaan doon tɔb chee. Inaabi ni ichinn aabim ga kpaan ji tɔb chee, le mbiwaatiib le ga li kpaa i.

⁷ Inaa ni tipeewanbir ga kpaan ji, le yaabim ga kpaan doon tɔb chee ni nsuudoon. Ichinn ga ŋmɔ timoor ke inaa na.

⁸ Hali, ubo yaa gbiir uwaa u kpa liluul na chee kan, waan ŋa u nibaa.

⁹ Uwumbɔr aagongoln Sionn li bi chain na paab nibaa aan li bi nima ki bir. Nnyusakpem ponn ni aah kpa nnyun sakpen pu na, kina le dulnyaa wee ga li nyi Uwumbɔr bɔr.

Baah nan chuu bi buen tinaagbiir ni na ga gir ni

¹⁰ Nwiin mubaa choo, le ubɔrkpaan pɔɔn ubaa ga nyan ni ubɔrkpaan David aamaal ni, ki fuu ni, ki ga li ye ŋitimbol mɔmɔk aamɔkl. Bi ga kuun waanaan aatiŋ ni ki nyuŋ u.

¹¹ Nwiin ngbaan yaa nan fuu ni kan, Uwumbɔr ga di waapɔɔn kunn ni waanib bi gaar Asiria, ni Ijipt, ni Patros, ni Kus, ni Elam, ni Babiloŋ, ni Hamaf aatim ni, ni ntim mu bi nnyusakpem aagbaan na ni, ni mu bi ŋidik pu nnyusakpem ni na.

¹² Uwumbɔr ga yoor limɔkl aatuutaa paacham, ki mɔk ke u bi kuuni Israel ni Juda yaab bi nan yaa ki bi ntim yayam ni na, ki nyan ni bi dulnyaa aapepel ŋinaa na mɔmɔk ni.

¹³ Israel aanaan ni aanib aan ki li kpa lipiipoln Juda yaab pu, le Juda yaab mu aan ki li ye Israel yaab aadim.

¹⁴ Bi ga kpaan le ki ti tak Filistia yaab bi bi liwilir wɔb na, aan ki kpaan ti jenn gaa binib bi bi liwipuul wɔb na mu aawan. Bi ga nyaŋ Edom ni Moab aanib; le Amonn yaab mu ga kii baamɔi.

¹⁵ Le Uwumbɔr ga cha nnyunsakpem mu bi yin mu ke Sues na aanyun foor, ki ga cha libuln li ton na daa ki foor limɔɔl li bi yin li ke Yufrates na aanyun, ki di cha ibun waatiir ilole baanja aan unii mɔmɔk ga ŋmaa puur jer.

¹⁶ Nsankpaan ga li dɔ ki nyan ni Asiria ni, ki tii waanib bi kaa kpo ki bi nima na, ke mu aah nan dɔ tii biyaajatiib Israel yaab, baah nan nyan ni Ijipt aatiŋ ni pu na.