Aisaya 10 - Uwumbɔr aagbaŋ

¹ Nimi aadoon le na. Nimi bi naani ikaal i kaa ye ibamɔn ki joo muk maanib na aadoon le na.

² Kina le ni gaal bigiim aabamɔn, ni ni ye biyaan na. Kina le ni gaal bikpopiib ni nkpobim aawangol bi chee.

³ Kina pu na, Uwumbɔr yaa daa nitafal kan, ni ga ŋa kinye? Uwumbɔr yaa cha tibɔbir nyan ni dandar ki nan lir ni pu kan, ni ga ŋa kinye? La chee aan ni ga san ti ban nterm? La chee aan ni ga ti di nimi aawangol di bɔr?

⁴ Bi ga ku nimi butɔb ponn ni la, bee bi chuu nimi ki dar buen ke binaagbiib na. Nimina mɔmɔk aapuwɔb na, Uwumbɔr aaŋuul aan sɔŋ; u ga li beenin ban ke u moo daa nitafal.

Uwumbɔr di Asiria aabɔrkpaan tun waah ban pu na

⁵ Uwumbɔr len ke, “Asiria, maaŋuul yaa ti fii unii u pu na, m joo sin Asiria le gbaa u ke baah joo lichakukul jaa kijaak pu na.

⁶ M tun Asiria yaab ke bi ti tak litimbol li kaa dii mi Uwumbɔr aasan na, binib bi cha maaŋuul fii bi pu na. M tun bi ke bi ti jenn ki gaa, ki su baawan, ki taa binib pu ki ŋmal titan ni, kitiŋ ponn ni.”

⁷ Le Asiria aabɔrkpaan ngbaan ma tee kpa ubaa aalandak i kaa ŋan na uyil ponn ni. Waalandak le ye ke u bii ŋitimbol pam;

⁸ le ki puk kipupuk ke, “Maatɔb aajab aaninkpiib mɔmɔk kpaln bibɔrb la.

⁹ M nyaŋ Kalno ni Kakemis aatim mɔmɔk, ki nyaŋ Hamaf ni Apad aatim mɔmɔk. M nyaŋ Samaria ni Damaskus aatim.

¹⁰ M taln ŋŋaal ke m daa ŋitimbol ŋi mɔmɔk gbaani ŋiwaa aanimbiin ni na, ŋiwaa ŋi wiir ki jer Jerusalem ni Samaria aawaa na aatafal.

¹¹ M bii Samaria ni baawaa mɔmɔk doo a, le ki ga ŋa Jerusalem ni waawaa mu kina.”

¹² Uwumbɔr nan ki bui ke, “M yaa doo maah bi tun lituln li Sionn Aajool pu ni Jerusalem ni na kan, m ga daa Asiria aabɔrkpaan ngbaan aatafal, waah puk tipupuur timɔk na, ni waamakl ngbaan pu.”

¹³ Asiria aabɔrkpaan ngbaan puk kipupuk ki len ke, “Min le ŋa nimina mɔmɔk mbaa. M kpa Uwumbɔr do aalan ni ichiin le ki pɔɔ. M ŋar ŋitimbol aanaan mɔmɔk ŋŋaan le ki yoor baah kpa ni mɔmɔk ki di siin kiir bibaa na, le ki taa taa ku binib bi bi nima chee na ke unaaja aah taar tiwan pu pu na.

¹⁴ Dulnyaa wee aanibol mɔmɔk nan bi m chee ke unyoon aanyandil na la, le m nan kuun baawangol ke unii aah chuun ki ti pii ŋikpanjen timoor ni pu na. Ubaa aa nan ŋmaa faan mi, ubaa mu aa ki fii ke u faa nkuun.”

¹⁵ Le Uwumbɔr ma bui ke, “Kichɔk ga ŋmaa bui ke ki jer unii u joo ki na aa? Ukpikpiir aah joo kichɔk ki kpii tiwan na aan ŋmaa bui ke ki jer u. Lichakukul aan ŋmaa yoor unii paacham; unii le ga yoor lichakukul paacham.”

¹⁶ Uwumbɔr Mpɔɔnsakpiindaan ga di iween di daa binib bi mɔmɔk ji n‑yaan ni nkpan dandana wee na aatafal. Mmii le ga li wu biponn ni, kaan junn.

¹⁷ Uwumbɔr u ye Israel yaab aawiihn na ga kpaln mmii. Israel yaab Aawumbɔr u bi chain na ga kpaln mmiigaal mu ga di nwiin mubaa baanja ki di wu tiwan mɔmɔk doo na, hali ikokon ni ŋinaabukar mɔmɔk ga wu.

¹⁸ Iween i bir na aah ku unii pu na, kina le tikpaatan ti ŋan na ni tipur mu mɔmɔk ga doo.

¹⁹ Ubo waatiir ga ŋmaa kahn isui siib i ga gur na.

Israel yaab siib le ga gir ni

²⁰ N‑yoonn choo le Israel aanib bi ŋmar na aan nan ki li dak linibol li nan ban li ku doo bi na pu. Bi ga nan di baalandak mɔmɔk di tii bima Israel yaab Aawumbɔr u bi chain na la.

²¹ Israel yaab siib le ga gir ni Baawumbɔr Mpɔɔndaan chee.

²² Dandana, Israel yaab wiir ke nnyusakpem aatambol aah wiir pu na la, le bi ponn ni siib ga gir ni. Uwumbɔr bui ke u ga bii bi; le bi ŋeer kina.

²³ Ntafadaan sakpiin mu ŋeer binib ngbaan na le choo bi pu. Uwumbɔr Mpɔɔnsakpiindaan u yeh tiwan mɔmɔk na ga bii baatiŋ mɔmɔk, waah len pu na, kaan taan.

Uwumbɔr ga daa Asiria yaab aatafal

²⁴ Tidindaan Uwumbɔr Mpɔɔnsakpiindaan bui waanib bi bi Sionn na ke, “Asiria yaab yaa muk nimi ke Ijipt yaab aah nan muk nimi pu na kan, ni taa san bi ijawaan.

²⁵ Naan ki yunn le m ga daa nimi aatafal doo; n‑yoonn ngbaan le m ga kuln Asiria yaab kookoo.

²⁶ Min Uwumbɔr Mpɔɔnsakpiindaan di maabanbaan loe bi ke maah nan loe Midiann yaab, Oreb aatakpal chee pu na. M ga daa bima Asiria yaab aatafal ke maah nan daa Ijipt yaab aatafal pu na.

²⁷ N‑yoonn ngbaan yaa fuu ni kan, m ga gaa nimi lii, ki nyan nimi Asiria yaab aapɔɔn ni. Baamukl aan ki li bi ni pu.”

Bidim fuu ni a

²⁸ Nimi aadim aajab nyaŋ Ai yaab a. Bi kpaan jer Migronn a. Bi di baawan bil Mikmas la.

²⁹ Bi dii kifataŋ kibaa ni ki fuu Geba ki doon nima. Ijawaan chuu Rama aatiŋ aanib sakpen a, le ubɔrkpaan Sɔɔl aatiŋ ki bi yin ki ke Gibea na aanib san.

³⁰ Nimi Galim aatiŋ aanib, teen mpɔɔn pu man. Li pel man, Laisa aatiŋ aanib. Anatof aatiŋ aanib kpa kinimbaak la.

³¹ Madmena ni Gebim aanib san ban baamɔfal la.

³² Din wee bidim ngbaan fuu ni Nob aatiŋ ponn ni, le ki joo biŋaal mɔk Sionn Aajool li Jerusalem bi li paab na.

³³ Tɔ, Uwumbɔr Mpɔɔnsakpiindaan ga daa bi lii ni ke baah gaa bar isubon lir ni kitiŋ pu na. Bininyuum ni kigaadam mɔmɔk ga doon kitiŋ le ki kpaln yaansara aanib.

³⁴ Baah joo kichɔk gaar kichook ni aasui lir pu na, kina le Uwumbɔr ga daa bi mɔmɔk lii kitiŋ. Ni ga li naahn Lebanonn aasui i ŋan na aah lir pu na la.