Aisaya 1 - Uwumbɔr aagbaŋ

¹ Tibɔr ti bi kigbaŋ kee ponn ni na ye Juda ni Jerusalem aatim aabɔr le Uwumbɔr nan kpiir tuk Amos aajapɔɔn Aisaya. Ni nan ye buyoonn bibɔrb binaa bee nan jin jin nnaan Juda aatiŋ ni ki paan tɔb pu na la. Njan, ubɔr Usia le nan jin nnaan, le ubɔr Jotam nan paan u pu, le ubɔr Ahas mu nan paan Jotam pu, le Hesekia nan gbeln puwɔb.

Uwumbɔr sur waanib

² Uwumbɔr len ke, “Kitiŋ ni paacham, li pel man maah len pu na. Binib bi m kpiin bi na fii sil m pu.

³ Inaa nyi u yeh i na, le ibon mu nyi nin chee idindaan di tijikaar di bil tii i na. Maanib Israel yaab ma chee kan, ni pɔɔ. Baa nyi nibaa.”

⁴ Ni kpo doo a, nimi titunwanbirdam, nimi beebeedam, ni kinimbɔŋdam. Nimi aatunwanbir le dar nimi lir kitiŋ. Nimi Israel yaab, ni yii nimi Aawumbɔr u bi chain na, ki fenn nipuwɔb tii u.

⁵ Ba ŋa ni kpak u kinikpakpak? Ni ban ke nimi aatafadaan li wiir la aa? Israel yaab, nimi aayil kpaln ibuun ŋmeen la, le nimi aapobil ni nisui mɔmɔk buŋ doo a.

⁶ Nimi aawon mɔmɔk buŋ la. Nimi aawon mɔmɔk ye ibuun ŋmeen ke ubusoondaan na la, le naa char i, kaa di nkpan mubaa di meen i, kaa di nibaa poo biin i pu.

⁷ Nimi aatiŋ kuln a, le mmii wun nimi aatim mɔmɔk. Le ni si lik le biwɔwɔm gaa nimi aakpaakon mɔmɔk, ki gaa nimi aajikaar.

⁸ Jerusalem baanja le gur, le bi gob ki mu, le kaa kpa mpɔɔn mubaa ke kisaak ni aabool na.

⁹ Uwumbɔr Mpɔɔnsakpiindaan yaa kaa ba gur binib siib kan, Jerusalem ba ga kuln ke Sodom aatiŋ ni Gomora aatiŋ aah nan kuln pu na la.

¹⁰ Jerusalem yaab, nimi aayidam ni nimi aanib naahn Sodom ni Gomora yaab la. Li pel man Uwumbɔr aah bi tuk nimi pu na. Pel man mbamɔm Uwumbɔr aah bi mɔk nimi pu na.

¹¹ U bui ke, “Taa dak man ke m gee nimi aatork ki ni toor tii mi na. Maa ki neen naah kɔr nimi aapiih i ki joo seer mmii ni ki tii mi na, ni nimi aanaa i ŋan na aakpan mu. Maa ki neen nimi aanaasin, ni mpihsin, ni ŋŋosin mu ni tii mi na.

¹² Ŋma bui nimi ke ni li joo ni nimina mɔmɔk buyoonn ni choo ni nan pak mi na? Ŋma bui nimi ke ni di ŋitaagbindun ŋimina koo ni Maameen Aadichal ni?

¹³ Nimi aapiin i ni joo ni na aa kpa tinyoor tibaa. Naah seer tulalee aayon mu na kpa mi liŋuul la. Nimi aaŋmapɔɔn aajim, ni nimi aakpaakool daal aajim, ni naah kuuni pu na, maa gee ni, ni di nimi aatunwanbir bii ni mɔmɔk a.

¹⁴ Nimina mɔmɔk ye lituln li m nan bak ki ki bak li pu na la.

¹⁵ “Ni yaa yoor niŋaal paacham ki mee min kan, maan lik nimi. Ni yaa po mee min pu na kan, maan ŋun nimi aameel ngbaan, ba pu? niŋaal mɔmɔk ye nsin ŋmeen la.

¹⁶ Kpeln nimi aabimbin man. Di cha man nimi aatunwanbir ti m kan ni ŋani ti na. Mbamɔn, di cha man,

¹⁷ ki bee ni ŋan na ki ŋa kina. Cha ibamɔn ŋa, ki ter bigiim, ki tii nkpobim baabamɔn, ki li kii bikpopiib.”

¹⁸ Le Uwumbɔr ki len ke, “Dandana wee, cha ti toor tibɔr ngbaan man. Nimi aatunwanbir man ni pu ke nsin na, le m ga ŋmaa finn nimi ni nya chain ke nkokoyon na. Nimi aatunwanbir yaa po man ni pu sakpen pu na, m ga finn nimi, ni piir chain.

¹⁹ Ni yaa kii maamɔb kan, ni ga kan tijikaar pam nimi aatiŋ pu.

²⁰ Le ni yaa yii maamɔb kan, ni ga sil kan nkun. Min Uwumbɔr le len kina.”

Titunwanbir aatiŋ

²¹ Kitiŋ ki nan bi chain kaa kpa tijɔŋ tibaa na le gur tun ke upiidagoor na. N‑yoonn mubaa bininyaam ŋmeen le nan gbii ki ni, le dandana ma binikurb le gur bi ki ni.

²² Jerusalem, n‑yoonn mubaa aa nan ŋan ke tikunabr na; le dandana ma, saa ki kpa tinyoor tibaa; aa nan naahn ndaan mu mɔ na la, le dandana ma kan, aa kpaln nnyun.

²³ Saayidam ye binib bi kaa kii maamɔb na la, ki ye binaayukb aajɔtiib, le ki gaal ipiin, ni igaŋgaŋlik n‑yoonn mɔmɔk. Baa ter nkpobim buyoonn bi bi tibɔr ni na, kaan pel bikpopiib aabɔr buyoonn bi di ti fuu ni bi chee na.

²⁴ Kina pu na, li pel man Uwumbɔr Mpɔɔnsakpiindaan, Israel yaab Aadindaan u kaa kpa ŋeen aatɔ na aah len pu na: “M ga teen nimi maadim, aan naan ki ŋa mi tibɔbir tibaa.

²⁵ M ga fii sil nimi Jerusalem aanib pu. M ga pu nimi mmii ni ke baah pu tikur mmii ni ki nyani tijɔŋ pu na.

²⁶ M ga tii nimi biyidam bi ga li sur nimi ke naah nan puen kpa pu na. N‑yoonn ngbaan le bi ga ki yin Jerusalem aanib ke binib bi ŋan ki dii mi Uwumbɔr baanja na.”

²⁷ Uwumbɔr aah ŋan pu na, u ga gaa Jerusalem, ni kaanib bi kpeln baabimbin na lii,

²⁸ le ki kuln umɔk tun titunwanbir ki kpak u na; u ga kuln unii umɔk yii u na.

²⁹ N‑yoonn ngbaan le nisui ga gar ke ni nan chuun dii isui ke i gaa nimi lii, ki toor kisamook ke ki ter nimi ni kan tijikaar.

³⁰ N‑yoonn ngbaan ni ga gbar ke likpaln li kuur na, ki yɔl ke tijikaar ti utaal aa nu ŋani ti pu na.

³¹ Ikpakpaabi aah gaal mmii ni pu na, kina le bipɔɔndam mu aatunwanbir ga gaa ki ku bi doo, le ubaa aan ŋmaa gaa bi lii.