2 Samuel 9 - Uwumbɔr aagbaŋ

David ni Mefibosef aabɔr

¹ Daalbaadaal le Ubɔr David nan baa ke, “Sɔɔl aanii ubaa gur aa? Ubaa yaa bi kan, m ga li gee ke m mɔk u maaŋann, Jonatann pu.”

² Sɔɔl aadichal ni aatutunn ubaa nan bi, le bi yin u ke Siba, le bi bui u ke u buen ti kan Ubɔr David. Le ubɔr ti baa u ke, “Sin le ye Siba aa?” Le u kii ke, “Een, maaninkpel.”

³ Le ubɔr ngbaan baa u ke, “Sɔɔl aanii ubaa gur aa? M ban m mɔk u maapak ni maaŋann, maah nan puu Uwumbɔr ke m ga ŋa pu na.” Le Siba bui u ke, “Jonatann aajapɔɔn ubaa beenin bi. U ye uwɔb la.”

⁴ Le ubɔr ngbaan baa u ke, “U bi la chee?” Le Siba bui u ke, “U bi Amiel aajapɔɔn Makir do, Lodebar aatiŋ ni.”

⁵ Le Ubɔr David cha bi buen ti yoor ni u.

⁶ Jonatann aajapɔɔn Mefibosef, u aayaaja nan ye Sɔɔl na, aah fuu ni na, u nan gbaan David aanimbiin ni ki pak u. Le David yin u ke, “Mefibosef.” Le u kii ke, “Maaninkpel, m sɔ.”

⁷ Le David bui u ke, “Taa san ijawaan. Aate Jonatann pu, le m ga ŋa si tiŋann. M ga giin kitiŋ kimɔk nan ye aayaaja Sɔɔl aatiŋ na tii si, le n‑yoonn mɔmɔk aa ga ŋmaa dan nan ji m chee tijikaar.”

⁸ Le Mefibosef ki gbaan ki len ke, “Maaninkpel, libɔkpol jer mi. Ba ŋa aa kpa m pu tiŋann sakpen kina?”

⁹ Le ubɔr yin ni Sɔɔl aatutunn Siba ki nan bui u ke, “M ban m di saaninkpel Sɔɔl aawan nimɔk nan ye u ni waadichal yaan na tii uyaabil Mefibosef la.

¹⁰ Sin ni aajapɔtiib, ni saatutum ga li ko tii saaninkpel Sɔɔl aadichal, le Mefibosef ma ga li ye maachaan iwiin mɔmɔk.” Siba nan kpa japɔtiib kipiik ni biŋmu, ni bitutum moninko la.

¹¹ Le Siba gar u ke, “Mpɔɔndaan, m ga ŋa tiwan nimɔk aa bui ke m ŋa na.” Kina pu le Mefibosef nan ji ubɔr chee tijikaar ke ubɔr aajapɔɔn na.

¹² Mefibosef nan kpa japɔɔn waatiir ubaa, le bi yin u ke Maika. Siba aadichal ni aanib mɔmɔk nan kpaln Mefibosef aatutum la.

¹³ Le Mefibosef u aataa mɔmɔk ŋilee nan kpoi na, nan koo Jerusalem ponn ni, le ki ji waajikaar mɔmɔk ubɔr chee.