2 Samuel 7 - Uwumbɔr aagbaŋ

Natann aah di inaŋ i tii David na

¹ Ubɔr David nan ka waabɔrchiln ni, le Uwumbɔr kii u, waadim aa ŋmaa ŋa u nibaa.

² Le ubɔr ngbaan nan bui Uwumbɔr aabɔnabr Natann ke, “Min le ka do lidichal li bi di santina maa li na ponn ni na, le Uwumbɔr Aakaal Aadakaa tee bi likekeln aabool ponn ni.”

³ Le Natann gar u ke, “Ŋa saah dak pu na; ba pu? Uwumbɔr bi aa chee.”

⁴ Kinyeek ngbaan le Uwumbɔr bui Natann ke,

⁵ “Buen ti tuk maatutunn David ke m bui u ke, ‘Naa ye sin le ga maa lidichal tii mi.

⁶ Ki nyan nwiin mundaal m nyan ni Israel yaab Ijipt aatiŋ ni ki nan saa din wee na, maa kee koo lidichal ponn ni; m chuun kpak gonni ki bi likekeln aabool ni la.

⁷ Maasachun mɔmɔk, Israel aanib ponn ni, maa kee bui biyidam bi m lee bi na ponn ni ubaa, ke ba ŋa baa di santina aadɔ maa lidichal tii mi.’

⁸ “Kina pu na, bui maatutunn David ke min Uwumbɔr, u yeh mpɔɔn na, le bui u ke, ‘Aa nan ye upihdaan le ki lik ipiih timoor ni, le m lee si ki di ŋa Israel yaab aajojoor.

⁹ Nin chee mɔk aa buen na, m dii si, le ki nyaŋ saadim mɔmɔk buyoonn aa cha bi chee na. M ga tii si liyimbil sakpeln, ke dulnyaa wee aayidam bi kpa mpɔɔn sakpen na.

^10-11 Min le lee nin chee maanib Israel yaab ga kal aan ubaa taa ki muk bi na, le ki di bi kaan nima. Ki nyan bundaal bi koo ni kitiŋ kee pu na, binib bi bir na tak bi, le kina aan ki ŋa. M puu ke m ga li kii si saadim chee, ki ga tii si yaabitiib.

¹² Aa yaa nan kpo aan bi sub si aayaajatiib chee kan, le m ga ŋa aajapɔɔn ubaa ubɔr, ki cha waanaan li pɔɔ.

¹³ Uma le ga nan maa lidichal tii mi, le m ga cha waanaanjirb aan doo.

¹⁴ Min le ga li ye ute, le u li ye maabo. U yaa tun taani kan, m ga daa utafal, ke ubo aate aah dar waabo aatafal pu na la.

¹⁵ Maan tee nyan maaterm u chee ke maah nyan Sɔɔl u m nan nyan u ke aa ji nnaan na.

¹⁶ Aa ga li kpa yaabitiib n‑yoonn mɔmɔk, le m ga cha saanaan li bi n‑yoonn mɔmɔk. Saanib bi ga li ji nnaan na aan doo.’”

¹⁷ Natann nan bui David tibɔr timɔk Uwumbɔr kpiir mɔk u na.

David aah doon Uwumbɔr pu na

¹⁸ Le Ubɔr David buen Uwumbɔr Aabool ni, ki ti kal ki mee Uwumbɔr ke, “Ndindaan Uwumbɔr, maa ŋeer saah puen ŋa tiwan ni tii mi na, le maadichal mu aa ŋeer kina.

¹⁹ Ndindaan Uwumbɔr, le aa ki bi ŋani mi ni jer kina na; aa puu tipuur n‑yaabitiib bi baa kee ma bi na pu. Ndindaan Uwumbɔr, le aa cha unibɔn kan nimina.

²⁰ M ga ki ŋmaa len kinye aa pu? Aa nyi mi saatutunn aabɔr.

²¹ Ni ye saageehn, ni saah ban pu na le aa ŋa kina; aa ŋa tiwan sakpen nee mɔmɔk ke aa mɔk mi la.

²² Ndindaan Uwumbɔr, saapɔɔn nyaŋ sakpen. Ubaa aa ki bi ke sin na, ti puun nyi n‑yoonn mɔmɔk ke sin baanja le ye Uwumbɔr.

²³ Litimbol libaa aa ki bi kitiŋ kee pu ke Israel aatimbol li aa nyan li tinaagbiir ni, ki di li ŋa aabaa aanib na. Saah tun lijinjiir, ni litusakpeln li tii bi na cha saayimbil yaa koo dulnyaa wee mɔmɔk ni. Saanib bi aa nyan ni bi Ijipt ni ke bi nan li ye saanib na, yaa paan cha kan, le aa jenn ŋitimbol ŋiken, ni ŋaawaa.

²⁴ Aa di Israel yaab ŋa saanib n‑yoonn mɔmɔk, le sin Uwumbɔr ye Bidindaan.

²⁵ “Tɔ, Ndindaan Uwumbɔr, cha saah puu tipuur ti m ni n‑yaabitiib pu na gbiin kina n‑yoonn mɔmɔk, ki ŋa saah bui ke aa ga ŋa pu na.

²⁶ Saayimbil ga nyaŋ, le binib ga li len n‑yoonn mɔmɔk ke, ‘Uwumbɔr u yeh mpɔɔn mɔmɔk na le ye Uwumbɔr u lik Israel yaab pu na.’ Le aa ga cha maanib bi ji nnaan na li bi n‑yoonn mɔmɔk.

²⁷ Uwumbɔr u yeh mpɔɔn mɔmɔk na, Israel yaab Aawumbɔr, naah ŋa pu aan m kpa lipobil ke m mee si limeel limina na le ye ke sin le kpiir nimina mɔmɔk mɔk mi, saatutunn, le ki bui mi ke n‑yaabitiib ga li ye bibɔrb la.

²⁸ “Ndindaan Uwumbɔr, aa ye Uwumbɔr la, aa joo saah puu tipuur ti na n‑yoonn mɔmɔk, le ki puu iwaan aapuur tee tii mi.

²⁹ M mee si ke aa biin n‑yaabitiib pu aan bi ji saah lik ki faar bi pu na aamɔɔn. Ndindaan Uwumbɔr, sin le puu kina, le saanyoor ga li bi n‑yaabitiib pu, ki ti saa n‑yoonn mu kaa kpa ndoon na.”