2 Samuel 6 - Uwumbɔr aagbaŋ

Uwumbɔr Aakaal Aadakaa aah fuu ni Jerusalem aatiŋ ponn ni pu na

¹ David nan ki yin ni Israel aajab bi nyi butɔb aabɔr mbamɔm na, le bi nan ti saa bijab ŋichur piitaa,

² ki di bi buen Juda aatiŋ ki bi yin ki ke Baala na ni, ke bi ti yoor ni Uwumbɔr Aakaal Aadakaa, u Uwumbɔr u yeh mpɔɔn mɔmɔk na aayimbil bi u pu, aan u bi tiwan ni kpa ifeen na aapaacham na.

³ Bi nan ti yoor Dakaa ngbaan, Abinadab aadichal li bi ligongoln pu na ni la, le ki di u toŋ tɔroku pɔɔn pu. Abinadab aajapɔtiib, Usa ni Ahio le nan kii tɔroku ngbaan.

⁴ Ahio le nan loln Dakaa ngbaan pu nsan ki chuun le u paa.

⁵ David ni Israel yaab mɔmɔk nan gaa ilahn, le ki waa liwaal mpɔɔn pu ki pak Uwumbɔr. Bi nan gbaa tibar, ni ŋigangan, ki yak ichayakrtuun.

⁶ Baah nan ti fuu ni Nakonn aadipoipaal chee na, le inaa i dar tɔroku ngbaan na gbeer, le Usa san ti chuu Uwumbɔr Aakaal Aadakaa ngbaan.

⁷ Libuul ngbaan ni le Uwumbɔr aaŋuul fii Usa pu, le u ku u, waah kaa pak uma Uwumbɔr Aakaal Aadakaa pu na pu. Usa nan kpo dɔ gbɔk Nkaal Aadakaa ngbaan nima chee,

⁸ kina pu le bi gur yin nima chee ke Peres Usa ki nan saa din. David aaŋuul nan fii, ba pu? Uwumbɔr aaŋuul ponn ni le u daa Usa aatafal.

⁹ David nan san Uwumbɔr ijawaan, le ki bui ke, “M ga ŋa kinye ki di Uwumbɔr Aakaal Aadakaa ngbaan buen?”

¹⁰ Kina pu le u nan ŋa nlandak, kaa di u buen Jerusalem ponn ni; u nan di u paal buen uja u bi yin u ke Obed Edom, aan u ye Gaf aatiŋ aanii na do la.

¹¹ Uwumbɔr Aakaal Aadakaa ngbaan nan gaar nima ki ti saa iŋmal itaa, le Uwumbɔr nan ŋa tinyoor ŋa Obed Edom, ni waadichal pu.

¹² Ubɔr David nan ŋun ke Nkaal Aadakaa ngbaan pu le Uwumbɔr ŋa tinyoor ŋa Obed Edom aadichal, ni waah kpa nimɔk na pu; le u buen ti yoor Nkaal Aadakaa ngbaan Obed Edom do, ke u di buen Jerusalem ponn ni, ki mɔɔni.

¹³ Bijab bi nan tu Uwumbɔr Aakaal Aadakaa ngbaan na aah nan yoor ŋitaa ti pii ŋitaa ŋiloob na, le David cha bi sil, le u di unaaja, ni unaabo u bi kpiin u, u filk na, toor kitork tii Uwumbɔr nima.

¹⁴ David nan gbab Uwumbɔr aatotoor aakekengeŋ uchaŋ ni, ki di waapɔɔn mɔmɔk ki waa liwaal ki pak Uwumbɔr.

¹⁵ Kina le u ni Israel yaab mɔmɔk nan di Uwumbɔr Aakaal Aadakaa ngbaan koo Jerusalem ponn ni, ki tar, ki pii ikpiin, mpopiin pu.

¹⁶ Baah joo Dakaa ngbaan bi di koo ni kitiŋ ngbaan ponn ni buyoonn na, le Sɔɔl aabisal Mikal lik takolu ni, ki kan Ubɔr David aah bi yukr ki waa liwaal tii Uwumbɔr pu na, le u lik seen u usui ni.

¹⁷ Bi nan joo ni Dakaa ngbaan, le ki nan di siin David aah ŋa likekeln aabool li siin Dakaa ngbaan pu na ponn ni. Le u toor kitork ki bi see mmii ni na, ni kimɔbaan aatork tii Uwumbɔr.

¹⁸ Waah toor kitork ngbaan doo na, le u mee Uwumbɔr, u yeh mpɔɔn mɔmɔk na, ke u ŋa tinyoor ŋa binib ngbaan pu,

¹⁹ le ki yakr yakr tijikaar tii bi mɔmɔk. U nan tii Israel aaja ni upii mɔmɔk liboroboro kpiln libaa, ni tinanpukaan, ni ŋisubil mu. Nee aapuwɔb, le bi mɔmɔk kun bido bido.

²⁰ Le David mu kun udo, u ti mee Uwumbɔr aanyoor waadichal ni yaab pu; le Mikal nyan nan tooh u nsan ni, le ki len ke, “Israel yaab aabɔr ban liyimbikpaan tii ubaa din wee. U di ubaa mɔk waaninkpiib aanaagbiisapɔm ke ujɔr na.”

²¹ David nan gar u ke, “M ba bi waa ki pak Uwumbɔr u yii aate ni waadichal, ki lee mi ke m li ye waanib Israel yaab aayidaan na la. Le m ga li moo waa ki pak Uwumbɔr,

²² ki moo jinn mbaa inimɔɔn. Sin ma ga li dak ke maa ye nibaa, le bisapɔm ngbaan ma ga li lik ki nyuŋni mi.”

²³ Tɔ, Sɔɔl aabisal, Mikal, aa nan ma ubo kpala.