2 Samuel 5 - Uwumbɔr aagbaŋ

David aah ŋa Israel yaab ni Juda yaab aabɔr pu na

¹ Israel aanibol mɔmɔk nan dan David chee, Hebronn aatiŋ ni, ki ti bui u ke, “Timi ni sin ye lipubaan ni aanib la.

² N‑yoonn mu jer na, hali Sɔɔl aah nan beenin ye timi aabɔr na, sin le nan lolni timi Israel aanib pu nsan butɔb ni, le Uwumbɔr nan puu ke sin le ga loln waanib pu nsan, ki li ye baajojoor.”

³ Kina pu le Israel yaab aayidam mɔmɔk dan Ubɔr David chee, Hebronn aatiŋ ni. U ni biyidam ngbaan nan ŋa kimɔbaan ki pɔɔ na, le bi di nkpan kpir uyil pu, ki kaan u Israel aatiŋ aanaan.

⁴ David nan ye ŋibin piitaa aanii le ki jin nnaan, ki joo waanib ti saa ŋibin imonko ilee.

⁵ Waah nan bi Hebronn ponn ni ki joo Juda aatiŋ aanib na, nan ye ŋibin ŋilole ni iŋmal iloob la, le ki koo Jerusalem mu ponn ni, ki joo Israel ni Juda aatim mɔmɔk aanib, ki ti saa ŋibin piitaa ni ŋitaa.

⁶ N‑yoonn mubaa le Ubɔr David ni waajab nan gor ke bi ti tak Jerusalem. Le Jebus yaab bi koo nima chee na nan dak ke David aan ŋmaa nyaŋ kitiŋ ngbaan, le ki bui ke, “Saan ŋmaa koo ni do kpala; hali bijoom ni biwɔb ga ŋmaa nyaŋ si.”

⁷ David mu nan tee nyaŋ baapɔɔn aajool Sionn, le bi gur yin kitiŋ ngbaan ke “David Aatiŋ.”

⁸ Liyaadaal ngbaan le David nan baa waajab ke, “Ubaa mu ki nan Jebus yaab ke mi na aa? Kinanansakpeŋ ki ga ku bi na aa? Kina kan, dii nnyunsan ngbaan man ki ti tak bijoom bi ye biwɔb ngbaan na.” Nima pu le bi len ke, “Bijoom ni biwɔb aan ŋmaa koo Uwumbɔr Aadichal ni.”

⁹ David nyaŋ baapɔɔn aatiŋ ngbaan, le ki koo ki ponn ni ki yin ki ke “David Aatiŋ.” U nan piin liwipuul wɔb, nin chee kitiŋ dɔ ligongoln ngbaan pu na, le ki maa mann goln kitiŋ ngbaan pu ki kpee.

¹⁰ U nan moo pɔɔk n‑yoonn mɔmɔk la; ba pu? Uwumbɔr u yeh mpɔɔn mɔmɔk na nan bi u chee.

¹¹ Taya aatiŋ aabɔr Hiram nan tun ni kitiirk aatun David chee, ki nan tii ni u santina aadɔ, ni bikpikpiib, ni binib bi kpir ŋitakpal na, ke bi nan maa libɔrdichal tii u.

¹² Kina pu le David bee ke Uwumbɔr sil kaan u Israel aanaan, ki bi tii waanaan ngbaan liwangol sakpeln, waanib pu.

¹³ David aah nyan Hebronn ki kun Jerusalem na, le u moo yoor puutiib ni puutiib waatiir kpee, le ki moo kan mbijabim ni mpiibim.

¹⁴ Mbim mue le u nan ma Jerusalem ponn ni: Samua, ni Sobab, ni Natann, ni Solomonn,

¹⁵ ni Ibhar, ni Elisua, ni Nefeg, ni Jafia,

¹⁶ ni Elisama, ni Eliada, ni Elifelet.

David aah nyaŋ Filistia yaab pu na

¹⁷ Filistia yaab ŋun ke David jin Israel aanaan, le baajab gor bibaa ke bi ti tak ki chuu u. David aah ŋun tibɔr ngbaan na, le u buen ligongoln li bi kii li mbamɔm na paab.

¹⁸ Filistia yaab nan fuu ni Refaim Aafataŋ ponn ni, ki nan gaa nima.

¹⁹ Le David baa Uwumbɔr ke, “M buen ti tak Filistia yaab aa? Aa ga cha m nyaŋ bi ii?” Le Uwumbɔr kii u ke, “Een, buen ti tak bi. M ga cha aa nyaŋ bi.”

²⁰ Kina pu le David buen nin chee bi yin ni ke Baal Perasim na, le ki ti nyaŋ Filistia yaab nima. U nan bui ke, “Uwumbɔr bɔ jer maadim ponn ni ke nwam na.” Kina pu le bi yin libuul ngbaan ni ke Baal Perasim.

²¹ Filistia yaab nan san; bi nan san cha baawaa, le David ni waajab yoor ŋi di buen.

²² Le Filistia yaab gir buen Refaim Aafataŋ ni, ki ti ki gaa ki.

²³ David nan ki gir baa Uwumbɔr, le u kii u ke, “Taa dii do ki ti tak bi, buen bipuwɔb ki ti gor ke aa tak bi lipepel ngbaan wɔb, tichacheer aasui na chee.

²⁴ Aa yaa nan ŋun ni bi ke binib le aah chuun isui ngbaan paab na kan, buen ti tak bi; ba pu? m ga loln ni pu nsan ki ti nyaŋ Filistia yaab aajab.”

²⁵ David nan ŋa Uwumbɔr aah bui u pu na, le ki ŋman ki jenn Filistia yaab aajab ki nyan Geba ki ti saa Geser.