2 Samuel 4 - Uwumbɔr aagbaŋ

Baah ku Isbosef pu na

¹ Sɔɔl aajapɔɔn Isbosef aah ŋun ke bi ku Abner, Hebronn ni na, le ijawaan chuu u, ki chuu Israel yaab mɔmɔk mu.

² Isbosef aajab bi looni ntim na aaninkpiib bilee bibaa nan bi. Bi nan yin ubaa ke Baana, ki yin uken na ke Rekab. Bite le nan ye Rimonn, u ye Benjaminn aanibol ni aanii, ki nyan ni Beerof aatiŋ ni na la. Beerof nan ye Benjaminn aamaal aatiŋ kibaa la.

³ Kaajan aanib nan fii buen Gitayim aatiŋ ni, le ki ti bi nima ki nan saa din.

⁴ Sɔɔl aayaabil ubaa le nan ye Jonatann aajapɔɔn Mefibosef. U nan laa ye ŋibin ŋiŋmu le bi ku Sɔɔl ni Jonatann. Baakun aabɔr aah nan nyan Jesreel aatiŋ ni ki fuu ni na, le waabiyoor bɔ yoor u ki di san; waah nan gee mala mala sakpen pu na, le ubo ngbaan nan ŋmar lir kitiŋ, le ki kpaln uwɔb.

⁵ Rekab ni Baana nan fii buen Isbosef do, le ki ti fuu nima buyoonn u dɔ fuur nwiin pu na.

⁶ Upii u nan ka mbisamɔb ki bi ganni imuul na aawon nan yɔl, le u geen, kina pu le Rekab ni Baana nan kan nsan ki loon koo.

⁷ Baah koo na, le bi koo Isbosef aadiik ni, nin chee u nan dɔ ki geen gbar na, le ki ti ku u. Bi nan gii uyil, le ki di li siir, ki chuun kinyeek ngbaan, Jɔɔdann Aafataŋ ni.

⁸ Bi nan di liyil ngbaan ti tii Ubɔr David, Hebronn aatiŋ ni, ki bui u ke, “Ubɔr, saadin Sɔɔl u nan ban si ke u ku na aajapɔɔn Isbosef aayil sɔ. Maaninkpel, Uwumbɔr cha aa teen saapɔln din wee, Sɔɔl ni waamaal pu.”

⁹ Le David kii bi ke, “M puu Uwumbɔr u bi n‑yoonn mɔmɔk ki nyan mi maabɔr mɔmɔk ni na pu.

¹⁰ Unii u nan dan Siklag ki nan bui mi Sɔɔl aakun pu na nan dak ke u joo ni mi tibɔnyaan la. M nan chuu u, ki cha bi ku u. Maah nan pan u tipar ti waabɔnyaan ngbaan pu na le nan bi na.

¹¹ Ni ga li bi kinye ki tii nimi titunwanbirdam bi tee ku uja u dɔ geen udo, kaa ŋa nibaa na. M ga di nimi di teen naah ku u pu na, ki doo nimi kitiŋ kee pu.”

¹² David nan tii nsan, le waajab ku Rekab ni Baana, le ki gii gii biŋaalfaal ni bitaafaal, ki di leen Hebronn aabukpiik na chee. Bi nan yoor Isbosef aayil ti sub Abner aakaakul ni, Hebronn aatiŋ ni.