2 Samuel 3 - Uwumbɔr aagbaŋ

¹ Kijaak ki nan bi bijab bi si Sɔɔl aadichal aachaŋ ni na, ni bijab bi si David aachaŋ ni na nan yunn pam. David nan moo kani mpɔɔn, le waadim ma moo diŋni.

David aajapɔtiib aayimbil sɔ

² David aajapɔtiib biloob bi u nan ma Hebronn ni na, ni baah nan paa tɔb pu pu na sɔ: Amnonn, u aana nan ye Ahinoam, aan u nyan ni Jesreel na;

³ ni Kileab, u aana nan ye Nabal aakpopii Abigail aan u nyan ni Kamel na; ni Absalom, u aana nan ye Gesur aatiŋ Aabɔr Talmai aabisal Maaka na;

⁴ ni Adonija, u aana nan ye Hagif na; ni Sefatia, u aana nan ye Abital na;

⁵ ni Itream, u aana nan ye Egla na. U nan ma mbijabim mue mɔmɔk Hebronn aatiŋ ni la.

Abner aah buen ti kpee David pu pu na

⁶ Kijaak ki nan bi David aajab, ni bijab bi nan kii tii Sɔɔl ki si waamaal aachaŋ ni na, aah nan beenin bi na, le Abner nan moo kan mpɔɔn Sɔɔl aadidiliib ponn ni.

⁷ Daalbaadaal le Sɔɔl aajapɔɔn Isbosef nan galn Abner, ke u doon Sɔɔl aapuu Rispa u ye Aya aabisal na chee.

⁸ Nee nan cha Abner aaŋuul fii sakpen. Le u baa Isbosef ke, “Aa dak ke m ga ŋmaa bii Sɔɔl aa? Aa sil dak ke m si Juda aanib aachaŋ ni la aa? Ki nyan mpiin na, m nan kii tii aate Sɔɔl la, le ki si u ni unaabitiib, ni ujɔtiib aachaŋ ni, le ki tun ki kii si ke David aajab taa nyaŋ si, le upii pu aa nan galni mi din wee.

^9-10 Uwumbɔr nan puu tii David ke u ga gaa nnaan ngbaan, Sɔɔl ni uyaabitiib chee, le ki ŋa David, Israel ni Juda aatim mɔmɔk aabɔr. M yaa kaa cha nimina ŋa kina kan, Uwumbɔr faa ku mi.”

¹¹ Isbosef nan san Abner ijawaan sakpen, le kaa ŋmaa waar umɔb ki len tibaa.

¹² Abner nan tun David, u nan bi Hebronn n‑yoonn ngbaan na chee ke, “Ŋma ga li joo kitiŋ kee? Cha ti ŋa kimɔbaan aan m ter si aa gaa Israel yaab mɔmɔk.”

¹³ Le David bui ke, “Ni ŋan. Tiwan nibaa pu le min ni sin ga ŋa kimɔbaan, nima le ye ke, aa yaa choo m chee kan, aa li joo ni mpuu, Sɔɔl aabisal Mikal.”

¹⁴ Le David mu tun Isbosef chee ke, “Giin mpuu Mikal tii ni mi. M nan di Filistia yaab aajawan aagban nkub le pan u pu ki yoor u.”

¹⁵ Le Isbosef gaa u uchal Paltiel u ye Lais aajapɔɔn na chee.

¹⁶ Paltiel nan paa Mikal aapuwɔb ki wii, ki ti saa Bahurim aatiŋ ni. Le Abner ti bui u ke, “Gir kun,” le u gir.

¹⁷ Abner nan buen Israel yaab aayidam chee le ki ti bui bi ke, “Naa ye din wee le ni ban David ke u li ye nimi aabɔr.

¹⁸ Tɔ, nimi aayoonn le na. Ni teer ke Uwumbɔr nan len ke, ‘M ga di maatutunn David le gaa maanib Israel yaab, Filistia yaab ni baadim biken na chee lii.’”

¹⁹ Abner nan ki bui Benjaminn aanibol aanib tibɔr ngbaan, le ki buen Hebronn ke u ti bui David, Benjaminn aanib ni Israel aanib aah kii ke bi ga ŋa pu na.

²⁰ Abner aah di bijab moninko dan Hebronn na, David nan ŋa njim tii bi.

²¹ Le Abner bui David ke, “Mpɔɔndaan, m ga buen ti gaa ni Israel yaab mɔmɔk nan tii si. Bi ga gaa si ŋa baabɔr, le aa ga kan saah nan ban pu n‑yoonn mu jer na, ki li joo kitiŋ ngbaan mɔmɔk.” David nan tii Abner limɔfal aasan ke ubaa taa ŋa u nibaa, le ki cha u buen.

Baah ku Abner pu na

²² Puwɔb le Joab ni David aajab bi nan buen ti loon binib bibaa na, nan gir ni, ki joo ni baah jan ki gaa tiwan ni na, le ni wiir pam. N‑yoonn ngbaan na, Abner aa nan ki bi Hebronn aatiŋ ni David chee; ba pu? David nan tii u limɔfal aasan ke ubaa taa ŋa u nibaa, le u buen.

²³ Joab ni waajab aah fuu ni na, le bi bui u ke Abner dan David chee, le David tii u limɔfal aasan ke ubaa taa ŋa u nibaa, le u buen.

²⁴ Le Joab buen ubɔr chee ki ti baa u ke, “Ba ŋa aa ŋa kina? Abner dan aa chee, le aa cha u ŋmar ki buen.

²⁵ U dan do u nan ŋmann si, ki bee saah ŋani pu na, ni saah chaa nimɔk na la. Sin aabaa nyi kina.”

²⁶ Joab aah siir David chee na, le u tun binib ke bi ti chuu ni Abner, le bi ti joo ni u, Sira aanyunbun na chee, le David aa nyi ti ponn ni tibaa.

²⁷ Abner aah fuu ni Hebronn aatiŋ ni na, le Joab di u nyan n‑gbaan, kitiŋ ngbaan aabisamɔb chee, ke waah ban u loon u chee tibɔr le na, le ki saa gbir upuul nima chee. Abner aah nan ku Joab aanaal Asahel pu na, le Joab mu ku u.

²⁸ David aah ŋun tibɔr ngbaan na, le u bui ke, “Uwumbɔr nyi ke m ni maanib aaŋaal aa bi Abner aakun mue ni.

²⁹ Waakun ngbaan aatafadaan lir Joab ni waadichal pu. N‑yoonn mɔmɔk kan, waamaal ponn ni aajab ubaa li kpa ulool aabuun, bee tiwon aaween i bir na ibaa, bee u li ye uja u ga ŋmaa tun bipiib aatuln baanja na, bee bi ku u butɔb ni, bee u taa li kpa u ji.”

³⁰ Joab ni unaal Abisai nan ku Abner, waah nan ku binaal Asahel pu Gibeonn aatɔb ponn ni pu na la.

Baah sub Abner pu na

³¹ Le David nan cha Joab ni waajab dar kar baawanpeenkaan, ki peen tiwanpeenkaan ni saak kuub na, ki wii Abner aakpuul. Baah nan cha bi ti sub u na, Ubɔr David ubaa le nan chuun paa utekpiir aadakaa ngbaan pu.

³² Bi nan sub Abner, Hebronn aatiŋ ni la, le ubɔr David nan wii mpɔɔn pu, waakaakul ngbaan chee, le binib mɔmɔk mu nan wii kina.

³³ David nan gaa nkpolahn mue le tii Abner: “Ba ŋa Abner nan kpo ke ujɔr na?

³⁴ Baa buu uŋaal le ki ku u, kaa buu utaa mu. U kpo ke binikurb aah ku unii u na la.” Le binib ngbaan ki gir wii u pu.

³⁵ Nwiin ngbaan daal, binib ngbaan nan pɔɔn bibaa ke bi cha David ji tijikaar, le u yii, ki puu tipuur ke, “M yaa ji nibaa din wee waahr aan nwiin mue nin lir kan, Uwumbɔr faa ku mi.”

³⁶ Bi nan di tibɔr ngbaan ŋa bisui ni, le ni mɔɔr bi. Mbamɔn, tiwan nimɔk ubɔr David nan ŋa na nan mɔɔr binib ngbaan la.

³⁷ David aanib, ni Israel aanib mɔmɔk nan tii naadii ke uma ubɔr David aaŋaal aa nan bi Abner aakun ni.

³⁸ Ubɔr David nan baa waaninkpiib ke, “Naa kan ke Israel aayidaan kpaan ubaa kpo din wee ee?

³⁹ Hali min le ye unii u Uwumbɔr lee mi ŋa ubɔr na, din wee ma kan, nwon yɔl la. Seruya aajapɔtiib bee, Joab ni Abisai, bir sakpen ki tii mi. Uwumbɔr daa bitafal baah ŋeer pu na.”