2 Samuel 24 - Uwumbɔr aagbaŋ

David aah nan kahn binib pu na

¹ Uwumbɔr nan ki gee Israel yaab pu liŋuul, le ki cha David ban tibɔr tii bi. Uwumbɔr nan bui u ke, “Li cha ki ti kahn Israel ni Juda aanib.”

² Kina pu le David bui waajab aaninkpel Joab ke, “Di saaninkpiib, ki bɔ dii Israel aanibol mɔmɔk aatim ni, ki kahn binib ngbaan. M ban m bee baah wiir pu na la.”

³ Le Joab bui ubɔr ngbaan ke, “Mpɔɔndaan, Aadindaan Uwumbɔr cha Israel aanib li wiir nfum nkub ke baah bi pu dandana wee na, ki cha aa li bi ki kan kina. Ba ŋa aan mpɔɔndaan tee ban ke u ŋa kina?”

⁴ Le Ubɔr David yii, ki cha Joab ni waaninkpiib ŋa uma aah ban pu na; bi nan siir u chee, ki buen bi ti kahn Israel aanib.

⁵ Bi nan ti puur Jɔɔdann Aamɔɔl, le ki ti kal Aroer, kitiŋ ki bi kifataŋ aakaasisik ni, Gad aanibol aapepel ni na aaŋangii wɔb. Bi nan nyan nima, le ki buen ŋŋangan wɔb, Jaser aatiŋ ni,

⁶ le ki nyan nima ki buen Gilead, ni Kades, ntim mu bi Hef yaab aapepel ni na, le ki nyan nima ki buen Dann aanibol aapepel ni, ki nyan nima, ki buen liwilir wɔb, Saidonn aatiŋ ni.

⁷ Bi nan nyan nima, le ki buen liwipuul aaŋangii wɔb, ki ti fuu Taya aatiŋ ki bi maa ŋigon gob ki na ni, ki nyan nima, ki buen Hif ni Kanaann yaab aatim mɔmɔk ni, le ki di Beerseba, ni bi Juda aawipuul aaŋangii wɔb na, gbiln puwɔb.

⁸ Kina pu na, iŋmal iwae ni iwiin moninko aapuwɔb, baah chuun kitiŋ ngbaan aapepel mɔmɔk na, le bi gir ni Jerusalem ni.

⁹ Bi nan dan nan bui ubɔr, bijab bi ŋeer bi buen butɔb na aah nan ti kpaan pu na. Israel yaab nan ye bijab ŋichur ikui iniin la, le Juda yaab nan ye bijab ŋichur ikui iŋmu.

¹⁰ Tɔ, David aah kahn binib ngbaan doo kina na, le usui bii, le u bui Uwumbɔr ke, “M tun titunwanbir ti bir sakpen na. M gaŋ si ke aa di cha pinn mi. M tun kijɔrk aatuln la.”

^11-12 Le Uwumbɔr bui waabɔnabr Gad u nan bi David aayoonn ngbaan na ke, “Li cha ti tuk David ke maah ga daa utafal pu na, m ga cha u lee ntafadaan mutaa ponn ni, ki ga ŋa u waah lee pu na.” David aah nan finn kitaak ki ki woln na,

¹³ le Gad buen u chee, ki ti bui u Uwumbɔr aah len pu na, le ki baa u ke, “Aa gee nilani? Aa ban nkon lir saatiŋ pu ŋibin ŋitaa, bee iŋmal itaa ponn ni, nimi aadim li san dii nimi, bee iwiin itaa aaween lir saatiŋ pu? Tɔ, dakl lik, ki bui mi saah ban ke ni ŋa na, aan m ti bui Uwumbɔr.”

¹⁴ Le David bui ke, “M bi limukl aayoonn ni le na. Tɔ, maa gee ke unibɔn daa ntafal. Uwumbɔr le ye unimbaasaln daan, cha uma le daa timi aatafal.”

¹⁵ Kina pu le Uwumbɔr nan cha iween lir Israel yaab pu, ki nyan liyaadaal ngbaan aachakpiik ni, ki ti saa n‑yoonn mu u siin na. Kitiŋ ngbaan mɔmɔk pu, Israel aanib ŋichur imonko itaa ni kipiik le nan kpo.

¹⁶ Uwumbɔr aatuun aah nan ban ti bii Jerusalem na, le Uwumbɔr kpeln waalandak, waanib aatafadaan ngbaan pu, ki bui waatuun mu bi ku bi na ke, “Sil nima. Ni ŋeer kina.” Uwumbɔr aatuun ngbaan nan ti fuu Jebus aatiŋ aanii Arauna aadipoipaal na chee la, le Uwumbɔr bui u kina.

¹⁷ David nan kan ntuun mu bi ku binib ngbaan na, le ki bui Uwumbɔr ke, “Min le ye u aabɔr bii na. Min le tun taani. Bigiim bee mu ŋa ba? Aa ga daa min ni maadichal aatafal la.”

¹⁸ Liyaadaal baan ngbaan, le Gad nan buen David chee, ki ti bui u ke, “Li cha Arauna aadipoipaal pu, ki ti maa kitork aabimbiln nima tii Uwumbɔr.”

¹⁹ David nan kii Uwumbɔr aah len pu na, le ki buen Gad aah bui u pu na.

²⁰ Arauna nan lik, le ki kan ubɔr ni waaninkpiib choo u chee. Le u tar lir kitiŋ David aanimbiin ni,

²¹ le ki baa ke, “Mpɔɔndaan, aa ban ba do?” Le David gar u ke, “M dan m nan daa saadipoipaal, le ki maa kitork aabimbiln tii Uwumbɔr, aan iween i bi ku binib na doo.”

²² Le Arauna bui u ke, “Mpɔɔndaan, li joo li, ki di ŋa saah ban pu na tii Uwumbɔr. Inaa i aa ga di toor, ki di see mmii ni, libimbiln ngbaan paab na sɔ: yaadɔ, ni ŋidipoidabil ŋi mu ga tuur mmii na sɔ.”

²³ Arauna nan di ni mɔmɔk tii ubɔr, le ki bui u ke, “Aadindaan Uwumbɔr gaa saatork.”

²⁴ Le Ubɔr David bui u ke, “Aayii, m ga pa si li pu la. Maan di tiwan ni maa pan ni pu na toor kitork tii Ndindaan Uwumbɔr,” le ki pan lidipoipaal, ni inaa ngbaan pu, tikunabr aamombil kipiik ni ŋiŋmu,

²⁵ le ki maa kitork aabimbiln tii Uwumbɔr, ki toor kitork ki bi ga di see mmii ni na, ni kimɔbaan aatork nima. Uwumbɔr nan kii waameel, le iween ngbaan doo Israel aatiŋ pu.