2 Samuel 23 - Uwumbɔr aagbaŋ

David aakookoo aabɔr

¹ Jese aajapɔɔn David le ye uja u Uwumbɔr nan tii u liyimbil na, Uwumbɔr u Jakob mu nan dii u na le nan lee u ubɔr, uma le nan naan Israel yaab aalahn i mɔ na. David aakookoo aabɔr sɔ:

² Uwumbɔr Aafuur Nyaan le cha m len tibɔr, waanaŋ bi mmɔb ni la, Uwumbɔr u ye Israel yaab aakikiir na bui mi,

³ Israel yaab Aawumbɔr le len ke, “Ubɔr u joo ibamɔn joo waanib, ki joo bi Uwumbɔr aah mɔk pu na

⁴ naahn kichakpinaanyeek ki daal aa kpa ntaalangbam na aawiin la, ki naahn nwiin mu cha timoor moor buyoonn utaal nun ki fir na la.”

⁵ Kina le Uwumbɔr ga ŋa waanyoor ŋa n‑yaabitiib pu; ba pu? u puu tipuur ti kaa kpa ndoon na tii mi, kimɔbaan ki kaan bii na, tipuur ti kaan kpeln na. Kina baanja le m ban, nima le ga li ye maanyaŋ, le Uwumbɔr ga sil cha li dan.

⁶ Binib bi kaa san Uwumbɔr na naahn ikokon i bi di mee na; ubaa aan ŋmaa di uŋaal meeh i,

⁷ see aa di tikur aadɔ, bee kikpaatuŋ le meeh i; bi mɔmɔk ga wu mmii pel pel.

David aajakpaam

⁸ David aajakpaam na aayimbil sɔ: njan yoo le nan ye Joseb Basebef u nyan ni Takemonn aatiŋ ni na. Uma le nan ye “Bitaa na,” aayidaan. U nan di waakpaatuŋ ton butɔb, bijab ikui iniin ponn ni, ki ku bi mɔmɔk butɔbaan ni.

⁹ Uleler, bikpaam bitaa na ni, le nan ye Dodo aajapɔɔn Eleasar, u nyan ni Aho aamaal ni na. Daalbaadaal u ni David nan kpak Filistia yaab bi nan kuun ke bi to butɔb na. Israel yaab aajab nan fenn ki san,

¹⁰ le u nan sil kiir bi, aan u ni Filistia yaab jan, le uŋanbim ti gɔb gaar waajaak aajuk pu. Uwumbɔr nan nyaŋ linyaŋ sakpeln liyaadaal ngbaan. Nee aapuwɔb, le Israel aajab nan gir ni, Eleasar aah si nin chee na, le ki nan chuu peer waah ku bi na aajaak aakur aabɔkul.

¹¹ Utatar, bikpaam bitaa na ponn ni, le nan ye Agee u nyan ni Harar aatiŋ ni na aajapɔɔn Sama. Filistia aajab nan kuun tɔb Lehi aatiŋ ni, nin chee ŋituun ŋibaa aasaak nan bi na. Israel aajab nan san,

¹² le Sama ma sil kisaak ngbaan ni, ki kiir ki, Filistia yaab chee, le ki ku Filistia aajab ngbaan. Liyaadaal ngbaan Uwumbɔr nan kan linyaŋ sakpeln.

¹³ Ni nan bi duuni lijikaacheel yoonn, le bijab bitaa, “Piitaa Na” ponn ni, nan buen Adulam aatakpaluŋ, ki ponn ni David nan bi na, le Filistia aajab bibaa mu nan bi Refaim Aafataŋ ni.

¹⁴ N‑yoonn ngbaan na, David nan bi ligongoln li bi kii li mbamɔm na le pu, le Filistia aajab bibaa nan ti gaa Betlehem aatiŋ.

¹⁵ David aalaasaab nan gur bi linampal ni la, le u bui ke, “Ubaa yaa ba joo ni mi nnyun mu nyan Betlehem aabisamɔb aanyunbun na ponn ni kan, m ba gee.”

¹⁶ Le bijakpaam bitaa ngbaan bɔ dii Filistia aajab ni, ki ti lun ni nnyunbun ngbaan ponn ni aanyun, ki di gir ni nan tii David. Le u nan yii, kaa nyun mu; u nan di mu tii Uwumbɔr la,

¹⁷ ki bui ke, “Uwumbɔr, maan ŋmaa nyu nnyun mue. Ni ga li bi ke m bi nyu bijab bi di baamɔfal ŋa biŋaal ni ki ti lun ni mu na aasin la,” le ki yii, kaa nyun mu. Bijakpaam bitaa ngbaan aah nan tun lipobil aatuln li na le bi na.

¹⁸ Joab u nan ye Seruya aabo na aanaal Abisai le nan ye “Piitaakpaam Na” aayidaan. U nan di waakpaatuŋ ton butɔb bijab ikui itaa ni, ki ku bi, le ki kan liyimbil “Piitaa Na” ni.

¹⁹ Uma le nan kpa liyimbil “Piitaa Na” ni, le ki kpaln baayidaan, u mu aa nan tee kpa liyimbil ke “Bitaa Na” na.

²⁰ Jehoyada, u nyan ni Kabseel na aajapɔɔn Benaya mu le nan ye uja u kpa liyimbil na; u nan tun lipobil aatun pam. U nan ku Moab aapobidam bilee bibaa. Daalbaadaal, u nan koo mbuu ni, nwiin mundaal ŋitaanal nan lir na, ki ti ku uchinn.

²¹ U nan ki ku Ijipt aatiŋ aawɔkl li nan joo kikpaatuŋ na mu. Benaya nan di lichakukul le tak u, le ki daa gaa kikpaatuŋ ngbaan Ijipt aanii ngbaan chee, ki di ki ku u.

²² Benaya u nan ye “Piitaa Na” ni ubaa na aapobil aatun ŋi u nan tun na le bi na.

²³ U nan kpa liyimbil bi ponn ni, le ki mu aa nan tee pii “Bitaa Na”. David nan di u ŋa waakikiib aayidaan.

^24-39 “Piitaa Na” ponn ni biken sɔ: Joab aanaal Asahel, ni Betlehem aanii Dodo aajapɔɔn Elhanann, ni Harod aatiŋ aanib Sama, ni Elika, ni Heles, u nyan ni Pelet aatiŋ ni na, ni Tekoa aatiŋ aanii Ikes aajapɔɔn Ira, ni Abieser, u nyan ni Anatof aatiŋ ni na, ni Mebunai, u nyan ni Husa aatiŋ ni na, ni Salmonn, u nyan ni Aho aatiŋ ni na, ni Maharai, u nyan ni Netofa aatiŋ ni na, ni Netofa aatiŋ aanii Baana aajapɔɔn Heleb, ni Benjaminn aanibol aatiŋ Gibea aanii Ribai aajapɔɔn Itai, ni Benaya, u nyan ni Piratonn aatiŋ ni na, ni Hidai, u nyan ni tifatann ti bi duun Gaas na, ni Abi‑Albonn, u nyan ni Araba aatiŋ ni na, ni Asmafef, u nyan ni Bahurim aatiŋ ni na, ni Eliaba, u nyan ni Saalbonn aatiŋ ni na, ni Jasenn aajapɔtiib, ni Jonatann, ni Sama, u nyan ni Harar aatiŋ ni na, ni Sarar, u nyan ni Harar aatiŋ ni na aajapɔɔn Ahiam, ni Ahasbai, u nyan ni Maaka aatiŋ ni na aajapɔɔn Elifelet, ni Ahitofel, u nyan ni Gilo aatiŋ ni na aajapɔɔn Eliam, ni Hesro, u nyan ni Kamel aatiŋ ni na, ni Paarai, u nyan ni Arab aatiŋ ni na, ni Natann, u nyan ni Soba aatiŋ ni na aajapɔɔn Igal, ni Bani, u nyan ni Gad aatiŋ ni na, ni Selek, u nyan ni Amonn aatiŋ ni na, ni Naharai, u nyan ni Beerof aatiŋ ni ki ye Joab aajawan aajojoor na, ni Ira ni Gareb, bi nyan ni Jatir aatiŋ ni na, ni Uria, u nan ye Hef aanii na. Bi nan ti kpaan bijab piitaa ni bilole la, le ki kpa liyimbil.