2 Samuel 22 - Uwumbɔr aagbaŋ

David aah gaa linyaŋ aalahn mu na

¹ Uwumbɔr aah nan gaa David lii Sɔɔl ni waadim biken chee pu na, le David nan gaa nlahn mue tii Uwumbɔr:

² Uwumbɔr le ye maakikiir; uma le ye maajawan aatiŋ ki pɔɔ na.

³ Maawumbɔr le ye u kii mi na, le m yaa bi u chee kan, m ŋmar. U kii mi ke kijaak aapeln na la; u kii mi, le m bi ŋŋmarm ni. Uma le ye u gaal mi lir na, u kii mi, le tiwanbir aa piir mi.

⁴ M yin Uwumbɔr, le u gaa mi maadim chee lii. Pak Uwumbɔr man.

⁵ Nkun aanimaln le nan mann gob mi; mbiin aabuln nan mann goln mi.

⁶ Nkun aanimaln le nan mann goln mi, le likaakul pen mi laagaawɔb.

⁷ M yin Uwumbɔr maamukl ni; m yin Maawumbɔr ki ban nterm. Le u bi waadichal ni ki ŋun maaneel; u nan ŋun maaterm aawiil pu.

⁸ Le kitiŋ dam ki deŋ; le kitaalangbaŋ aah baa nin chee na dam ki jii; ba pu? Uwumbɔr aaŋuul le nan fii.

⁹ Iŋmanyuu nan nyan ni umɔfataabun ni, le mmiigaal, ni mmiisakɔn nyan ni umɔb ni.

¹⁰ U nan daa kar kitaalangbaŋ ki sunn ni, le ntaalangbam bɔmbɔm bi utaapɔtan taab.

¹¹ U nan fii mala, tiwan ni kpa ifeen na pu, u nan chuun libuln pu la.

¹² U nan di mbɔmbɔɔn le biin ubaa pu, ntaalangbam mu nyuun ki gbii ntaanyun na le nan mann goln u;

¹³ Mmiisakɔn mu gaal na le nan gaal ke utaal aah moor pu na, ki loln u pu nsan.

¹⁴ Le Uwumbɔr bi kitaapaak ki teen ke utaal na; le binib mɔmɔk ŋun Uwumbɔr Mpɔɔnsakpiindaan aaneel pu.

¹⁵ U nan too waapiin, le waadim yaa; u nan cha utaal moor, le bi san.

¹⁶ Buyoonn Uwumbɔr aaŋuul fii, aan u kae waadim ki ŋuun ke uchinn na, nnyusakpem aataab nan doon nkuun, le kitiŋ aah baa nin chee na chuu piir waan.

¹⁷ Uwumbɔr nan nyan ni paacham le ki laan chuu mi; u nan daa nyan mi nnyun mu nyoo na ni.

¹⁸ U nan gaa mi maadim bi pɔɔ sakpen na chee lii, ki gaa mi binib bi mɔmɔk nan mi na chee lii; ba pu? bi nan pɔɔ jer mi.

¹⁹ Maah nan bi tibɔr ni na, le bi nan tak mi, le Uwumbɔr nan kiir mi.

²⁰ U nan nyan mi linimaln ni; usui aah nan piin m pu pu na, le u nan gaa mi lii.

²¹ Maah tun ni ŋan na pu na, le Uwumbɔr pan mi kina aapal; maah kaa tun taani ubaa pu na, le u ŋani waanyoor ŋani m pu.

²² M kii Uwumbɔr aakaal; maa fenn mpuwɔb tii Maawumbɔr.

²³ M dii waakaal mɔmɔk; maa yii waamɔb.

²⁴ U nyi ke maa ŋa taani ubaa, u nyi ke maa tun titunwanbir.

²⁵ Kina pu le u pa mi maatunyaan pu; ba pu? u nyi ke maa tun taani ubaa.

²⁶ Uwumbɔr, binib bi si aapuwɔb na, aa mu si bipuwɔb, ki ŋan sakpen, binib bi ŋan na chee.

²⁷ Aa bi chain binib bi bi chain na chee, le kaa gee bibiindam.

²⁸ Aa gaal binib bi sunn bibaa taab na lir, le ki sunn binib bi kpa kigaak na taab.

²⁹ Uwumbɔr, sin le ye maawiihn; sin le jenn maabɔmbɔɔn.

³⁰ Sin le tii mi mpɔɔn ke m di tak maadim, ki tii mi mpɔɔn mu m joo nyaŋni tiwan ni kii bi na.

³¹ Uwumbɔr ma aabimbin ŋan ti nyaŋ, le aa ga ŋmaa li kpa waamɔbon pu limakl. U naahn kijaak aapeln le ki tii binib bimɔk ban waaterm na.

³² Uwumbɔr baanja le ye Tidindaan; Uwumbɔr baanja le ye u kii timi na.

³³ Uwumbɔr ngbaan le ye maakikiir u pɔɔ na; uma le nyani tibɔbir maasan ponn ni.

³⁴ U cha m san mala mala ke upeeman na; u nyani mi linimaln ni, ŋijoo pu.

³⁵ Uma le bae mi butɔb aabaem, le m ŋmaa joo butɔm bu pɔɔ sakpen na too.

³⁶ Uwumbɔr, aa kii mi, le ki gaal mi lir; saaterm tii mi liyimbil.

³⁷ Saa cha maadim chuu mi, le maa kee lir.

³⁸ M san dii maadim ki nyaŋni bi; see m ti ku doo bi, le ki nin sil.

³⁹ M gbaa bi bilni, le baa ki ŋmaa fii; m nyaŋni bi, le bi dɔ nnimbiin ni.

⁴⁰ Aa tii mi butɔb aapɔɔn, ki tii mi linyaŋ maadim pu.

⁴¹ Aa cha maadim san m chee la; m ku door binib bi kaa gee mi na.

⁴² Bi lik ban nterm, le ubaa mu aan gaa bi lii, bi yin Uwumbɔr, le waan gar bi.

⁴³ M gbaa bi, le bi kpaln kitangbaak; m taa bi pu kitiŋ ponn ni ke tikpakpar na la.

⁴⁴ Aa gaa mi lii, maanib bi yii maamɔb na chee ki cha m beenin ye ŋitimbol aayidaan; maah kaa nan nyi binib bi na le gur ye maatutum.

⁴⁵ Biwɔwɔm gbaani nnimbiin ni la; m yaa len kan, bi keei maamɔb la.

⁴⁶ Bitaakpab yɔl la, le bi san gbeer nyani baapɔɔn aatim ni.

⁴⁷ Uwumbɔr bi n‑yoonn mɔmɔk. Pak maakikiir man. Moon man ke Uwumbɔr pɔɔ; Uwumbɔr u gaal mi lir na pɔɔ sakpen a.

⁴⁸ U tii mi linyaŋ maadim pu; u sunni ŋitimbol ŋani ntaapɔtan ni,

⁴⁹ ki gaal mi maadim chee lir. Uwumbɔr, aa tii mi linyaŋ maadim pu, ki kii mi bijab bi bir na chee.

⁵⁰ Kina pu le m pak si ŋitimbol ponn ni; m gaa ilahn ki pak si.

⁵¹ Uwumbɔr le tii mi, u ye ubɔr na, linyaŋ sakpeln ngbaan; waah lee mi na, u mɔk mi ngeehm n‑yoonn mɔmɔk la. U mɔk mi, David, ni n‑yaabitiib waageehm ki ti saa n‑yoonn mu kaa kpa ndoon na.