2 Samuel 21 - Uwumbɔr aagbaŋ

Baah ku Sɔɔl aamaal pu na

¹ David aah nan ye Israel ni Juda yaab aabɔr n‑yoonn mu na, le nkon nan lir, ki ti saa ŋibimɔn ŋitaa. Kina pu le David nan baa Uwumbɔr nkon ngbaan aabɔr; le Uwumbɔr bui u ke, “Sɔɔl ni waamaal ku binib; u ku Gibeonn aatiŋ aanib.”

² Gibeonn aatiŋ aanib aa nan ye Israel aanib; bi nan ye Amor aanibol siib bibaa, le Israel yaab nan puu ke bi ga li kii bi, le Sɔɔl aah nan ban kitiŋ ke u kpee Israel ni Juda yaab pu na, le u nan ban u ku doo bi.

³ Kina pu le David kuun Gibeonn aanib, ki nan bui bi ke, “Ba aan m ga ŋmaa ŋa tii nimi? Taani u ti nan ŋa nimi na, le m ban m kuln u, aan ni mee Uwumbɔr aanyoor ŋa waanib pu.”

⁴ Le bi gar u ke, “Tikunabr ni salmaa aan ŋmaa kuln timi ni Sɔɔl aabɔr na, le ti mu aa ban ke ti ku Israel aanii ubaa.” Le David baa bi ke, “Kina kan, ni ye ba aan ni dak ke m ŋa tii nimi?”

⁵ Le bi ki gar u ke, “Sɔɔl nan ban ke u ku doo timi, aan ti ponn ni ubaa taa gur Israel aatiŋ kee pu, nibaa chee.

⁶ Kina pu na, nyan waamaal ni aajab bilole tii timi, aan ti ti leen bi iŋmin pu, Sɔɔl u Uwumbɔr lee u ubɔr na aatiŋ Gibea ni, Uwumbɔr aanimbiin ni.” Le ubɔr David bui bi ke, “M ga di bi tii nimi.”

⁷ Tɔ, u ni Jonatann aah nan puu tɔb tipuukpaan ti na pu, David nan di cha Sɔɔl aayaabil Mefibosef, u aate nan ye Jonatann na.

⁸ U nan tee nyan Armoni, ni Mefibosef, bi aana nan ye Aya aabisal Rispa, Sɔɔl aapuu waatiir na; ni Sɔɔl aabisal Merab aajapɔtiib biŋmu bi u nan ma Basilai, u nyan ni Mehola na aajapɔɔn Adriel chee na.

⁹ David nan di bi tii Gibeonn aanib, bi nan ti di bi leen iŋmin pu, lijool pu, Uwumbɔr aanimbiin ni, le bi mɔmɔk bilole nan kpaan kpo. Ni nan ye unaalan aah ti ban u doo buyoonn, aan bi piin njikaabim mu bi yin mu ke baale na aacheen na la, le bi nan ku bi.

¹⁰ Le Sɔɔl aapuu waatiir, Aya aabisal Rispa, di bɔtɔ aakeken ŋa libool, litakpasakpeln pu, ŋinikpol ngbaan aah bi nin chee na, le ki koo nima njikaabim ngbaan aacheen yoonn, ki ti saa buyoonn kiseek aataal fuu ni na. U nan kii inyoon, i taa ji ŋinikpol ngbaan nwiin pu, le ki kii ipeel, i mu taa ŋmɔ ŋi kinyeek.

¹¹ David aah ŋun Rispa aah ŋa pu na,

¹² le u buen ti gaa Sɔɔl ni ujapɔɔn Jonatann aakpab Jabes yaab chee, Gilead aatiŋ ni. Jabes yaab nan loon ti yoor ikpab ngbaan, Bef Sann aatiŋ ni, nin chee Filistia yaab nan ti di Sɔɔl ni ujapɔɔn Jonatann aawon leen iŋmin pu, bundaal bi nan ku bi Gilboa Aajool pu na la.

¹³ David nan yoor Sɔɔl ni ujapɔɔn Jonatann aakpab, le ki nan kuun bijab bilole bi bi nan leen bi iŋmin pu na mu aakpab.

¹⁴ Le bi nan ti di Sɔɔl ni ujapɔɔn Jonatann aakpab sub Sɔɔl aate Kis aacheek ni, Sela aatiŋ ki bi Benjaminn aapepel ni na, ki ŋa tiwan nimɔk Ubɔr David nan bui ke bi ŋa na. Nee aapuwɔb, le Uwumbɔr kii baah mee limeel li baatiŋ pu na.

Israel yaab ni Filistia aawɔk na aatɔb

¹⁵ Butɔb buken nan ki fii, Israel yaab ni Filistia yaab aakaasisik ni, le David ni waajab buen aan bi ni Filistia aajab ti jan. Kijaak ngbaan kibaa ni, le David nan ti bak.

¹⁶ Liwɔkl libaa, bi nan yin u ke Isbi‑Benob, u nan joo tikumann aakpaatuŋ ki aanyunyuun nan ga li pii ndibim kuruwaa bitaa ni ligeln aah nyuun pu na, ki pee kijaak aajupɔŋ na, nan dak ke u ga ŋmaa ku David la,

¹⁷ le Seruya aajapɔɔn Abisai nan dan nan ter David, le u ni liwɔkl ngbaan di saa tɔb, le u ku liwɔkl ngbaan. Le David aajab cha u puu ke waan ki dii bi buen butɔb ni. Bi nan bui u ke, “Sin le ye Israel aanib aamakl, le taa ban ke aa nya timi aaŋaal ni.”

¹⁸ Nee aapuwɔb, le butɔb ki fii, Filistia yaab ni Israel yaab aakaasisik ni, Gob aatiŋ ni, le bu ponn ni, Sibekai u nyan ni Husa na ku liwɔkl liken. Bi nan yin liwɔkl ngbaan ke Saf.

¹⁹ Butɔb buken nan ti ki fii Filistia yaab ni Israel yaab aakaasisik ni, Gob aatiŋ ni, le Jair, u nyan ni Betlehem na aajapɔɔn Elhanann ku Gaf aatiŋ aawɔkl li bi yin li ke Goliaf na. Waakpaatuŋ nan kpa likpaal li nan filk ke ukpaluul aadɔ mu pu iŋmin paa na.

²⁰ Le kijaak kiken nan ki fii Gaf aatiŋ ni, le liwɔkl libaa nan bi nima chee, ki gee kijaak sakpen. U nan kpa ŋŋanbim muloloob, ni ntaŋanbim muloloob la.

²¹ U nan seei Israel yaab, le David aakpel Sama aajapɔɔn Jonatann ku u.

²² Ŋiwɔk ŋinaa ngbaan nan ye Gaf aatiŋ aawɔk aamaal ni aajab la, le David ni waajab ku bi.