2 Samuel 20 - Uwumbɔr aagbaŋ

Seba aah yii David aamɔb ki nyan upuwɔb pu na

¹ Kinifaŋ kibaa nan nyan ni Benjaminn aanibol ni, ki ye Bikri aajapɔɔn, le ki bi Gilgal ni, le bi yin u ke Seba. U nan pii kakaan ki bui ke, “Taa ban David. Taan dii u. Israel aajab, cha ti kun man.”

² Le Israel yaab nan siir cha David ki dii Seba, le Juda aajab na kii David aamɔb, ki dii u nyan Jɔɔdann aamɔɔl ni, ki ti fuu Jerusalem.

³ David aah ti fuu waadichal ni, Jerusalem aatiŋ ni na, le u cha binib kii upuutiib waatiir kipiik bi u nan cha bi gaar puwɔb ke bi li kii libɔrdichal ngbaan na. U nan kpiini ki lik bi pu, ki mu aa nan ki doo bi chee. Baa nan ki nya lipaal, ki bi ke bikpopiib na la, ki ti saa baakun daal.

⁴ Ubɔr David nan bui Amasa ke, “Buen ki ti yin ni Juda aajab mɔmɔk, ki fuu ni do daalpu.”

⁵ Amasa nan buen u ti yin bi, le kaa ŋmaa fuu ni n‑yoonn mu ubɔr nan siin u na.

⁶ Kina pu le ubɔr nan bui Abisai ke, “Seba ga tii timi tibɔr, ki jer Absalom aah nan tii timi tibɔr pu na. Di maajab paan u pu, naa ye kina kan, u ga gaa tijawan aatim mubaa ki ŋmar.”

⁷ Le Abisai di Joab aajab, ni ubɔr aakikiib, ni bijab bi gur na nyan Jerusalem ki paan Seba pu.

⁸ Baah ti fuu Gibeonn aatakpasakpeln na chee na, le bi kan Amasa nima. Joab nan gor ki kii butɔb la, ki di kijaak aajuk ki bi kaajufuuk ni na gbin uchaŋ ni, waagbapapaln pu. Waah nyan sil ni na, le ki chuu fuur lir kitiŋ.

⁹ Le Joab bui Amasa ke, “Njɔ, aa pɔɔ ɔɔ?” le ki di uŋangii chuu ulangbaln, ke u moor utakpiln.

¹⁰ Amasa aa nan gor kiir kijuk ki Joab nan joo uŋaal muken na ni na, le Joab di ki saa gbir upuul, le Amasa aaneer nyan lir ni kitiŋ. U nan kpo libuul ngbaan ni la, le Joab aa ki gir saa u lelee. Le Joab ni unaal Abisai di paan Seba pu.

¹¹ Joab aaja ubaa nan gaar ki si Amasa aanikpol chee, ki tar ke, “Unii umɔk ye Joab ni David yoo na kan, u li paa Joab pu.”

¹² Amasa aanikpol nan dɔ nsin ponn ni, nsan aakaasisik ni. Joab aaja ngbaan nan kan ke unii mɔk nan sii le ki lik, le u fuul li nyan nsan ni, ki di bil kimɔgbaak, ki di likekeln biin li pu.

¹³ Waah nan chuu yoor linikpol ngbaan nsan ni na, le bi mɔmɔk di paan Joab pu, ke bi ti chuu Seba.

¹⁴ Seba nan bɔ dii Israel aanibol mɔmɔk ni, le ki ti fuu Abel Bef Maaka aatiŋ ni, le u yaab Bikri aamaal aanib mɔmɔk kuun, ki dii u koo kitiŋ ngbaan ni.

¹⁵ Joab aajab nan ŋun ke Seba bi nima, le bi buen ti gob kitiŋ ngbaan. Bi nan ŋa titan aabimbin tam kitiŋ ngbaan aagoln lipaal wɔb, ki gbii libuul, ligoln ngbaan aataab ke li lir.

¹⁶ Upiilandaan ubaa nan bi kitiŋ ngbaan ni, le ki baan ligoln ki teen ni ke, “Li pel, li pel. Bui man Joab ke u dan do; m ban m len u chee tibɔr la.”

¹⁷ Joab nan buen, le u ti baa u ke, “Sin Joab ye ee?” Le u kii ke, “Een, min ye.” Le upii ngbaan bui ke, “Maaninkpel, li pel.” Le u kii ke, “M pel.”

¹⁸ Le u bui ke, “N‑yaayoonn na bi nan len ke, ‘Li cha Abel aatiŋ ni, ki ti kan tiwan ni muk si na aatataa,’ le bi nan sil ŋani kina.

¹⁹ Timi aatiŋ ye kitikpaan la; ki ye Israel aatiŋ ki bi suuna, ki kii tii ubɔr na. Ba ŋa aa ban aa bii ki? Aa ban aa bii doo tiwan ni ye Uwumbɔr yaan na la aa?”

²⁰ Le Joab gar ke, “Aayii. Maan bii doo nimi aatiŋ.

²¹ Timi aalandak aa ye kina. Uja u nyan ni lijool aatiŋ ni, Efraim aatiŋ pu, aan bi yin u ke Seba, aan ute ye Bikri na, le yii Ubɔr David aamɔb, ki fii sil u pu. Nyan man ujabaan ngbaan tii ni timi, le m ga siir cha nimi aatiŋ.” Le upii ngbaan bui ke, “Ti ga di uyil mee laan ni nimi, ligoln paab.”

²² Le upii ngbaan siir buen kitiŋ ngbaan ni aanib chee, ki ti bui bi waalandak, le bi chuu gii Seba aayil, ki di mee laan Joab, ligoln pu. Joab nan pii kakaan, ki mɔk ke waajab di cha kitiŋ ngbaan, le bi gir kun. Le Joab mu gir buen Jerusalem ni, ubɔr chee.

David aajab aaninkpiib

²³ Joab le nan ye Israel aajab aaninkpel; le Jehoyada aajapɔɔn Benaya nan ye David aakikiib aaninkpel;

²⁴ le Adoniram nan ye binaagbiib aayidaan; le Ahilud aajapɔɔn Jehosafat nan ye unii u joo kitiŋ ngbaan aagbann na;

²⁵ le Sefa nan ye ugbaŋmeer; le Sadok ni Abiatar nan ye bitotoorb,

²⁶ le Jair aatiŋ aanii Ira mu nan ye David aatotoor ubaa.