2 Samuel 2 - Uwumbɔr aagbaŋ

David aah jin Juda aanaan pu na

¹ Nee aapuwɔb, le David baa Uwumbɔr ke, “M ga gir buen Juda aatiŋ kibaa ni ii?” Le Uwumbɔr kii u ke, “Een.” Le David ki baa u ke, “Kilatiŋ?” Le Uwumbɔr bui u ke, “Hebronn aatiŋ.”

² Le David fii buen Hebronn, ki joo upuutiib bilee na, Ahinoam u nyan ni Jesreel aatiŋ ni na, ni Nabal aakpopii Abigail u nyan ni Kamel na.

³ U nan ki joo waajab, ni baadichal mu, le bi ti kal kal ntim mu mann gob Hebronn na.

⁴ Le Juda aajab dan Hebronn aatiŋ ni, ki nan di nkpan kpir uyil pu, ki kaan u Juda aatiŋ aanaan. David aah ŋun ke Gilead aatiŋ ki bi yin ki ke Jabes na aanib le sub Sɔɔl na,

⁵ le u di tibɔr tee tun bi chee ke, “Uwumbɔr ŋa tinyoor ŋa ni pu; ba pu? ni mɔk nimi aabɔr Sɔɔl naah si uchaŋ ni pu na le ki sub u.

⁶ Uwumbɔr li kpa tiŋann ki ŋa waah puu pu na ni pu. Naah ŋa pu na pu, m ga li joo nimi tiŋann.

⁷ Li kpa man lipobil ki li pɔɔ. Nimi aabɔr Sɔɔl kpo a, le Juda aanib di mi ŋa baabɔr.”

Isbosef aah jin Israel aanaan pu na

⁸ Sɔɔl aajab aaninkpel Abner, u ye Ner aajapɔɔn na, nan di Sɔɔl aajapɔɔn Isbosef san puur Jɔɔdann aamɔɔl, ki buen Mahanaim aatiŋ ni.

⁹ Nima chee le Abner ti kaan Isbosef nnaan, ke u li ye Gilead, ni Aser, ni Jesreel, ni Efraim, ni Benjaminn aapepel, ni Israel yaab aatim muken mɔmɔk aabɔr.

¹⁰ U nan ye ŋibin imonko ilee aanii le ki jin nnaan ngbaan, le ki nan kal nnaan aajal pu, ki ti saa ŋibin ŋilee. Tɔ, Juda aanib nan si David aachaŋ ni,

¹¹ le u nan kal nnaan aajal pu, Hebronn aatiŋ ni, ki joo Juda yaab ki ti saa ŋibin ŋilole ni iŋmal iloob.

Israel yaab ni Juda yaab aatɔb

¹² Abner ni Isbosef aajab aaninkpiib biken nan nyan Mahanaim ki buen Gibeonn aatiŋ ni.

¹³ Joab, u aana nan ye Seruya na, ni David aajab aaninkpiib biken nan ti kuun ki keln bi Gibeonn aabukpiik na chee, nin chee bi mɔmɔk kal na. Bibaa nan kal kibukpiik ngbaan aapepel libaa, le biken na mu kal lipepel liken.

¹⁴ Le Abner bui Joab ke, “Cha ti mɔmɔk nyan binachipɔm timi aapepel ni, aan bi di tijawan jan.” Le Joab bui ke, “Ni ŋan.”

¹⁵ Kina pu le bijab kipiik ni bilee bi nyan ni Isbosef aajab ni ki si Benjaminn aamaal aasisiiyaan na, ni David aajab kipiik ni bilee nan jan kijaak.

¹⁶ Uja mɔk nan chuu waadin aayil, le ki di waajaak aajuk saa gbir waadin ngbaan aapuul, le bijab moninko ni binaa ngbaan mɔmɔk lir ki kpoi. Kina pu le bi yin Gibeonn aabuul ngbaan ni ke, “Kijaak Aajum Aapepel.”

¹⁷ Le butɔb sakpen fii, le David aajab nyaŋ Abner ni Israel aajab.

¹⁸ Seruya aajapɔtiib bitaa bimina, Joab, ni Abisai, ni Asahel nan bi nima. Asahel, u ŋmaa san ke upeeman na,

¹⁹ nan di kal Abner pu, ki san ban u.

²⁰ Le u fenn ki lik u, le ki baa ke, “Sin Asahel ye ee?” Le u kii ke, “Een.”

²¹ Le Abner bui u ke, “Taa ki san dii mi. Li san dii bijab ngbaan ubaa, ki gaa waah joo tiwan ni na.” Le Asahel yii, ki beenin san dii u.

²² Le Abner ki bui u lelee ke, “Taa ki san dii mi. Ba ŋa aa muk mi ke m ku si? M ga ŋmaa kaa kinye ki ki len aakpel Joab chee tibɔr?”

²³ Le Asahel yii, kaan di cha; kina pu le Abner too waakpaatuŋ lisusur, ki yun chaar u. Le Asahel lir kitiŋ ki kpo, le unii umɔk nan fuu ni waah dɔ nin chee na kan, u ga sil ki gaar si lik.

²⁴ Le Joab ni Abisai ma di paan Abner pu, le ki ti fuu Ama aagongon li bi Gia aawipuul wɔb, Gibeonn aateer pu aasan ni na chee kijook.

²⁵ Le Benjaminn aanib ki sil Abner aachaŋ ni ki ti kuun sil ligongoln libaa paab.

²⁶ Le Abner teen bui Joab ke, “Ba ŋa ti jaa aan kijaak ngbaan aa kpa ki doo? Saa nyi ke kijaak ngbaan aadoon ga nan li ye mpombiin ŋmeen la aa? Ti ye saatiŋ aanib la. Bayoonn aan aa ga bui saajab ke bi taa ki san dii timi?”

²⁷ Le Joab bui ke, “M puu Uwumbɔr u bi n‑yoonn mɔmɔk na ke aa yaa kaa ba len tibɔr tee kan, maajab ba ga li beenin san dii nimi ki ti woln kitaak.”

²⁸ Le Joab pii ukpiin ki yin waajab, ke bi taa ki san dii Israel yaab; le kijaak ngbaan doo.

²⁹ Abner ni waajab nan chuun dii Jɔɔdann aafataŋ ni kinyeek ngbaan, ki puur Jɔɔdann Aamɔɔl, le ki ki chuun kitaak ki woln na aachakpiik ni, ki ti gir fuu Mahanaim.

³⁰ Joab aah nan di cha kaa ki san dii bi na, le u kuun waajab mɔmɔk, ki kan ke bi ponn ni kipiik ni biwae le aa nan bi, ki kpee Asahel pu.

³¹ David aajab nan ku Abner aajab bi ye Benjaminn aanibol aanib na ikui itaa ni imonko itaa la.

³² Joab ni waajab nan yoor Asahel, ki ti di sub baadichal aakaakul ponn ni, Betlehem aatiŋ ni la, le ki chuun kinyeek ngbaan ki ti fuu Hebronn lichakpitaawoln.