2 Samuel 19 - Uwumbɔr aagbaŋ

Joab aah galn David pu na

¹ Bi nan bui Joab ke Ubɔr David bi wii Absalom pu.

² Nima le mpopiin aanyaŋ na kpaln David aajab chee mpombiin liyaadaal ngbaan; ba pu? bi nan ŋun ke ubɔr bi wii ujapɔɔn aakun pu.

³ Bi nan gir suuna, le ki koo kitiŋ ni, ke bijab bi inimɔɔn chuu bi, baah san baadim chee butɔb ni pu na.

⁴ Ubɔr nan biin unimbil pu, le ki wii mpɔɔn pu ke, “Maabo, maabo Absalom. Absalom, maabo.”

⁵ Joab nan buen ubɔr aadiik ni, le ki ti bui u ke, “Saajab bi gaa saamɔfal, ni aajapɔtiib, ni aabisatiib, ni aapuutiib, ni aapuutiib waatiir aamɔfal lii na, le aa jinn bi inimɔɔn din wee.

⁶ Aa nan binib bi gee si na, le ki si binib bi nan si na aachaŋ ni. Aa mɔk din wee ke saajab aaninkpiib, ni saajab aa ye nibaa aa chee. M bee din wee, ke Absalom yaa ba bi limɔfal ni, aan timi kpo kan, ni ba ga li mɔ si pam.

⁷ Buen ti cha saajab na bee ke aa si bichaŋ ni. M puu Uwumbɔr aayimbil pu, ke aa yaa kaa ŋa kina kan, joo cha ni fen kan, bi ponn ni ubaa aan ki li bi aa chee. Le ni ga li ye falaa sakpen u aa jin saamɔfal mɔmɔk ni na.”

⁸ Le ubɔr fii, ki ti kal kitiŋ ngbaan aabisamɔb chee. Waajab nan ŋun ke u bi nima, le bi mɔmɔk kuun ti goln u. N‑yoonn mue na, Israel yaab mɔmɔk nan san, uja mɔk san cha udo.

David aah ki gir Jerusalem ni pu na

⁹ Kitiŋ ngbaan mɔmɔk pu, bi nan bi jaa biŋmeen la. Bi nan bui tɔb ke, “Ubɔr David le gaa timi lii, timi aadim chee. U nan gaa timi Filistia yaab chee lii, le dandana wee u san cha kitiŋ kee, Absalom pu.

¹⁰ Ti di Absalom kaan ke timi aabɔr, le bi ku u butɔb ni. Kina pu na, ba ŋa ubaa aan pɔɔn ubaa ki giin ni Ubɔr David?”

¹¹ Israel yaab aah nan bi len pu na nan fuu Ubɔr David chee. Le u tun bitotoorb Sadok, ni Abiatar, ke bi ti baa Juda aayidam ke, “Ba ŋa ni ye nimi le ti gbiln puwɔb, ke ni giin ni ubɔr nan kaan waabɔrdichal ni?

¹² Ni ye ndo yaab la, nsinbaan aanib; ba ŋa ni ti gbiln puwɔb kina?”

¹³ David nan ki bui bi ke bi ti bui Amasa ke, “Aa ye ndo yoo la. Ki nya din wee ki joo cha, m ga di sin le ŋa maajab aaninkpel, Joab aabuul ni. M yaa kaa ŋa kina kan, Uwumbɔr faa ku mi.”

¹⁴ David aaliin yee nan cha u kan Juda aajab mɔmɔk aapak, le bi di lilambil tii u, ke u ni waajab mɔmɔk gir ni.

¹⁵ Waah cha na, le u ton Juda aajab, Jɔɔdann Aamɔɔl chee. Bi nan nyan ni Gilgal aatiŋ ni la, ke bi nan cheen u puur limɔɔl ngbaan.

¹⁶ N‑yoonn ngbaan, le Gera aajapɔɔn Simei, u nyan ni Bahurim, ki ye Benjaminn aamaal aanii na, mu ŋa mala ki buen Jɔɔdann aamɔɔl ni, ke u ti keln Ubɔr David nima.

¹⁷ U ni Benjaminn aajab lichur le nan dii ni. Le Sɔɔl aadichal aatutunn Siba mu, ni ujapɔtiib kipiik ni biŋmu, ni bitutum moninko, pue fuu ni Jɔɔdann aamɔɔl ni waahr, le ubɔr nin fuu ni.

¹⁸ Bi nan puur limɔɔl ngbaan, ke bi ti di ubɔr ni waanib puur ni, ki ŋa ubɔr aah ban ke bi ŋa pu na mɔmɔk. Ubɔr aah nan bi gor ke u puur na, le Simei tar lir kitiŋ, unimbiin ni,

David aah ŋa Simei tiŋann pu na

¹⁹ ki bui u ke, “Mpɔɔndaan, m gaŋ si, ke aa suln maah nan ŋa si taani u nwiin mundaal aah nan nyan Jerusalem ponn ni na. Taa li joo mi taani ngbaan, ke aa ki teer u pu.

²⁰ Maaninkpel, m nyi ke m tun taani, kina pu le m ye njan aanii u nyan ni ŋŋangan wɔb aanibol ni, ki dan nan ton si Mpɔɔndaan nsan ni na.”

²¹ Le Seruya aajapɔɔn Abisai bui ke; “Simei ŋeer nkun; ba pu? u nan puun lii unii u Uwumbɔr lee u ubɔr na pu.”

²² Le David bui Abisai, ni ukpel Joab ke, “Ŋma baa nimi tibɔr? Ni ban ni tii mi tibɔr la aa? Min le ye Israel yaab aatiŋ aabɔr dandana wee, kaan cha Israel aanii ubaa kpo din wee.”

²³ Le u bui Simei ke, “Saan kpo,” le ki puu tipuur kina pu.

David aah ŋa Mefibosef tiŋann pu na

²⁴ Le Sɔɔl aayaabil Mefibosef mu dan ke u nan tooh ubɔr nsan ni. Waa nan finn utaa, kaa kuu ulangbaln, kaa finn waawanpeenkaan, ki nyan bundaal Ubɔr David nan nyan Jerusalem ni na, ki nan saa waah di linyaŋ gir ni pu na.

²⁵ Mefibosef aah nyan ni Jerusalem fuu ni, ke u nan tooh ubɔr nsan ni na, le ubɔr bui u ke, “Mefibosef, saa nan dii mi buen. Ba ŋa saa nan dii mi?”

²⁶ Le u gar u ke, “Mpɔɔndaan, aa nyi ke m ye uwɔb la. M nan bui maatutunn ke u gor maabon aan m diŋ ki dii si, le u nan ti di mi kooh aa pu.

²⁷ U nan ti mɔln inyamɔn le paan mi, si Mpɔɔndaan chee. Tɔ, Mpɔɔndaan, aa naahn Uwumbɔr aatuun la, kina pu na, ŋa mi saah dak ke ni ŋeer mi pu na.

²⁸ Nte aadichal mɔmɔk ŋeer ke si Mpɔɔndaan ku ti mɔmɔk; aa mu nan tee tii mi nsan ke m li ji aa chee tijikaar. Maa ki kpa nsan mubaa ke m ki mee si Mpɔɔndaan chee tiŋann tibaa.”

²⁹ Le ubɔr gar u ke, “Taa ki len tibaa. M ŋa nlandak ke aa ni Siba le ga yakr Sɔɔl aawangol.”

³⁰ Le Mefibosef bui u ke, “Mpɔɔndaan, cha Siba li joo li mɔmɔk. Saah ki gir ni, nibaa aa ŋa si na, nima ngbaan ŋeer a.”

David aah ŋa Basilai tiŋann pu na

³¹ Gilead aanii Basilai mu nan nyan ni Rogelim aatiŋ ni, ke u nan cheen ubɔr puur Jɔɔdann aamɔɔl.

³² Basilai nan por pam, u nan ye ŋibin imonko inaa aanii la. U nan ye uwankpadaan la, le ki nan tii ubɔr tijikaar, buyoonn u nan bi Mahanaim aatiŋ ni na.

³³ Le ubɔr bui u ke, “Dii mi buen Jerusalem ni, aan m ti li lik aa pu.”

³⁴ Le Basilai gar u ke, “Maan ki yunn; m ga ki dii si, Mpɔɔndaan, buen Jerusalem ni, ki ti ŋa ba?

³⁵ M kan ŋibin imonko inaa la, le nlaasaab aa ki bi nibaa ni. Maa ki nyi maah ji ki nyu tiwan ni na aamɔɔn, kaa ki ŋun bilahngaab mu aaneel. M ga ti li ye limukl le si Mpɔɔndaan chee.

³⁶ Tipar sakpenn ngbaan jer mi. Kina pu na, m ga cheen si foor Jɔɔdann aamɔɔl chee do siib la.

³⁷ Le aa tii mi nsan m gir kun, ki ti kpo duun ntetiib aacheek. Njapɔɔn Kimham sɔ, uma le ga ti li bi tun tii si. Mpɔɔndaan, li joo u cha, ki ti ŋa saah dak ke ni ŋan pu ki tii u na, ki tii u.”

³⁸ Le ubɔr gar u ke, “M ga di u buen, ki ti ŋa saah ban pu na tii u, ki ga ŋa aa mu aah ban pu na tii si.”

³⁹ Le David ni waajab mɔmɔk puur Jɔɔdann Aamɔɔl. U nan moor Basilai aatakpiln, ki mee Uwumbɔr aanyoor ŋa u pu, le Basilai gir kun linampal.

Juda ni Israel yaab aah nan kpak ubɔr pu pu na

⁴⁰ Ubɔr David aah puur Jɔɔdann aamɔɔl, aan Juda aajab mɔmɔk, ni Israel aajab ligetekr libaa cheen ni u cha na, u nan buen Gilgal la, le Kimham dii u.

⁴¹ Le Israel yaab mɔmɔk buen ubɔr chee ki ti bui u ke, “Mpɔɔndaan, ni ŋa kinye aan Juda aajab, bi ye tinaabitiib na, dak ke bima le kpa nsan ke bi ti cheen ni sin, ni saadichal, ni saajab, ki puur ni Jɔɔdann Aamɔɔl?”

⁴² Le Juda aajab gar bi ke, “Tiwan ni pu ti ŋa kina na le ye ke ubɔr ye timi aanii la. Ba ŋa kina ngbaan cha nimi aaŋuul fii? Waa pan timi aajikaar pu, kaa tii timi nibaa mu.”

⁴³ Le Israel yaab gar ke, “Hali u yaa ye nimi aanii le kan, ti mu kpa naah kpa nsan mu ke u ye nimi aanii na la. Ti ye ŋinibol kipiik la. Ba ŋa ni lik seen timi? Taa suln man ke timi le puen len ke ni ŋan ke u gir ni.” Tɔ, Juda aajab aamɔi nan pɔɔ ki jer Israel yaab, ke u ye baanii la.