2 Samuel 18 - Uwumbɔr aagbaŋ

Baah nyaŋ Absalom ki ku u pu na

¹ Ubɔr David nan kuun waajab mɔmɔk nan kpaan, le ki yakr bi ŋigetek lichur lichur, ni nkub nkub, ki tii bi bininkpiib,

² le ki tun bi ŋigetek ŋitaa pu, le Joab ni unaal Abisai, ni Itai u ye Gaf aanii na, ye baaninkpiib, bi mɔmɔk ni baagetek. Le u bui waajab ngbaan ke, “Min mbaa ga dii nimi buen.”

³ Le bi gar u ke, “Taa dii timi buen. Timi ŋmeen yaa ti fenn ki san, bee bi yaa ku timi ligeln libaa doo kan, naan li ye nibaa bidim ngbaan chee; sin ma jer timi ŋichur kipiik. Aa yaa gaar kitiŋ ni do, ki tii ni timi nterm kan, ni ŋan jer ke aa buen.”

⁴ Le ubɔr ngbaan bui ke, “M ga ŋa naah dak ke ni ŋan na la,” le ki sil gbaŋ kitiŋ ngbaan aabisamɔb, le waajab lul jer lichur lichur, ni nkub nkub.

⁵ U nan bui waajab aaninkpiib Joab, ni Abisai, ni Itai ke, “Min pu, ni taa ŋa unachipɔɔn Absalom ngbaan nibaa.” Le waajab mɔmɔk ŋun waah bui bininkpiib ngbaan pu na.

⁶ Ubɔr David aajab nan nyan yal kitiŋ ngbaan pu, le bi ni Israel yaab ti di kijaak piin, Efraim aachook ni.

⁷ David aajab nan nyaŋ Israel yaab; linyaŋ ngbaan nan kpa ijawaan. Nwiin ngbaan daal, bi nan ku Israel aajab ŋichur moninko la.

⁸ Kijaak ngbaan nan yaa koo kitiŋ ngbaan aatingbaan ni, le binib bi nan kpo kichook ni na nan jer baah ku bi butɔb ni na.

⁹ Libuul ngbaan ni, le Absalom kan David aajab bibaa. Absalom nan dik kiwakork ki naahn ubon na pu la, le ki ban u jer likpaln aasub bubaa taab, le uyikpir lɔk isubon, le kiwakork ngbaan san jer, le Absalom gaar lun busub ngbaan pu.

¹⁰ David aaja ubaa le nan kan u, le ki ti bui Joab ke, “Maaninkpel, m kan Absalom lun likpaln aasub bubaa pu.”

¹¹ Le Joab bui ke, “Saah kan u na, ba ŋa saa ku u libuul ngbaan ni? Min mbaa ba ga tii si tikur aamombil kipiik, ni ligbapapaln.”

¹² Le uja ngbaan gar u ke, “Hali aa yaa ba ga tii mi tikur aamombil ngbaan kuruwaa ŋiŋmu kan, maa ba ga di ŋŋaal meeh ubɔr aajapɔɔn. Ti mɔmɔk ba ŋun ubɔr aah bui sin, ni Abisai, ni Itai ke, ‘Min pu, taa ŋa man unachipɔɔn Absalom ngbaan nibaa.’

¹³ Tɔ, m yaa ba yii ubɔr aamɔb ki ku Absalom kan, ubɔr ba ga ŋun ti, u ŋun tibɔr mɔmɔk, le saa ba ga sil nchaŋ ni.”

¹⁴ Le Joab bui ke, “Maan ki taan aa chee kpala.” U nan yoor tikpaatunn titaa, le ki ti di ti too yun Absalom aabiŋ, waah laa fu, ki lun likpaln aasub ngbaan pu pu na,

¹⁵ le Joab aajab kipiik san nan kpee u pu, ki ku Absalom.

¹⁶ Le Joab cha bi pii ikpiin, ke bi di cha kijaak ngbaan, le waajab di cha, kaa ki san dii Israel yaab, ki gir ni.

¹⁷ Bi nan chuu nyan Absalom aawon busub pu, ki di mee lii libuul li nyoo na ponn ni, kichook ngbaan ni, le ki peei ŋitakpal ti gbiin li ni. Le Israel yaab mɔmɔk nan san, bimɔk san cha bido bido.

¹⁸ Absalom aah nan laa bi limɔfal ni na, u nan maa tiwan nibaa siin ubaa pu, kifataŋ ki bi yin ki ke Ubɔr aafataŋ na ni; ba pu? waa nan kpa ubijabo u ga cha waayimbil taa kpo na. Kina pu na, u nan di ubaa aayimbil le yin tiwan ngbaan, ki nyan n‑yoonn ngbaan ki nan saa din wee, bi beenin yin ni ke Absalom Aateerm Aawan la.

David aah wii Absalom aakun pu pu na

¹⁹ Le Sadok aajapɔɔn Ahimaas bui Joab ke, “Cha m san ti bui ubɔr tibɔnyaan tee, ke Uwumbɔr gaa u lii waadim chee.”

²⁰ Le Joab bui ke, “Aayii, saan di tibɔnyaan tibaa buen din wee. Aa ga nan ŋa kina daalbaadaal la, naa ye din wee; ba pu? ubɔr aajapɔɔn kpo a,”

²¹ le ki bui waanaagbiija, u nyan ni Kus aatiŋ ni na ke, “Buen ti bui ubɔr saah kan pu na.” Le unaagbiija ngbaan gbaan, ki fii san cha.

²² Le Ahimaas nan beenin dii Joab ke, “Ntafal aa bi tiwan ni ga ŋa na ni; m gaŋ si ke aa cha m mu di tibɔr ngbaan buen.” Le Joab baa u ke, “Maabo, ba ŋa aa ban aa buen? Saan kan tipar tibaa ti pu.”

²³ Le Ahimaas ki bui ke, “Ni yaa ye pu na kan, m ban m buen.” Le Joab bui u ke, “Kina kan, li cha.” Le Ahimaas di guu kaar, ki di dii Jɔɔdann Aafataŋ ni, le ki kpaan san jer unaagbiija ngbaan pu nsan ni.

²⁴ David nan ka kitiŋ ponn ni aabisamɔb ni lipaal wɔb aabisamɔb aasisik ni aapaan na ni la. Ukikiir u nan si kii na nan buen ti jon ligoln paab, ki ti sil mbisamɔb chee; le ki lik, ki kan ke uja ubaa san choo.

²⁵ U nan teen ki bui ubɔr, le ubɔr bui ke, “U yaa dii ubaa kan, u joo ni tibɔnyaan la.” Utaasann ngbaan nan moo ŋɔŋ ni bi pu.

²⁶ Le ukikiir ngbaan ki kan uja uken mu ki san choo, le u ki teen bui ni mbisamɔb aakikiir ke, “Lik, uja uken mu ki san choo.” Le ubɔr gar ke, “U mu ki joo ni tibɔnyaan la.”

²⁷ Ukikiir ngbaan nan bui ke, “Njan aaja na san ke Ahimaas na la.” Le ubɔr bui ke, “U ye uninyaan la, le ki joo ni tibɔnyaan.”

²⁸ Ahimaas nan teen ki doon ni ubɔr, le ki tar lir kitiŋ unimbiin ni, ki bui ke, “Mpɔɔndaan, pakn Aadindaan Uwumbɔr u tii si linyaŋ bijab bi yii saamɔb na pu.”

²⁹ Le ubɔr baa ke, “Unachipɔɔn Absalom kpa limɔfal aa?” Le Ahimaas gar u ke, “Maaninkpel, saajab aaninkpel Joab aah tun ni mi buyoonn na, m ba kan ke kinikpakpak sakpeŋ fii, tɔ, maa ba bee tiwan ni ba ye na.”

³⁰ Le ubɔr bui ke, “Ti sil do;” le u buen ti sil nima.

³¹ Le Joab aanaagbiija na mu fuu ni, le ki nan bui ubɔr ke, “Mpɔɔndaan, m kpa tibɔnyaan m tii si. Din wee Uwumbɔr tii si linyaŋ, binib bi mɔmɔk yii saamɔb na pu.”

³² Le ubɔr baa u ke, “Unachipɔɔn Absalom na kpa limɔfal aa?” Le unaagbiija ngbaan bui ke, “Maaninkpel, bi yaa ba ŋa saadim mɔmɔk, ni bimɔk yii saamɔb na, ke baah ŋa u pu na kan, m ba gee.”

³³ Mpombiin nan ti nyaŋ ubɔr, le u fii buen kitiŋ aabisamɔb aadiik na ni, ki ti wii. Waah cha na, le u wii ke, “Maabo, maabo Absalom. Absalom, maabo. Maabo, min le yaa ba tee kpo ki cha sin kan, ni ba soor. Maabo Absalom.”